Mexico road accident: మెక్సికోలోని చియాపాస్ రాష్ట్రంలో ఘోర రోడ్డు ప్రమాదం జరిగింది. రహదారిపై వలసదారులతో వెళ్తున్న ఓ ట్రక్కు బోల్తాపడి పాదచారుల వంతెనను ఢీ కొట్టింది. ఈ దుర్ఘటనలో 53 మంది వలసదారులు మరణించారు. 54 మంది గాయపడ్డారు.
Chiapas accident: క్షతగాత్రుల్లో 21 మంది తీవ్రంగా గాయపడ్డారని చియాపాస్ స్టేట్ సివిల్ ఢిఫెన్స్ ఆఫీస్ అధికారి లూయీస్ మాన్యూయెల్ మోరెనో తెలిపారు. వారందరినీ స్థానికంగా ఉన్న ఆస్పత్రికి తరలించినట్లు పేర్కొన్నారు. చియాపాస్ రాజధాని వైపు వెళ్లే ఓ రహదారిపై ఈ ప్రమాదం జరిగిందని వెల్లడించారు.
సామర్థ్యానికి మించి..
Mexico migrant truck crash: బాధితులంతా మధ్య అమెరికన్లుగా తెలుస్తోంది. అయితే.. కచ్చితంగా వారు ఏ దేశానికి చెందినవారనే వివరాలు ఇంకా అధికారులు ధ్రువీకరించలేదు. ఈ ప్రమాదంలో ప్రాణాలతో బయటపడ్డ కొంతమంది తాము గ్వాటెమాలా దేశస్థులమని తెలిపారని మాన్యూయెల్ మోరెనో తెలిపారు. ట్రక్కు సామర్థ్యానికి మించి జనం ప్రయాణించడం కారణంగానే ఈ ప్రమాదం జరిగినట్లు భావిస్తున్నామని పేర్కొన్నారు.
రక్తం కారుతున్నా పరుగులు...
ఘటనా సమయంలో ట్రక్కులో 107 మంది ఉన్నట్లుగా తెలుస్తోంది. ప్రమాద సమాచారం తెలుసుకున్న వెంటనే సహాయక సిబ్బంది ఘటనాస్థలికి చేరుకున్నారు. క్షతగాత్రులను ఆస్పత్రులకు తరలించారు. అయితే... ఇమ్మిగ్రేషన్ ఏజెంట్స్కు భయపడిన కొంతమంది వలసదారులు భయంతో ప్రమాదం జరిగిన వెంటనే పారిపోయారని సహాయక సిబ్బంది ఒకరు తెలిపారు. ఘటనాస్థలి నుంచి పరుగులు తీసిన బాధితుల్లో చాలా మందికి గాయాల కారణంగా రక్తం కారుతోందని ఓ వైద్యుడు తెలిపారు. అయినప్పటికీ వైద్యం చేయించుకోకుండానే పరారయ్యారని పేర్కొన్నారు.
గ్వాటెమాలా అధ్యక్షుడి విచారం..
ఈ ప్రమాదంపై గ్వాటెమాలా అధ్యక్షుడు అలెజాండ్రో గియామ్మట్టే ట్విట్టర్ వేదికగా విచారం వ్యక్తం వేశారు. బాధితుల కుటుంబాలకు సంతాపం తెలిపారు. బాధితులను స్వదేశానికి తరలించడం సహా తగిన సహాయం తాము చేస్తామని ప్రకటించారు.
ఇదీ చూడండి: కుమార్తె పుట్టినరోజునే విషాదం- దొంగల కాల్పుల్లో తండ్రి మృతి
ఇదీ చూడండి: 'నయాగరా'లో పడిన కారు.. ఆమెను కాపాడేందుకు భారీ అడ్వెంచర్
