కరోనా మహమ్మారి దేశ వైద్య సేవలపై తీవ్రమైన ప్రభావం చూపిన కారణంగా.. భారత్లో ఐదేళ్లలోపు చిన్నారుల మరణాలు గణనీయంగా పెరిగే అవకాశం ఉందని ఐక్యరాజ్య సమితి హెచ్చరించింది. గర్భిణీ మరణాలు సైతం పెరుగుతాయని ఆందోళన వ్యక్తం చేసింది.
ఆరు దక్షిణాసియా దేశాల్లో ఐదేళ్ల లోపు చిన్నారుల మరణాల సంఖ్య 2020లో 2,28,641గా నమోదయ్యే అవకాశం ఉందని ఐరాస తన నివేదికలో పేర్కొంది. భారత్లో ఈ మరణాలు అంతకుముందు ఏడాదితో పోలిస్తే 15 శాతం పెరిగి 1,54,020కి చేరుకుంటాయని అంచనా వేసింది. పాకిస్థాన్లో చిన్నారుల మరణాలు 14 శాతం అధికమై 59,251కి పెరుగుతాయని వెల్లడించింది.
'దక్షిణాసియాలో కరోనా మహమ్మారి ప్రత్యక్ష, పరోక్ష ప్రభావాలు' అనే పేరుతో యునిసెఫ్, డబ్ల్యూహెచ్ఓ, ఐరాస జనాభా నిధి(యూఎన్ఎఫ్పీఏ) సంయుక్తంగా ఈ నివేదిక రూపొందించాయి. అఫ్గానిస్థాన్, బంగ్లాదేశ్, భారత్, నేపాల్, శ్రీలంక దేశాల గణాంకాలతో ఈ నివేదిక తయారు చేశాయి.
ఇదీ చదవండి:
గర్భస్రావాలు-గర్భిణీ మరణాలు
దక్షిణాసియా దేశాల మహిళల్లో గర్భస్రావాలు కూడా పెరుగుతాయని నివేదిక హెచ్చరించింది. ఆరుదేశాల్లో 89,434 గర్భస్రావాలు సంభవించే అవకాశం ఉందని తెలిపింది. ఇందులో ఎక్కువ భాగం భారత్(60,179- 10 శాతం పెరుగుదల), పాకిస్థాన్(39,752- 11 శాతం పెరుగుదల), బంగ్లాదేశ్(5,502-3 శాతం పెరుగుదల)లోనే నమోదవుతాయని అంచనా వేసింది.
గర్భిణీ మరణాలు భారత్లో 18 శాతం పెరిగి 7,750గా నమోదయ్యే అవకాశం ఉందని తెలిపింది. సరైన గర్భనిరోధక పద్దతులను పాటించకపోవడం వల్ల 35 లక్షల అవాంఛిత గర్భాలు వచ్చే అవకాశం ఉందని తెలిపింది. ఇందులోనూ భారత్ వాటానే అధికమని స్పష్టం చేసింది.
కరోనా కేసులు- ఖర్చులు అధికం
2021 ఫిబ్రవరి నాటికి దక్షిణాసియాలో 12 మిలియన్ల కరోనా కేసులు వెలుగులోకి వస్తే.. అందులో 10.9 మిలియన్ కేసులు భారత్లోనే ఉన్నాయని నివేదిక తెలిపింది. కరోనా వల్ల ఈ ప్రాంతంలోని దేశాలకు 2.4 బిలియన్ డాలర్ల వ్యయం అయిందని నివేదిక పేర్కొంది. ఇందులో టెస్టింగ్ కోసం 1.9 బిలియన్ డాలర్లు, వైద్యసేవల వినియోగానికి 581 మిలియన్ డాలర్లు ఖర్చు అయినట్లు తెలిపింది.
కరోనా నియంత్రణ చర్యల స్థాయిని బట్టి.. ఈ వ్యయం ఇలాగే కొనసాగితే 2021 సెప్టెంబర్ నాటికి.. దక్షిణాసియా దేశాలు 8.1 బిలియన్ డాలర్లను కరోనా టెస్టులపై ఖర్చు చేసే అవకాశం ఉందని నివేదిక అంచనా వేసింది. వైద్య సేవల వినియోగంపై 520 మిలియన్ డాలర్ల నుంచి 2.4 బిలియన్ డాలర్లను వ్యయం చేసే అవకాశం ఉందని లెక్కగట్టింది. ఇందులో అధిక వాటా భారత దేశానిదేనని నివేదిక స్పష్టం చేసింది. 7.8 బిలియన్ డాలర్లను టెస్టింగ్ కోసం, 1.7 బిలియన్ డాలర్లను వైద్య సేవల వినియోగం కోసం భారత్ ఖర్చు చేస్తుందని అంచనా వేసింది.
ఇదీ చదవండి: కరోనాతో పేదరికంలోకి మరో 15 కోట్ల మంది పిల్లలు!
5 లక్షల మంది కొవిడ్కు బలి!
ఎపిడెమోలాజికల్ విధానాన్ని అనుసరించి.. కరోనా నియంత్రణ చర్యల్లో యథాతథ స్థితిని పరిగణనలోకి తీసుకుంటే.. దక్షిణాసియాలో అక్టోబర్ 2020 నుంచి సెప్టెంబర్ 2021 మధ్య 5 లక్షల మంది కొవిడ్కు బలయ్యే అవకాశం ఉందని నివేదిక తెలిపింది. ఇందులో అత్యధికంంగా 4.90 లక్షల మంది భారత్లోనే మరణిస్తారని వెల్లడించింది. ఆస్పత్రుల్లో చేరేవారి సంఖ్య కూడా ఇక్కడే అధికంగా ఉంటుందని తెలిపింది.
ఇతర దేశాలతో పోలిస్తే భారత్లో ఇటీవల కరోనా మరణాల సంఖ్య అనుకున్నదానికంటే వేగంగా పెరుగుతోందని ఆందోళన వ్యక్తం చేసింది. తెలివిగా లాక్డౌన్లు విధించడం, చేతులు శుభ్రంగా ఉంచుకోవడం, మాస్కులు ధరించడం వంటి జాగ్రత్తలు పాటిస్తే.. కొవిడ్ మరణాలు 83 శాతం మేర తగ్గుతాయని తెలిపింది. ఎలాంటి జాగ్రత్తలు తీసుకోకపోతే మరణాల సంఖ్య 2020 అక్టోబర్-2021 సెప్టెంబర్ మధ్య 491,117గా నమోదయ్యే అవకాశం ఉందని.. అన్ని జాగ్రత్తలు పాటిస్తే ఈ సంఖ్య 85,821కి పడిపోతుందని పేర్కొంది.
వ్యాధుల మరణాలు పెరిగి.. రోడ్డు ప్రమాదాలు తగ్గి..
టీబీ, మలేరియా, హెచ్ఐవీ/ఎయిడ్స్, టైఫాయిడ్ వంటి వ్యాధుల వల్ల తలెత్తే మరణాలు సైతం పెరుగుతాయని నివేదిక తెలిపింది. అయితే రోడ్డు ప్రమాదాల వల్ల ఏర్పడే మరణాలు ఇదే స్థాయిలో తగ్గుముఖం పడతాయని వెల్లడించింది. 2019తో పోలిస్తే 2020లో 8,079 మేర తక్కువ ట్రాఫిక్ మరణాలు సంభవిస్తాయని నివేదిక తెలిపింది. భారత్లో వీటి సంఖ్య 4,145 మేర తగ్గుతుందని పేర్కొంది.
విద్యకు దూరం
కరోనాతో పాఠశాలల మూసివేత వల్ల.. దక్షిణాసియా దేశాల్లో 90 లక్షల మంది ప్రాథమిక, సెకండరీ స్థాయి విద్యార్థులు విద్యకు శాశ్వతంగా దూరమయ్యే అవకాశం ఉందని నివేదిక ఆందోళన వ్యక్తం చేసింది. భారత్లో ఈ సంఖ్య 70 లక్షలుగా ఉంటుందని లెక్కగట్టింది.
ఇదీ చదవండి: 'భారత్లో 24 కోట్ల విద్యార్థులపై కరోనా ప్రభావం'
తత్ఫలితంగా భవిష్యత్లో ఆర్థిక వ్యయాలు మరింత పెరుగుతాయని పేర్కొంది. భవిష్యత్ జీవితకాల సంపాదన 15-23 శాతం మేర తగ్గే ప్రమాదం ఉందని తెలిపింది. దీని వల్ల వచ్చే 45 ఏళ్లలో ఈ ప్రాంతానికి 63.5(భారత్లో 52.8) బిలియన్ డాలర్లు నష్టం చేకూరుతుందని అంచనా వేసింది.
ఈ ప్రాంతంలోని దేశాలు అత్యవసర సేవలను కొనసాగించేందుకే ప్రయత్నిస్తున్నాయని డబ్ల్యూహెచ్ఓ ఆగ్నేయాసియా డైరెక్టర్ డా. పూనమ్ ఖేత్రపాల్ సింగ్ తెలిపారు. ఈ సేవలకు అంతరాయం కలిగితే ఈ మరణాల ముప్పు మరింత పెరుగుతుందని అన్నారు.
ఇవీ చదవండి:
