Omicron Antibodies: ఒమిక్రాన్, కరోనా ఇతర వేరియంట్లను నిరోధించే యాంటీబాడీలను శాస్త్రవేత్తలు గుర్తించారు. ఇవి కొన్ని నిర్దిష్ట ప్రాంతాలను లక్ష్యంగా చేసుకుని కరోనావైరస్ పరివర్తనం చెందకుండా పని చేస్తున్నట్లు తెలిపారు. ఈమేరకు అమెరికాకు చెందిన వాషింగ్టన్ స్కూల్ ఆఫ్ మెడిసిన్ శాస్త్రవేత్తలు పరిశోధన చేశారు. దీనికి సంబంధించిన వివరాలను నేచర్ జర్నల్లో ప్రచురించారు.
స్పైక్ ప్రోటీన్ లక్ష్యంగా చేసుకుని పోరాడే యాంటీబాడీలపై దృష్టి సారించడం ద్వారా వైరస్ నిరంతర పరిణామాన్ని అధిగమించేందుకు మార్గం సుగమవుతుందని పరిశోధకుల్లో ఒకరైన ప్రొఫెసర్ డేవిడ్ వీస్లర్ అన్నారు. ఈ పరిశోధన సమర్థమైన టీకాలు, యాంటీబాడీ చికిత్సలను రూపొందించడంలో దోహదపడుతుందన్నారు. తద్వారా ఒమిక్రాన్తో పాటు భవిష్యత్తులో ఉద్భవించే ఇతర కరోనా వేరియంట్లను సైతం ప్రభావంతంగా ఎదుర్కొవచ్చని అభిప్రాయపడ్డారు.
ఒమిక్రాన్.. స్పైక్ ప్రోటీన్‌లోని ఉత్పరివర్తనాల కూటమి కణాలతో ఎలా అంటిపెట్టుకుని ఉంటుంది? రోగనిరోధక వ్యవస్థను ఏవిధంగా ఏమారుస్తుంది? అనే ప్రధాన విషయాలు తెలుసుకునేందుకు ఈ పరిశోధన చేసినట్లు వీస్లర్ తెలిపారు. ఈ పరిశోధనకు వైరస్ మునపటి వేరియంట్లు సోకిన రోగులు, కొవిడ్ బారిన పడకముందు టీకా తీసుకున్నవారు, సోకిన తర్వాత టీకాలు వేసినవారి యాంటీబాడీలు ఉపయోగించారు. బూస్టర్ డోసు తీసుకున్నవారిలో ఒమిక్రాన్ వేరియంట్తో యాంటీబాడీలు ఏ మేరకు పోరాడాయో పరిశీలించారు. ఒమిక్రాన్ వేరియంట్.. ఏసీఈ2 గ్రాహకాలను సమర్థంగా బంధించగలదని పరిశోధనలో తేలింది.
పరిశోధనలో ముఖ్యాంశాలు
- ఒమిక్రాన్ను నిరోధించే సమర్థమైన నాలుగు రకాల యాంటీబాడీలను గుర్తించారు.
- ఇవి ప్రతి నాలుగు నిర్దిష్ట ప్రాంతాలకుగానూ ఒక ప్రాంతంలో ఒమిక్రాన్, ఇతర కొవిడ్ వేరియంట్లు లక్ష్యంగా పోరాడుతాయి.
- సోట్రోవిమాబ్ అనే యాంటీబాడీ.. ఒమిక్రాన్ను రెండు నుంచి మూడు రెట్లు తగ్గిస్తుంది. ఇవి కొవిడ్ వేరియంట్లలో ఉన్న స్పైక్ ప్రోటీన్‌లోని నాలుగు నిర్దిష్ట ప్రాంతాల్లో ఒకదానిని లక్ష్యంగా చేసుకుని పోరాడుతాయి.
- పలు కొవిడ్ వేరియంట్లు సురక్షితంగా ఉండే ప్రాంతాలను గుర్తించడం ద్వారా వాటిని యాంటీబాడీలు నిరోధిస్తాయి.
- కొవిడ్ సోకిన తర్వాత వ్యాక్సిన్ తీసుకోవడం వల్ల ఒమిక్రాన్ను సమర్థంగా ఎదుర్కొవచ్చు.
- బూస్టర్ డోసు ఒమిక్రాన్పై సమర్థంగా పని చేస్తుంది.
ఇదీ చూడండి: ప్రపంచంపై మరోసారి కరోనా పంజా- వారంలోనే 11% పెరిగిన కేసులు
