అమెరికా, చైనాలా మధ్య ఉద్రిక్త పరిస్థితులు రోజురోజుకు మరింత తీవ్రమవుతున్నాయి. దేశంలోని చైనా రాయబార కార్యాలయాల మూసివేతకు పూనుకుంది అమెరికా. ఇందులో భాగంగా హ్యూస్టన్లోని కార్యాలయాన్ని మూసివేసింది. నాలుగు దశాబ్దాల తర్వాత హ్యూస్ట్న్లోని చైనా రాయబార కార్యాలయం అధికారికంగా మూతపడింది.
ఇటీవల ఇరు దేశాల మధ్య ఉద్రిక్తతలు పెరిగాయి. కరోనా వైరస్, ముస్లింలపై ఆంక్షలు, హాంగ్కాంగ్లో జాతీయ భద్రత చట్టం అమలు నేపథ్యంలో చైనాపై ఆగ్రహం వ్యక్తం చేసింది అమెరికా. పలు ఆంక్షలకు తెరతీసింది.
హ్యూస్టన్లో చైనా రాయబార కార్యాలయం గూఢచర్యానికి ప్రధాన కేంద్రంగా మారిందని అగ్రరాజ్యం విదేశాంగ మంత్రి మైక్ పాంపియో ఆరోపణలు చేసిన నేపథ్యంలో.. 72 గంటల్లో కాన్సులేట్ను మూసివేయాలని ఆదేశించింది అమెరికా. ఈ నేపథ్యంలో కార్యాలయాన్ని మూసివేశారు.
గడువు ముగిసే సమయానికి గంట ముందు.. చైనా కాన్సులేట్ భవనం ముందు ఉన్న పీపుల్స్ రిపబ్లిక్ ఆఫ్ చైనా ముద్ర, జెండాను తొలగించారు అధికారులు. భవనాన్ని స్వాధీనం చేసుకున్నారు. అప్పటికే.. తమకు చెందిన వస్తువులను కాన్సులేట్ సిబ్బంది తొలగించటం కనిపించింది.
సంబరాలు..
దౌత్య కార్యాలయం మూసివేత నేపథ్యంలో కొంతమంది ఆందోళనకారులు సంబరాలు చేసుకున్నారు. ఈ సందర్భంగా పోలీసులు భద్రత కట్టుదిట్టం చేసి, బారీకేడ్లు ఏర్పాటు చేశారు.
చైనా ప్రతీకార చర్యలు..
హ్యూస్టన్లోని దౌత్య కార్యాలయం మూసివేయటంపై ఆగ్రహం వ్యక్తం చేసిన చైనా.. ప్రతీకార చర్యలు చేపట్టింది. చెంగ్డూ నగరంలోని యూఎస్ కాన్సులేట్ను మూసివేయాలని ఆదేశించింది. జాతీయ భద్రతకు భంగం కలిగించటం సహా.. అంతర్గత వ్యవహారాల్లో అమెరికా జోక్యం చేసుకుంటోందని ఆరోపించింది.
ఇదీ చూడండి: ఇక మీదట చైనాపై అవే మా విధానాలు: పాంపియో
