కరోనా మహమ్మారి(CORONA VIRUS) ఉత్పరివర్తనం చెందుతూ యావత్ ప్రపంచాన్ని వణికిస్తోంది. వివిధ రకాల వేరియంట్లతో ఏ ఔషధం పనిచేస్తుందో తెలియని గందరగోళం నెలకొంది. ఈ క్రమంలో తీవ్రమైన కొవిడ్-19(COVID-19)ను నిరోధించే అత్యంత సమర్థమైన ఔషధాన్ని గుర్తించారు శాస్త్రవేత్తలు. ఈ డ్రగ్.. శ్వాసకోశాలపై ప్రభావం చూపుతోన్న ఇతర కరోనా వేరియంట్ల(Corona variants)ను సైతం అడ్డుకుంటున్నట్లు నిర్ధరించారు. సార్స్-కోవ్-2 బారినపడి తీవ్రంగా ప్రభావితమైన ఎలుకలపై పరిశోధన చేసి తేల్చారు.
ఈ డ్రగ్పై చేసిన అధ్యయనం జర్నల్ సైన్స్ ఇమ్యూనోలజీలో ప్రచురితమైంది. ఆ ఔషధమే డి-ఏబీజెడ్ఐ. శరీరంలోని సహజమైన రోగనిరోధక వ్యవస్థను మేల్కొలిపి.. వైరస్పై స్పందించేలా చేస్తోందని పేర్కొన్నారు శాస్త్రవేత్తలు.
" రోగనిరోధక ప్రతిస్పందనను ఒకే మోతాదుతో మేల్కొలపటం.. వైరస్ను నియంత్రించటానికి మంచి వ్యూహమని ఈ అధ్యయనం చెబుతోంది. ప్రపంచాన్ని ఆందోళనకు గురిచేసిన దక్షిణాఫ్రికా రకం వైరస్ బి.1.351పైనా ఇది ప్రభావవంతంగా పనిచేస్తోంది. సార్స్-కోవ్-2 వ్యాప్తిని అడ్డుకునేందుకు సమర్థమైన యాంటీవైరల్స్ను అభివృద్ధి చేయటం ప్రస్తుతం అత్యవసరం. ముఖ్యంగా ప్రమాదకరమైన వేరియంట్లు పుట్టుకొస్తున్న ఈ సమయంలో చాలా అవసరం."
- సారా చెర్రి, పెన్సిల్వేనియా వర్సిటి ప్రొఫెసర్
సార్స్-కోవ్-2 సోకిన మానవ ఊపిరితిత్తుల కణాలను పరిశీలించటం ద్వారా పరిశోధకులు తొలుత వైరస్ ప్రభావాన్ని బాగా అర్థం చేసుకునేందుకు ప్రయత్నించారు. వైరస్లు దాగి ఉండగలవని, రోగనిరోధక వ్యవస్థ ముందుగా గుర్తించి, స్పందించటంలో ఆలస్యం అయ్యేలా చేయగలుగుతున్నట్లు గుర్తించారు. ఈ క్రమంలోనే కొవిడ్ను ముందుగానే గుర్తించి నిరోధించేందుకు రోగనిరోధక వ్యవస్థను అలర్ట్ చేసే ఔషధాన్ని గుర్తించొచ్చని అంచనాకు వచ్చారు. ఇందుకోసం ఊపిరితిత్తుల కణాలను ఉత్తేజితం చేసే 75 ఔషధాలను పరిశీలించారు. అందులో 9 డ్రగ్స్ సమర్థంగా ఉన్నట్లు గుర్తించారు. కొత్తగా అభివృద్ధి చేసిన డ్రగ్ డీ-ఏబీజెడ్ఐని పరీక్షించారు. ప్రస్తుతం ఈ ఔషధం కేన్సర్ చికిత్స కోసం క్లినికల్ ట్రయల్స్లో ఉంది.
ఇదీ చూడండి: ఇలా అయితే.. కొవిడ్-26, కొవిడ్-32 తప్పవు!
