కరోనా వైరస్తో ప్రపంచం గడగడలాడుతోంది. ప్రపంచ దేశాలు తీవ్రంగా శ్రమిస్తున్నప్పటికీ.. వైరస్ను కట్టడి చేయలేకపోతున్నాయి. అయితే ఓ బయో ఉగ్రవాద దాడి జరిగితే.. పరిస్థితులు ఎలా ఉంటాయో తాజా పరిణామాల నుంచి అవగాహన పొందొచ్చని అభిప్రాయపడ్డారు ఐక్యరాజ్య సమితి ప్రధాన కార్యదర్శి ఆంటోనియో గుటెరస్. దుష్ట శక్తులు ఇలాంటి వైరస్ను ఓ ఆయుధంగా ఉపయోగించుకునే ప్రమాదముందని ఆవేదన వ్యక్తం చేశారు.
"ఈ మహమ్మారి ప్రపంచ దేశాల్లో ఉన్న బలహీనతలు, సంసిద్ధతలో ఉన్న లోపాలను బయటపెట్టింది. ఓ బయో ఉగ్ర దాడి జరిగితే పరిస్థితులు ఎలా ఉంటాయో చెప్పడానికి ప్రస్తుత పరిస్థితులు చాలు. దుష్టశక్తుల చేతిలో ఇలాంటి వైరస్ పడితే.. ప్రపంచంలో విధ్వంసం తప్పదు."
-- ఆంటోనియో గుటెరస్, ఐరాస ప్రధాన కార్యదర్శి.
ఉగ్రవాదుల నుంచి ఇప్పటికీ ప్రమాదం పొంచి ఉందని గుటెరస్ అభిప్రాయపడ్డారు. మహమ్మారితో పోరాటానికి ప్రభుత్వాలు శ్రమిస్తుంటే.. ఇదే అదనుగా ముష్కరులు చెలరేగిపోయే అవకాశముందని హెచ్చరించారు.
వివిధ మానవ హక్కులు, శరణార్థులు, బడుగు బలహీన వర్గాలకు ఈ వైరస్ సవాళ్లు విసురుతోందని అభిప్రాయపడ్డారు గుటెరస్.
యూఎన్ఎస్సీ సమావేశం...
కరోనా మహమ్మారిపై చర్చించేందుకు ఐక్యరాజ్య సమితి భద్రతా మండలి(యూఎన్ఎస్సీ) తొలిసారి సమావేశమైంది. ఇలాంటి పరిస్థితుల్లో ఐక్యమత్యంగా ఉంటూ.. వైరస్ బాధితులకు అండగా నిలవాల్సిన అవసరం ఉందని అభిప్రాయపడింది. తాజా పరిస్థితులను గుటెరస్ మండలి సభ్యులకు వివరించారు. ప్రాణాంతక మహమ్మారిపై గుటెరస్ నేతృత్వంలో జరుగుతున్న పోరుకు మద్దతుగా నిలవాలని మండలి సభ్యులు నిర్ణయించారు.
ఇదీ చూడండి:- కరోనాతో పేదరికంలోకి 50 కోట్ల మంది ప్రజలు!
