అమెరికా అధ్యక్షుడు డొనాల్డ్ ట్రంప్ ఏ నిర్ణయం తీసుకున్నా సంచలనమే. తాజాగా హెచ్-1బీ, ఎల్-1 వీసాలు నిలిపివేస్తున్నట్టు ఆయన చేసిన ప్రకటన కూడా సర్వత్రా చర్చనీయాంశమైంది. ఈ నేపథ్యంలో వీసా వ్యవహారంపై నెలకొన్న ప్రధాన ప్రశ్నలకు సమాధానాలు...
హెచ్-1బీ, ఎల్-1 వీసా అంటే ఏంటి?
అమెరికాలో ప్రత్యేక వృత్తుల్లో తాత్కాలికంగా పని చేయడానికి వీలు కల్పించేవే ఈ హెచ్-1బీ, ఎల్-1 వీసాలు.
ట్రంప్ తీసుకున్న నిర్ణయమేంటి?
అమెరికాలో పనిచేయాలనుకునే విదేశీయులకు సంబంధించిన ఇంత ముఖ్యమైన వీసాల జారీని ఈ ఏడాది చివరి వరకు నిలిపివేస్తున్నట్టు ట్రంప్ ప్రకటించారు.
ఎందుకీ నిర్ణయం?
కరోనా సంక్షోభం వల్ల అనేక మంది అమెరికన్లు ఉద్యోగాలు కోల్పోయారు. వారికి అండగా నిలవడం కోసమే ఈ నిర్ణయం తీసుకున్నట్టు వెల్లడించారు ట్రంప్.
దీని వల్ల అమెరికాకు లాభముంటుందా?
హెచ్-1బీ, ఎల్-1 వీసాల రద్దుతో అమెరికావ్యాప్తంగా 5,25,000 వరకు ఉద్యోగాలు ఖాళీ అవుతాయని, అవన్నీ స్థానికులకే వస్తాయని సీనియర్ అధికారులు అంచనా వేస్తున్నారు.
విధానాల్లోనూ మార్పులుంటాయా?
నిజానికి ఈ హెచ్-1బీ వీసా కోసం ఇప్పటివరకు లాటరీ విధానం అమల్లో ఉంది. తాజాగా దాన్ని రద్దు చేసి నైపుణ్యం ఆధారంగా వీసాలు అందివ్వాలని అధికారులకు ఆదేశించారు ట్రంప్.
భారతీయులపై ప్రభావం ఉంటుందా?
అమెరికా ఏటా జారీ చేసే 85వేల వీసాల్లో 70శాతం భారతీయ ఐటీ నిపుణులకే దక్కుతాయి. ఈ నేపథ్యంలో హెచ్-1బీని నిలిపివేస్తూ ట్రంప్ తీసుకున్న నిర్ణయంతో భారతీయులు తీవ్రంగా నష్టపోనున్నారు. అక్టోబర్ 1 నుంచి ప్రారంభమయ్యే ఆర్థిక సంవత్సరానికి ఇప్పటికే జారీ చేసిన వీసాలపైనా ఈ ప్రభావం పడనుంది. అదే విధంగా వీసాను పునరుద్ధరించుకోవడానికి ఈ ఏడాది చివరి వరకు వేచి చూడక తప్పదు.
ట్రంప్ నిర్ణయంపై ఎవరేమన్నారు?
ట్రంప్ ప్రకటనపై సర్వత్రా విమర్శలు ఎదురవుతున్నాయి. ముఖ్యంగా కార్పొరేట్ ప్రపంచం తీవ్రంగా మండిపడింది. అధ్యక్షుడి నిర్ణయంతో ఆర్థిక వృద్ధి మందగిస్తుందని, పెట్టుబడులు తరలిపోతాయని, ఉద్యోగ కల్పన ఉండదని అభిప్రాయపడింది.
"దేశంలోకి వచ్చే వలసదారులను నియంత్రించడానికి చేసే ప్రయత్నాల్లో భాగంగా ట్రంప్ ఈ నిర్ణయం తీసుకున్నారు. ఇంజనీర్లు, ఐటీ నిపుణులు, ఎగ్జిక్యూటివ్లు, వైద్యులు, నర్సులను దేశంలోకి అహ్వానించకపోతే.. అమెరికానే నష్టపోతుంది."
--- థామస్ డొనొహ్యు, యూఎస్ ఛాంబర్ ఆఫ్ కామర్స్ సీఈఓ
"అమెరికా ఆర్థిక వ్యవస్థ విజయంలో ఇమిగ్రేషన్ కీలక పాత్ర పోషించింది. ఇమిగ్రేషన్ వల్లే సాంకేతిక రంగంలో అమెరికా ప్రపంచస్థాయికి ఎదిగింది. గూగుల్ కంపెనీ కూడా ఈ స్థాయిలో ఉండటానికి కారణం అదే. ట్రంప్ నిర్ణయంతో నిరాశ చెందా. వలసదారులకు అండగా ఉంటాం. అందరికీ అవకాశం లభించేలా చూస్తాం."
-- సుందర్ పిచాయ్, గూగుల్ సీఈఓ
"హెచ్-1బీ వీసా సదుపాయంతో ఇన్నేళ్లు ఉత్తమమైన వారికి అవకాశం లభించింది. దీని వల్ల అమెరికా విజయవంతమైంది, మరింత దృఢంగా మారింది. విదేశీయుల ప్రతిభను గుర్తించడం అమెరికాకు ఉన్న శక్తి. అంతే కానీ అది బలహీనత కాదు!"
--- ఏ.జీ వెల్స్, అమెరికా విదేశాంగ శాఖ మాజీ ఉన్నతాధికారి.
"తాజా నిర్ణయంతో ట్రంప్ మరోసారి జాతి వివక్ష వైఖరిని ప్రదర్శించారు. అయితే వైఫల్యాలను కప్పిపుచ్చుకోవడానికి అధ్యక్షుడు చేపట్టే చర్యలు పనిచేయవు. వలసదారులకు ఆయన చేసిన అన్యాయాన్ని కోర్టులు అడ్డుకుంటాయి."
--- వనితా గుప్తా, ఎల్సీసీహెచ్ సీఈఓ.
"మనం ఇంకా ప్రపంచవ్యాప్త ఆరోగ్య, ఆర్థిక సంక్షోభంలోనే ఉన్నాం. ఉన్న వనరులను ఉపయోగించుకుని అమెరికాను బలపరిచే సమయం ఇది. కానీ ఈ నిషేధం వల్ల ఉద్యోగాలు, కుటుంబాలు, విశ్వవిద్యాలయాలు, ఆసుపత్రుల, సంఘాలు దెబ్బతింటాయి. ఆర్థిక వ్యవస్థ పునరుద్ధరణ మరింత ఆలస్యమవుతుంది."
--- జెన్నిఫర్ మినార్, అమెరికన్ ఇమ్మిగ్రేషన్ లాయర్స్ అసోసియేషన్ ప్రెసిడెంట్.
"ఇమ్మిగ్రేషన్ సంప్రదాయనికి ఇది ఓ మచ్చ. అందరం ఐకమత్యంతో ఉండి అధ్యక్షుడి చర్యను వ్యతిరేకించాలి. వలసదారులపై ఆయన చూపిస్తున్న వివక్షను అడ్డుకోవాలి."
-- బెర్త్ వెర్లిన్, అమెరికన్ ఇమ్మిగ్రేషన్ కౌన్సిల్ ఎగ్జిక్యూటివ్.
అధ్యక్ష ఎన్నికలపై హెచ్1బీ వీసాల వ్యవహారం ఎలాంటి ప్రభావం చూపిస్తుందన్నది ప్రశ్నార్థకం.
