అమెరికా అంతరిక్ష సంస్థ నాసా తన ఆర్టెమిస్ మిషన్ కోసం రెండు నెక్స్ట్ జెనరేషన్ స్పేస్సూట్లను రూపొందించింది. ఇవాళ వాటిని వాషింగ్టన్లోని తన ప్రధాన కార్యాలయంలో ప్రదర్శించనుంది.
నాసా 2024 నాటికి తమ వ్యోమగాములను చంద్రునిపైకి పంపడానికి సన్నాహాలు చేస్తోంది. ఇందుకోసం రెండు స్పేస్సూట్లను రూపొందించింది. ఒకటి ఓరియన్ అంతరిక్ష నౌకలో ప్రయాణించడానికి, మరొకటి చంద్రుని దక్షిణ ధ్రువ ఉపరితలాన్ని అన్వేషించడానికి ఉపయోగపడుతుంది.
చంద్రుడు, అంగారక గ్రహం సహా ఇతర గమ్యస్థానాలకు చేరుకోవడానికి ఈ నూతన తరం స్పేస్సూట్లు ఉపకరిస్తాయని నాసా భావిస్తోంది.
ప్రత్యక్షప్రసారం
అమెరికాలో ఈ స్పేస్సూట్ల ప్రదర్శన కార్యక్రమం జరుగుతుంది. ఈడీటీ అండ్ ఫీచర్ నాసా పరిపాలనాధికారి జిమ్ బ్రిడెన్స్టైన్.. స్పేస్సూట్ ఇంజినీర్లతో కలిసి ఈ కార్యక్రమాన్ని నిర్వహిస్తారు. ఈ కార్యక్రమం నాసా టెలివిజన్, నాసా వెబ్సైట్లో ప్రత్యక్ష ప్రసారం అవుతుంది.
విక్రమ్ సంగతేంటి?
చంద్రయాన్-2 ల్యాండర్ విక్రమ్ ఆచూకీ గురించి అమెరికా అంతరిక్ష సంస్థ నాసా గుర్తించిందా? లూనార్ రికనైసెన్స్ ఆర్బిటర్ (ఎల్ఆర్ఓ) ల్యాండర్ విక్రమ్ను కనిపెట్టిందా? ఇస్రో శాస్త్రవేత్తలు, ఔత్సాహికులు ఆత్రుతగా ఎదురుచూస్తున్న విషయమిది. ఈ విషయంపై నాసా స్పందించే అవకాశం ఉంది.
సూర్యోదయం కోసం
నాసాకు చెందిన ఎల్ఆర్ఓ సెప్టెంబర్ 17న చంద్రుని విక్రమ్ ఢీకొన్న ప్రదేశాన్ని గుర్తించింది. హై రిజల్యూషన్ చిత్రాలను తీసి పంపించింది. అయితే అది చంద్రునిపై రాత్రి సమయం కావడం వల్ల ఎల్ఆర్ఓ కెమెరా.. విక్రమ్ను గుర్తించలేకపోయిందని నాసా తెలిపింది. అయితే అక్టోబర్ 14 నాటికి చంద్రునిపై పగటి సమయం అవుతుంది కనుక అప్పుడు ఎల్ఆర్ఓ సరైన చిత్రాలు తీసి, విక్రమ్ను గుర్తించడానికి వీలవుతుందని పేర్కొంది.
ఇదీ చూడండి: 60 ఏళ్ల వయస్సు... పడి పడి లేచే మనస్సు!
