భారత్ సహా పలు దేశాల కీలక సమాచారాలను అమెరికా కేంద్ర నిఘా సంస్థ (సీఐఏ) దశాబ్దాలుగా సేకరిస్తోందని ఓ అమెరికన్ వార్తాపత్రిక ఆరోపించింది. స్విట్జర్లాండ్కు చెందిన ఓ కంపెనీ సాయంతో వివిధ దేశాల రహస్య సందేశాలను అమెరికా చదువుతోందని తెలిపింది.
అనుసంధానం, సమాచార భద్రత కోసం క్రిప్టో ఏజీని 1940లో స్థాపించారు. తమ గూఢచారులు, సైనికులు, దౌత్య రహస్యాలను కాపాడేందుకు ఈ సంస్థ సేవలను చాలా దేశాల ప్రభుత్వాలు పొందుతున్నాయి. ఆయా రంగాల్లో సమాచారం కోసం వాడే కోడ్ సందేశాలను ఇతర దేశాలు చూడకుండా ఈ సంస్థ అడ్డుకుంటుంది. కానీ... ఈ సంస్థ ద్వారానే అమెరికా గూఢచర్యం సాగిస్తుందన్నది ప్రధాన ఆరోపణ.
అమెరికా సమాచార దోపిడీకి సంబంధించి వాషింగ్టన్ పోస్ట్తో పాటు జర్మన్ పబ్లిక్ బ్రాడ్కాస్టర్-జడ్డీఎఫ్ సంయుక్త ఆపరేషన్ చేపట్టాయి. 1951లో క్రిప్టో ఏజీ అనే సంస్థతో సీఐఏ ఒప్పందం కుదుర్చుకుందని.. 70వ దశకంలో పూర్తి యాజమాన్య హక్కులు వచ్చాయని ఈ నివేదికలు వెల్లడించాయి.
"ఈ శతాబ్దంలో ఇది అతిపెద్ద నిఘా కుట్ర. అమెరికా, పశ్చిమ జర్మనీలకు తమ రహస్యాలు బయటకు రాకుండా విదేశీ ప్రభుత్వాలు చాలా మొత్తాన్ని చెల్లిస్తున్నాయి."
- నివేదిక
సంయుక్త ఆపరేషన్లో బయటపడిన వాస్తవాలు..
- వివిధ దేశాల నుంచి సేకరించిన రహస్య సమాచారంతో.. అమెరికాతో పాటు దాని మిత్ర దేశాలు లబ్ధి పొందాయి. ఏళ్లుగా ఆయా దేశాల్లో డబ్బు, రహస్యాల దోపిడీకి పాల్పడ్డాయి.
- క్రిఫ్టోగ్రఫీ సాయంతో అమెరికా మిత్రదేశాలపైనా సీఐఏ సహా జాతీయ భద్రత సంస్థ నిఘా పెట్టింది.
- అర్ధ శతాబ్దానికిపైగా చాలా దేశాలు ఈ స్విట్జర్లాండ్ కంపెనీని నమ్ముతూ వస్తున్నాయి. ఈ సంస్థ సేవలను భారత్, పాకిస్థాన్, ఇరాన్, లాటిన్ అమెరికా, వాటికన్ తదితర దేశాలు వినియోగిస్తున్నాయి.
ఈ సంస్థతో అమెరికాకు భాగస్వామ్యం ఉన్నట్లు వినియోగదారులకు ఏమాత్రం తెలియదని నివేదిక తెలిపింది.
అయితే దీనిపై భారత ప్రభుత్వం ఇంకా స్పందించలేదు.
