విమానయాన సంస్థ యునైటెడ్ ఎయిర్లైన్స్కు చెందిన బోయింగ్ 777 విమానాలను సమీక్షించాలని ఆ సంస్థకు అమెరికా ఫెడరల్ ప్రభుత్వం ఆదేశాలు జారీ చేసింది. ఇంజిన్ సమస్యలతో శనివారం ఓ బోయింగ్ 777 విమానం అత్యవసరంగా ల్యాండ్ అయిన నేపథ్యంలో ఈ నిర్ణయం తీసుకుంది. ప్రమాదానికి గురైన ఇంజిన్ పోలి ఉన్న విమానాలను క్షుణ్ణంగా పరిశీలించాలని స్పష్టం చేసింది.
"విమానం ఇంజిన్కు సంబంధించిన ఫ్యాన్లలో రెండు విరిగిపోయాయి. మిగతావి స్వల్పంగా దెబ్బతిన్నాయి. అయితే ఈ ఘటనపై ఇప్పుడే ఓ అంచనాకు రావడం సరికాదు. అమెరికా విమానయాన సంస్థల్లో యునైటెడ్ ఎయిర్లైన్స్ మాత్రమే వైట్నీ పీడబ్ల్యూ 4000 ఇంజిన్ విమానాలను వినియోగిస్తోంది. కాక్పిట్ వాయిస్ రికార్డర్, ఫ్లైట్ డేటా రికార్డర్లను వాషింగ్టన్లోని ల్యాబ్కు తరలించాము."
-జాతీయ రవాణా భద్రతా బోర్డు, అమెరికా
ఈ ఘటనలో దర్యాప్తునకు సహకరిస్తామని యునైటెడ్ ఎయిర్లైన్స్ తెలిపింది. ప్రస్తుతం ఈ రకమైన విమాన సేవలను తాత్కాలికంగా నిలిపివేస్తున్నట్లు ప్రకటించింది. 'ప్రభుత్వ సూచనలు అనుసరించి మరిన్ని జాగ్రత్తలు తీసుకుని సేవల పునరుద్ధరణకు కృషి చేస్తాం,' అని పేర్కొంది.
ఇదీ జరిగింది..
యూనైటెడ్ ఎయిర్లైన్స్కు చెందిన బోయింగ్ 777 విమానం శనివారం ప్రమాదానికి గురైంది. ప్రాట్ అండ్ వైట్నీ పీడబ్ల్యూ 4000 ఇంజిన్తో నడిచే ఈ విమానంలో కుడివైపు ఉన్న ఇంజిన్లో పేలుడు సంభవించింది. దీంతో కొలరాడోలోని డెన్వర్ అంతర్జాతీయ విమానాశ్రయం వద్ద అత్యవసర ల్యాండింగ్ చేశారు. ఆ సమయంలో ఫ్లైట్లో 231 మంది ప్రయాణికులు, 10 మంది సిబ్బంది ఉన్నారు. అదృష్టతవశాత్తు ప్రయాణికులు, సిబ్బంది క్షేమంగా బయటపడ్డారు. అయితే విమానం గాల్లో ఉన్నప్పుడు.. దాని నుంచి వస్తువులు కిందపడ్డాయి. దీనికి సంబంధించిన దృశ్యాలు సామాజిక మాధ్యమాల్లో వైరల్గా మారాయి.
ఇదీ చదవండి : విమాన ప్రయాణం మరింత భారం
