అమెరికా వైమానిక దాడిపై ప్రపంచ దేశాలు మిశ్రమంగా స్పందించాయి. ఇరాన్ కీలక సైనికాధిపతి ఖాసీం సులేమానీ మరణం నేపథ్యంలో శాంతి, ఓర్పుతో మెలగాలని సూచించాయి. ఈ ఘటనపై అమెరికా అధ్యక్షుడు డొనాల్డ్ ట్రంప్ మద్దతుదారులు హర్షిస్తుండగా.. ప్రాంతీయ ఉద్రిక్తతలు పెరుగుతాయని పలువురు హెచ్చరిస్తున్నారు.
'అమెరికన్లకు చంపినందుకు ప్రతిఫలం'
"అద్భుతం.. అమెరికన్ పౌరులను చంపినందుకు, గాయపరిచినందుకు ఇదే ప్రతిఫలం."
- లిండ్సే గ్రహమ్, సెనేటర్
దుస్సాహసం: రష్యా
"సోలేమానీ హత్య.. పశ్చిమాసియాలో ఉద్రిక్తతలు పెంచే దుస్సాహసం. జాతీయ ప్రయోజనాల దృష్ట్యా దేశభక్తితో ఇరాన్ కోసం సోలేమానీ పాటుపడ్డారు. ఇరాన్ ప్రజలకు మా ప్రగాఢ సానుభూతిని తెలియజేస్తున్నాం."
- రష్యా విదేశాంగ శాఖ
ఉద్రిక్తతలు పెరుగుతాయి: పెలోసీ
సోలేమానీ హత్యతో హింసాత్మక పరిస్థితులు పెరిగే అవకాశం ఉందని అమెరికా ప్రతినిధుల సభాపతి నాన్సీ పెలోసీ అభిప్రాయపడ్డారు.
ఉద్రిక్తతలు పెరిగితే అమెరికాతో సహా ప్రపంచం ఏమీ చేయలేదని ఆ దేశ మాజీ ఉపాధ్యక్షుడు జో బిడెన్ పేర్కొన్నారు. ఉద్రిక్తతలు పెరిగేలా ట్రంప్ నిప్పు రాజేశారని విమర్శించారు బిడెన్.
సహనం పాటించాలి: చైనా
''అంతర్జాతీయ సంబంధాల్లో సైన్యం వినియోగాన్ని మేం ప్రతిసారి వ్యతిరేకించాం. రెండు వైపులా.. ముఖ్యంగా అమెరికా సహనంతో ఉండాలని కోరుతున్నాం. మరిన్ని ఉద్రిక్తతలు పెరగకుండా చర్యలు తీసుకోవాలి."
- జెంగ్ షువాంగ్, చైనా విదేశాంగ శాఖ ప్రతినిధి
'ప్రపంచానికి మరింత ప్రమాదం'
"ప్రపంచాన్ని మరింత ప్రమాదంలోకి నెట్టేశాం. ఈ విషయంలో ఫ్రాన్స్ అధ్యక్షుడు ఇమ్మాన్యుయేల్ మేక్రాన్.. ఇరువర్గాలతో సంప్రదిస్తారు. ఇలాంటి ఘటనల ద్వారా ఉద్రిక్తతలు పెరిగే అవకాశం ఉంటుంది. కానీ, ఇందుకు భిన్నంగా పరిస్థితులు మారాలని కోరుతున్నాం. ప్రపంచంలో శాంతి, స్థిరత్వం పెరగాలని ఫ్రాన్స్ కృషి చేస్తుంది."
-ఎమెలీ ది మోంట్చాలిన్, ఫ్రాన్స్ తరఫు ఐరోపా మంత్రి
పిరికిపంద చర్య: సిరియా
అమెరికా చర్యపై సిరియా ప్రభుత్వం తీవ్ర స్థాయిలో మండిపడింది. పశ్చిమాసియాలో చమురు సంక్షోభాన్ని పెంచేందుకు అమెరికా ప్రయత్నిస్తోందని ఆరోపించింది.
"అమెరికా చేసిన దాడి పిరికిపంద చర్య. ఇలాంటి చర్యల ద్వారా మరణించిన నేతల అడుగుజాడల్లో నడిచేవారి సంఖ్య పెరుగుతుంది."
-సిరియా విదేశాంగ శాఖ
ఇదీ చూడండి: ఖాసీం మృతితో అమెరికా-ఇరాన్ మధ్య యుద్ధమేఘాలు!
