'కమల'​ను అధికారికంగా నామినేట్​ చేసిన డెమొక్రాట్లు

భారత సంతతి వ్యక్తి కమలా హ్యారిస్​​ను అమెరికా ఉపాధ్యక్ష అభ్యర్థిగా అధికారికంగా నామినేట్​ చేసింది డెమొక్రటిక్​ పార్టీ. ఒక ప్రధాన పార్టీ నుంచి అమెరికా రెండో అత్యున్నత పదవికి తొలిసారి నామినేట్​ అయిన భారత, ఆఫ్రికన్​ సంతతి వ్యక్తిగా చరిత్ర సృష్టించారు కమల. ఈ సందర్భంగా జాత్యహంకారంపై కీలక వ్యాఖ్యలు చేశారు.

అమెరికా ఉపాధ్యక్ష అభ్యర్థిగా భారత సంతతి మహిళ కమలా హ్యారిస్​ను నామినేట్​ చేసింది డెమొక్రటిక్​ పార్టీ. బుధవారం వర్చువల్​గా జరిగిన డెమొక్రటిక్​ పార్టీ జాతీయ సమావేశం ఇందుకు వేదికైంది. పార్టీ నిర్ణయాన్ని అంగీకరిస్తున్నట్లు ప్రకటించారు కమల.

తొలిసారి ఈ పదవికి ఒక ప్రధాన పార్టీ నుంచి ఎంపికైన భారతీయ ఆఫ్రికన్​గా నిలిచారు కమల. నవంబర్​ 3న జరిగే అధ్యక్ష ఎన్నికల్లో కమలా హ్యారిస్​ గెలిచినట్లయితే.. అమెరికాకు తొలి మహిళా ఉపాధ్యక్షురాలిగా చరిత్ర సృష్టించనున్నారు.

జాత్యహంకారానికి వ్యాక్సిన్​ లేదు: కమల

తొలి ఆఫ్రికన్​-అమెరికన్​, దక్షిణాసియా మహిళగా ఒక ప్రధాన పార్టీ నుంచి ఉపాధ్యక్ష పదవికి నామినేట్​ అయిన సందర్భంగా కీలక వ్యాఖ్యలు చేశారు కమల​. అమెరికా కోసం ప్రాణాలర్పించిన ఆఫ్రికన్​-అమెరికన్లను గుర్తు చేసుకున్నారు. జాత్యహంకారానికి టీకా లేదని పేర్కొన్నారు. సమ న్యాయమే ప్రధాన అజెండాగా తమ పార్టీ పనిచేస్తుందని భరోసా ఇచ్చారు.

ఇదీ చూడండి: బైడెన్​ను అధికారికంగా నామినేట్ చేసిన​ డెమొక్రటిక్​ పార్టీ