Omicron Cases Drop: ఒమిక్రాన్ వేరియంట్ ప్రపంచదేశాలను పట్టిపీడిస్తోంది. అమెరికా, బ్రిటన్, ఫ్రాన్స్ తదితర దేశాల్లో కేసులు రోజురోజుకూ రెట్టింపవుతూ లక్షల మందికి సోకింది. అయితే ఈ అంటువ్యాధి బ్రిటన్లో ఇప్పటికే గరిష్ఠ స్థాయికి చేరుకొని ఉంటుందని అంటున్నారు శాస్త్రవేత్తలు. అమెరికాలోనూ ఇదే తరహాలో కేసులు ఒక్కసారిగా కిందకు దిగివస్తాయని చెబుతున్నారు.
ఈ కొత్త వేరియంట్ విస్తృతంగా సంక్రమిస్తోంది. వైరస్ మొట్టమొదట బయటపడ్డ దక్షిణాఫ్రికాలోనూ నెలన్నర వ్యవధిలోనే కేసులు విపరీతంగా వచ్చాయి. దాదాపు దేశ ప్రజలందరికీ వైరస్ సోకి ఉంటుందని వైద్య నిపుణులు అంటున్నారు. అక్కడ కొత్త కేసుల సంఖ్య కూడా తగ్గింది. ఇదే తరహాలో ఇతర దేశాల్లోనూ కేసులు తగ్గుముఖం పడతాయని వివరిస్తున్నారు.
''ఈ ఒమిక్రాన్ వేరియంట్ ఎంతలా విజృంభించిందో.. అదే స్థాయిలో కేసులు పతనం అవుతాయి. అమెరికాలో రోజువారీ కేసులు జనవరి 19 వరకు 1.2 మిలియన్లు ఉండొచ్చు. ఆ తర్వాత క్రమంగా పడిపోతాయి. అప్పటికే అవకాశం ఉన్నవాళ్లందరికీ వైరస్ సోకి ఉంటుంది.''
- అలీ మోక్దాద్, యూనివర్సిటీ ఆఫ్ వాషింగ్టన్ ప్రొఫెసర్
Corona Pandemic End: ఇదే సమయంలో కరోనా మహమ్మారి తదుపరి దశ ఎలా ఉంటుందనేదానిపై ఇంకా అనిశ్చితి నెలకొందని నిపుణులు వెల్లడించారు. రానున్న 2-3 వారాలు క్రూరంగా ఉండబోతోందని, కేసుల సంఖ్య విపరీతంగా పెరిగి.. ఐసీయూల్లో చేరే వారి సంఖ్య కూడా ఎక్కువగా ఉంటుందని అంటున్నారు.
COVID-19 cases rose by more than 50%
మరోవైపు... కరోనా వైరస్ కొత్త కేసులు గతవారంలో 50 శాతానికిపైగా పెరిగాయని ప్రపంచ ఆరోగ్య సంస్థ(డబ్ల్యూహెచ్ఓ) తన నివేదికలో తెలిపింది. ఒక్కవారంలోనే కోటీ 50 లక్షలకుపైగా కొత్త కేసులు వెలుగు చూశాయని, ఇది అంతకుముందు వారంతో పోలిస్తే సుమారు 55 శాతం ఎక్కువ అని పేర్కొంది. మరణాలు మాత్రం స్థిరంగా(43 వేలకుపైగా) నమోదవుతున్నాయని వెల్లడించింది.
ఒక్క ఆఫ్రికాలో తప్ప మిగతా అన్ని ప్రాంతాల్లోనూ కొత్త కొవిడ్ కేసుల సంఖ్య గణనీయంగా పెరుగుతుందని డబ్ల్యూహెచ్ఓ స్పష్టం చేసింది. ఆఫ్రికాలో మాత్రం 11 శాతం తగ్గుముఖం పట్టినట్లు గుర్తించింది.
Australia sees omicron surge
ఒకప్పుడు కొవిడ్ రహిత దేశంగా ఉన్న ఆస్ట్రేలియా.. ఇప్పుడు ఒమిక్రాన్ కేసుల ఉప్పెనను చూస్తోంది. కేసులు కొద్దిరోజులుగా తీవ్రస్థాయిలో పెరిగిపోతున్నాయి. దేశంలో ఇప్పుడు.. 6 లక్షలపైనే క్రియాశీల కేసులు ఉన్నట్లు అధికారిక లెక్కలు చెబుతున్నాయి. అనధికారికంగా ఈ సంఖ్య ఎక్కువే ఉండొచ్చని నిపుణులు హెచ్చరిస్తున్నారు.
ఒమిక్రాన్ను తేలిగ్గా తీసిపారేయడం, ప్రధాన నగరం న్యూసౌత్వేల్స్లో మాస్కులు తప్పనిసరి నిబంధనను ఎత్తివేయడం వంటివి వైరస్ వ్యాప్తిని పెంచాయని చెబుతున్నారు.
Russia on the verge of a new virus surge: Putin
కొత్త వేరియంట్ ఒమిక్రాన్తో.. రష్యా కరోనా కేసుల్లో మరో ఉద్ధృతి మొదలైందని చెప్పారు అధ్యక్షుడు వ్లాదిమిర్ పుతిన్. ప్రస్తుతం దేశం క్లిష్ట పరిస్థితుల్లో ఉందని, రష్యా ఉన్నతాధికారులతో నిర్వహించిన సమావేశంలో వ్యాఖ్యానించారు పుతిన్. ఆరోగ్య సంరక్షణ వ్యవస్థను బలోపేతం చేయాలని నొక్కిచెప్పారు.
ఇవీ చూడండి: కరోనా ప్రళయం- ప్రపంచవ్యాప్తంగా కొత్తగా 27 లక్షల మందికి వైరస్
