సిగార్.. చూడటానికి చుట్టలాగా కనిపిస్తుంది. దాన్ని చూడగానే క్యూబాలో విప్లవాన్ని రగిలించిన చెగువేరా, ఫిడెల్ కాస్ట్రోలు గుర్తుకొస్తారు. సిగార్ ఆ దేశ ప్రజలకు ఎంతో ప్రియమైనది. అక్కడ ఉత్పత్తి అయ్యే సిగార్లకు విపరీతమైన డిమాండ్ ఉంటుంది. ఈ నేపథ్యంలో ప్రపంచ వ్యాప్తంగా ఉన్న పొగాకు అభిమానుల కోసం క్యూబా రాజధాని హవానాలో అతి పెద్ద సిగార్ల ప్రదర్శనను నిర్వహిస్తున్నారు. ఫిబ్రవరి 24న ప్రారంభమైన ఈ ప్రదర్శన.. ఫిబ్రవరి 28 వరకు కొనసాగనుంది.
22వ హెబనాస్ ఫెస్టివల్గా పిలిచే ఈ కార్యక్రమంలో.. ప్రఖ్యాతి గాంచిన సిగార్ బ్రాండ్లు దర్శనమిస్తున్నాయి. రోమియో వై జూలియటా, మాంటెక్రిస్టో, బోలివర్ వంటి అరుదైన సిగార్ బ్రాండ్లు ఇక్కడ కనిపిస్తున్నాయి.
అలాగే పార్టగాస్ బ్రాండ్ 175వ వార్షికోత్సవ సందర్భంగా.. ప్రత్యేక సిగార్లను ప్రదర్శించింది ఆ కంపెనీ. సిగార్ బ్రాండ్స్లో ఎంతో ప్రఖ్యాతి గాంచిన హెబనాస్.. ఈ ఏడాది రెండు సరికొత్త ఉత్పత్తులను మార్కెట్లోకి తీసుకురానుంది.
ఈ కార్యక్రమానికి సుమారు 60 దేశాల నుంచి అనేక మంది ఔత్సాహికులు హాజరవుతున్నారు.
వీటి డిమాండే వేరు గురూ..!
క్యూబాలో తయారయ్యే సిగార్లకు ఆసియా, పశ్చిమాసియా, ఐరోపా ఖండాల్లో విపరీతమైన డిమాండ్ ఉంది. ఒక్క అమెరికాలోనే ఏడాదికి 250 మిలియన్ల డాలర్ల విలువైన క్యూబన్ సిగార్లు అమ్ముడవుతాయని నిపుణులు అంచనా వేస్తున్నారు. అయితే ఈ ఉత్పత్తులపై అమెరికా వాణిజ్య ఆంక్షలు విధించింది.
