ప్రపంచానికే పెనుముప్పుగా మారిన కరోనా వ్యాప్తిని అరికట్టేందుకు అమెరికా, యూరప్, ఆసియా ఖండాల్లోని ఎన్నో దేశాలు లాక్డౌన్ను అమలు చేశాయి. అయితే ప్రస్తుతం కేసులు తగ్గుముఖం పడుతున్నందున చాలా దేశాల ప్రభుత్వాలు లాక్డౌన్ ఆంక్షలను సడలిస్తున్నాయి. ఈ నేపథ్యంలో రోజులు తరబడి ఇంట్లోనే ఉన్న ప్రజలు పర్యటక కేంద్రాలను సందర్శించేందుకు వరుస కడుతున్నారు. చైనాలో కేవలం రెండు రోజుల్లోనే దాదాపు 17లక్షల మంది బీజింగ్ పార్కుల్లో చక్కర్లు కొట్టారు.
అటు అమెరికన్లు కూడా.. "46 రోజులుగా ఇంట్లోనే ఉన్నాం ఇక చాలు" అన్న భావనను వినివిస్తున్నారు. న్యూయార్క్ నగరంలోని సెంట్రల్ పార్కు.. ఉదయం వ్యాయామం, జాగింగ్ చేసేవారితో నిండిపోయింది. న్యూజెర్సీలోనూ ఎన్నో పార్కులు సందర్శకులతో కళకళలాడుతున్నాయి.
మార్చి 14 నుంచి ఇళ్లకే పరిమితమైన స్పెయిన్ వాసులు.. శనివారం మొట్టమొదటిసారిగా వీధుల్లో సందడి చేశారు.
సింగపూర్లో రోజువారీ కేసులు భారీగా పెరుగుతున్నాయి. కొత్తగా 657 మందికి వైరస్ పాజిటివ్గా తేలినందున.. సింగపూర్లో మొత్తం కేసుల సంఖ్య 18,205కు చేరింది. అయినప్పటికీ మే 12 నుంచి కొన్ని వాణిజ్య కార్యకలాపాలను తిరిగి ప్రారంభించాలని అక్కడి ప్రభుత్వం యోచిస్తోంది.
మే 11 నుంచి ప్రభుత్వ, ప్రైవేటు రంగాలు కార్యకలాపాలు ప్రారంభించాలని శ్రీలంక ప్రభుత్వం ఇప్పటికే ఆదేశించింది.
చైనాలో శనివారం 14 కేసులు
కరోనా పుట్టుకకు కేంద్ర బిందుమైన చైనాలో వైరస్ కేసులు తగ్గుముఖం పడుతున్నాయి. ఇప్పటికే అక్కడ రోజువారీ కరోనా కేసుల సంఖ్య గణనీయంగా తగ్గగా.. శనివారం 14 కొత్త కేసులు నిర్ధరణ అయినట్లు ఆ దేశ జాతీయ ఆరోగ్య కమిషన్ (ఎన్హెచ్సీ) ప్రకటించింది. ఇందులో ఇద్దరిలో మాత్రమే కొవిడ్-19 లక్షణాలున్నట్లు గుర్తించామని.. ఓ వ్యక్తి స్థానికుడు కాగా.. మరో వ్యక్తి విదేశాల నుంచి వచ్చాడని ఎన్హెచ్సీ పేర్కొంది. మిగతా 12 మందిలో లక్షణాలేమీ కనిపించనప్పటికీ.. వారికి వైరస్ పాజిటివ్గా తేలినట్లు వెల్లడించింది. కరోనాతో కొత్తగా ఎవరూ మరణించలేదని స్పష్టం చేసింది.
కొత్తగా వైరస్ సోకిన 14 మందితో కలిపి చైనాలో ఇప్పటివరకు మొత్తం 82,877 మందికి కరోనా పాజిటివ్గా తేలింది. 4,633 మంది ప్రాణాలు కోల్పోయారు. 77,713 మంది మహమ్మారి బారి నుంచి పూర్తిగా కోలుకున్నారు. ఆ దేశంలో ప్రస్తుతం 531 యాక్టివ్ కేసులు మాత్రమే ఉన్నాయి.
'6 నెలల నుంచి ఏడాది పాటు సహజీవనం'
పాకిస్థాన్లో గడిచిన 24 గంటల్లో 989 మందికి కరోనా పాజిటివ్గా తేలింది. వీటితో కలిపి పొరుగుదేశంలో మొత్తం కొవిడ్-19 కేసులు 19వేలు దాటాయి. పాకిస్థాన్లో ఇప్పటివరకు 19,103 మందికి వైరస్ సోకగా.. 440 మంది మరణించారు. 4,817 మంది వైరస్ బారినుంచి కోలుకున్నారు.
దేశంలో పెరుగుతున్న కేసులపై స్పందించారు పాక్ ప్రధాని ఇమ్రాన్ఖాన్. "వ్యాక్సిన్ ఎప్పుడొస్తుందో తెలియదు. మరో 6 నెలల నుంచి ఏడాదిపాటు వైరస్తో సహజీవనం చేయక తప్పదు" అని వ్యాఖ్యానించారు.
