కరోనా వైరస్ సోకి, ఆస్పత్రి పాలవడం వల్ల తనకు అనుకోని మేలు జరిగిందని చెప్పారు అగ్రరాజ్యం అధ్యక్షుడు డొనాల్డ్ ట్రంప్. ఆస్పత్రి నుంచి డిశ్చార్జి అయిన 2 రోజుల తర్వాత వీడియో సందేశం విడుదల చేశారు. తాను కోలుకునేందుకు ఉపయోగపడిన రీజనరాన్ సహా ఇతర ఔషధాలను అమెరికన్లందరికీ ఉచితంగా అందిస్తామని స్పష్టంచేశారు.
"అమెరికా అధ్యక్షుడికి అందిన చికిత్సే ప్రతి ఒక్కరికీ లభించాలి. ఎందుకంటే ఇది నాకు గొప్ప అనుభూతినిచ్చింది. భగవంతుడి ఆశీర్వచనాల వల్లే నాకు కరోనా సోకింది. ఇది నాకు ఊహించని మేలు."
-డొనాల్డ్ ట్రంప్, అమెరికా అధ్యక్షుడు
చైనాకు హెచ్చరికలు..
కరోనాపై చైనాకు మరోసారి హెచ్చరికలు జారీ చేశారు ట్రంప్. ప్రపంచం మొత్తానికి వైరస్ను వ్యాపింపజేసి విపత్కర పరిస్థితికి కారణమైన డ్రాగన్ దేశం.. భారీ మూల్యం చెల్లించక తప్పదని స్పష్టం చేశారు.
"ఈ విపత్కర పరిస్థితికి కారణం మనం కాదు. ఇది చైనా చేసిన తప్పు. అమెరికా, ప్రపంచం ఈ పరిస్థితిలో ఉండడానికి కారణమైన చైనా భారీ మూల్యం చెల్లించుకోక తప్పదు. ఇది ముమ్మాటికీ చైనా తప్పిదమే. ఇది గుర్తుంచుకోండి. "
-డొనాల్డ్ ట్రంప్, అమెరికా అధ్యక్షుడు
