కరోనా కారణంగా గతంలో ఎన్నడూ చవిచూడని విపత్కర పరిస్థితిని ఎదుర్కొంటోంది అగ్రరాజ్యం అమెరికా. కరోనా కేసులలో ప్రపంచంలోనే ఇప్పుడు ప్రథమ స్థానంలో ఉంది. ప్రఖ్యాత న్యూయార్క్ నగరం వైరస్ వ్యాప్తికి కేంద్ర బిందువైంది. ఆ ప్రాంతంలో నమోదైన కేసుల సంఖ్య చైనా, బ్రిటన్ను దాటిందంటే పరిస్థితి ఏ స్థాయిలో ఉందో అర్థమవుతోంది.
కేసుల సంఖ్యలో వ్యత్యాసం ఇలా..
- చైనా- 82,160
- బ్రిటన్- 84,279
- న్యూయార్క్- 1,88,694
న్యూయార్క్లో కరోనా విజృంభణపై నగర మేయర్ బిల్ డి బ్లాసియో ఆందోళన వ్యక్తం చేశారు. గతవారం పరిస్థితి భయానకంగా ఉందని చెప్పారు. ఒక్క రోజే 5,695 కేసులు నమోదు కాగా, 758మంది మృతిచెందినట్లు న్యూయార్క్ గవర్నర్ అండ్రూ క్యూమో వెల్లడించారు. కొత్తగా నమోదవుతున్న కేసులు సంఖ్య కాస్త తగ్గినప్పటికీ ఐసీయూలో చేరుతున్న రోగుల సంఖ్య పెరుగుతున్నట్లు పేర్కొన్నారు.
త్వరలోనే పున:ప్రారంభం
కరోనా తీవ్రత ఇంకా తగ్గనప్పటికీ ఆసక్తికర వ్యాఖ్యలు చేశారు గవర్నర్ అండ్రూ. వీలైనంత త్వరగా ఆర్థిక వ్యవస్థను పునరుద్ధరించాలని భావిస్తున్నట్లు తెలిపారు. ప్రజలంతా ఇళ్లనుంచి బయటకు రావాలని, సాధారణ జీవనవిధానం తిరిగి పొందాలని కోరుకుంటున్నారని చెప్పారు. ప్రజల సంక్షేమం ముఖ్యమా, ఆర్థిక వ్యవస్థ ముఖ్యమా అంటే తనకూ రెండు ప్రధానమే అని వివరణ ఇచ్చారు. వైరస్ వ్యాప్తి తగ్గించేందుకు పటిష్ఠ చర్యలు చేపట్టనున్నట్లు స్పష్టం చేశారు గవర్నర్.
ప్రపంచవ్యాప్తంగా కరోనా కేసులు, మరణాల్లో అమెరికానే మొదటి స్థానంలో ఉంది. ఇప్పటి వరకు 5,60,433 పాజిటివ్ కేసులు నమోదు కాగా, 22,115 మంది ప్రాణాలు కోల్పోయారు.
ఇదీ చదవండి: కరోనాతో న్యూయార్క్ చెలగాటం- తప్పని భారీ మూల్యం!
