చలికి తట్టుకోలేక నలుగురు భారతీయులు మృతి.. జైశంకర్​ దిగ్భ్రాంతి

అమెరికా-కెనడా సరిహద్దుల్లో ఓ పసికందు సహా మొత్తం నలుగురు భారతీయులు చలికి తట్టుకోలేక ప్రాణాలు కోల్పోయారు. ఈ ఘటనపై దిగ్భ్రాంతి వ్యక్తం చేసిన విదేశాంగ మంత్రి జైశంకర్​... అమెరికా, కెనడాల్లోని భారత రాయబారులతో మాట్లాడారు. ఘటనపై అత్యవసరంగా స్పందించాలని సూచించారు. ఈ ఘటనకు సంబంధం ఉన్న ఓ వ్యక్తిని అరెస్ట్​ చేశారు అమెరికా పోలీసులు.

మనుషుల అక్రమ రవాణా కారణంగా ఓ పసికందు సహా నలుగురు భారతీయులు చలికి తట్టుకోలేక ప్రాణాలు కోల్పోయిన హృదయవిదారక ఘటన అమెరికా-కెనడా సరిహద్దుల్లో జరిగింది. చలి తీవ్రత ఎక్కువగా ఉన్న సమయాల్లో సరిహద్దులను దాటేందుకు ప్రయత్నిచంగా వీరు ప్రాణాలు కోల్పోయినట్లు అధికారులు పేర్కొన్నారు. ఈ ఘటనపై దిగ్భ్రాంతి వ్యక్తం చేశారు భారత విదేశాంగ మంత్రి ఎస్​ జైశంకర్​. అమెరికా, కెనడాలోని భారత రాయబారులతో మాట్లాడారు. అక్కడి పరిస్థితులపై తక్షణం స్పందించాలని సూచించారు.

మృతుల్లో ఓ పసికందు సహా ఇద్దరు మైనర్లు ఉన్నట్లు మనిటోబా రాయల్​ కెనడియన్​ మౌంటెడ్​ పోలీసులు తెలిపారు. ఎమెర్సన్​కు సమీపంలో అమెరికా- కెనడా సరిహద్దులో కెనడా వైపున నలుగురి మృతదేహాలకు గడ్డకట్టుకుపోయిన లభించినట్లు చెప్పారు.

" కెనడా-యూఎస్​ సరిహద్దులో ఓ పసికందు సహా నలుగురు భారతీయులు ప్రాణాలు కోల్పోయిన ఘటన దిగ్భ్రాంతికి గురి చేసింది. అమెరికా, కెనడాలోని మన రాయబారులు వెంటనే స్పందించాలని సూచించాం. "

- జైశంకర్​, విదేశాంగ మంత్రి.

అమెరికా రాయబారి తరణ్​జిత్​ సంధు, కెనడాలోని ఇండియన్​ హైకమిషనర్​ అజయ్​ బిసారియాతో జైశంకర్​ మాట్లాడినట్లు విదేశాంగ శాఖ తెలిపింది.

ఓ వ్యక్తి అరెస్ట్​..

మానవ అక్రమ రవాణాకు పాల్పడుతున్నాడనే ఆరోపణలతో ఈ ఘటనకు సంబంధం ఉన్న 47 ఏళ్ల స్టీవ్​ శాండ్​ అనే వ్యక్తిని అరెస్ట్​ చేసినట్లు మిన్నెసోటా జిల్లాకు చెందిన అమెరికా అటార్నీ కార్యాలయం వెల్లడించింది. భారత్​కు చెందిన ఇద్దరితో కలిసి ఓ కారులో వస్తుండగా శాండ్​ను పట్టుకున్నట్లు తెలిపింది. వాహనంలో ప్లాస్టిక్​ కప్పులు, బాటిళ్లలో నీరు, పళ్ల రసం, స్నాక్స్​ ఉన్నట్లు గుర్తించారు. ముగ్గురిని బోర్డర్​ పెట్రోల్​ స్టేషన్​కు తరలించారు అధికారులు. ఐదుగురు భారతీయులు నడుచుకుంటూ వెళ్తున్నట్లు గుర్తించామన్నారు.

ఇదీ చూడండి: జైలుపై వైమానిక దాడి.. 100మంది ఖైదీలు మృతి