ప్రపంచవ్యాప్తంగా దాదాపు 250 మంది పాత్రికేయులు జైలు జీవితం గడుపుతున్నారని పత్రికా స్వేచ్ఛ కోసం పనిచేసే ఓ స్వచ్ఛంద సంస్థ నివేదికలో వెల్లడించింది. స్వతంత్ర మీడియాపై ప్రభుత్వాల అణచివేత పెరుగుతున్న ప్రస్తుత తరుణంలో.. ఈ సంఖ్య పెరుగుతోందని పేర్కొంది.
పాత్రికేయులు అధిక సంఖ్యలో జైల్లో వేస్తున్న దేశాల జాబితాలో చైనా తొలి స్థానంలో ఉన్నట్లు న్యూయార్క్ కేంద్రంగా పనిచేసే 'కమిటీ టు ప్రొటెక్ట్ జర్నలిస్ట్స్'-సీపీజే తెలిపింది. టర్కీ, సౌదీ అరేబియా, ఈజిప్ట్, ఎరిట్రియా, వియత్నాం, ఇరాన్ తర్వాత స్థానాల్లో ఉన్నట్లు వెల్లడించింది.
తప్పుడు వార్తలతోనే అభియోగాలు!
దేశ వ్యతిరేక వార్తలు లేదా తప్పుడు వార్తలు ప్రచురించారన్న ఆరోపణలపైనే పాత్రికేయుల్ని ఎక్కువగా అరెస్టు చేస్తున్నట్లు వివరించింది సీపీజే.
చైనా అధ్యక్షుడు షీ జిన్పింగ్ మీడియాను నియంత్రించేందుకు చేపట్టిన చర్యలతో.. ఆ దేశంలో 48 మంది పాత్రికేయులు కారాగారంలో మగ్గుతున్నట్లు వాచ్డాగ్ తెలిపింది. గత మూడేళ్లలో ఇదే అత్యధికమని విశ్లేషించింది.
టర్కీలో గతేడాది 68 మంది జర్నలిస్టులు ఖైదులో ఉండగా.. 2019లో 47 మంది చెరసాలలో ఉన్నట్లు పేర్కొంది సీపీజే. టర్కీ 100కు పైగా వార్తాసంస్థల్ని మూసివేసిందని.. చాలా వరకు సిబ్బందిపై ఉగ్ర ఆరోపణలు మోపి జైల్లో పెట్టిందని సీపీజే తెలిపింది.
సౌదీ, ఈజిప్ట్ 3లో...
పశ్చిమాసియా దేశాల్లో నిరంకుశత్వం, నిరసనలు, అస్థిరతల కారణంగా... ఎక్కువగా పాత్రికేయుల్ని జైల్లో పెట్టారని తెలిపింది సీపీజే. కారాగారాల్లో చెరొక 26 మంది జర్నలిస్టులతో సౌదీ, ఈజిప్ట్ సంయుక్తంగా మూడో స్థానంలో ఉన్నట్లు నివేదికలో పేర్కొంది.
