అమెరికా అధ్యక్షుడిగా ఎన్నికైన తర్వాత డొనాల్డ్ ట్రంప్తో ఆయన సతీమణి మెలానియా ట్రంప్ బేరసారాలాడినట్లు వాషింగ్టన్ పోస్ట్ రిపోర్టర్ రచించిన పుస్తకం బహిర్గతం చేసింది. 2016లో ట్రంప్ బాధ్యతలు చేపట్టాక ఆయనతో ఉండేందుకు వాషింగ్టన్ రావడానికి ఆర్థిక ప్రయోజనాలు పొందేలా మెలానియా చర్చలు జరిపినట్లు పేర్కొంది. 2017లో ఆమె వాషింగ్టన్ రావడానికి ఆలస్యం చేసినట్లు వెల్లడించింది. ట్రంప్తో వివాహానికి పూర్వం జరిగిన ఒప్పందానికి మార్పులు చేసిన తర్వాతే మెలానియా తుది నిర్ణయం తీసుకున్నట్లు పుస్తకం వివరించింది. ఆలస్యం చేయడానికి తన కుమారుడు బ్యారన్ పాఠశాల సంవత్సరం పూర్తయ్యే వరకూ వేచి చూసేలా మెలానియా చేశారని రచయిత పేర్కొన్నారు.
వాషింగ్టన్ పోస్ట్ రిపోర్టర్ మేరీ జోర్డన్ ' ది ఆర్ట్ ఆఫ్ హర్ డీల్: ది అన్టోల్డ్ స్టోరీ ఆఫ్ మెలానియా' పేరిట ఈ పుస్తకాన్ని రాశారు. జూన్ 16న అధికారికంగా బయటకు రావాల్సిన ఈ పుస్తకాన్ని ముందుస్తు కాపీని అసోసియేటెడ్ ప్రెస్ కొనుగోలు చేసి బహిర్గతం చేసింది.
మెలానియాకు సంబంధించి పుస్తకంలో తెలిపిన పలు కీలక విషయాలు..
- 2016 అమెరికా అధ్యక్ష ఎన్నికల ప్రచార సమయంలో ట్రంప్పై వచ్చిన ఆరోపణల గురించి మీడియాలో వచ్చిన వార్తల ద్వారా మెలానియాకు కొత్త విషయాలు తెలిశాయి.
- తన కుమారుడు, తాను భవిష్యత్తులో ఎలాంటి ఆర్థిక లోటు లేకుండా ఉండేలా చూసుకోవాలని మెలానియా భావించారు.
- ఆర్థికపరమైన ఏర్పాట్లకు సంబంధించి ట్రంప్తో వివాహానికి పూర్వం జరిగిన ఒప్పందానికి మార్పులు జరిగేలా చేశారు మెలానియా.
- తనతో ఒప్పందం కుదిరాకే ట్రంప్ జీవితంలో ఎంతో మార్పు వచ్చిందని ఎన్నికల ప్రచారం సందర్భంగా మెలానియా అనుకున్నారు.
- ట్రంప్తో ఎక్కువ కాలం కలిసున్న మహిళ కూడా మెలానియానే. ఆయన విజయంలో తనకు కీలక పాత్ర ఉన్నట్లు సన్నిహితులతో మెలానియా చెప్పారు.
- అధ్యక్షుడయ్యాక తన వ్యాపార సంస్థలను పర్యవేక్షించే తీరిక ట్రంప్కు లేకుండా పోయింది. ఒకవేళ ఆ బాధ్యతలను ట్రంప్ కూతురు ఇవాంక చేపడితే, వారసుడైన తన కొడుకు బ్యారన్(11)కు దక్కాల్సిన వాటా దక్కేలా చూడాలని మెలానియా కోరారు. తనకు, తన కుమారుడికి కలిపి ట్రంప్తో భారీ ఆర్థిక ఒప్పందం కుదుర్చుకున్నారు.
ఈ వివరాలు సేకరించేందుకు మెలానియా సొంత ప్రాంతమైన స్లొవేనియాలో ఆమెతో కలిసి చదువుకున్న వారు, న్యూ జెర్సీ మాజీ గవర్నర్ సహా 100 మందితో ఇంటర్వ్యూలు నిర్వహించినట్లు చెప్పారు జోర్డన్.
ట్రంప్ ముగ్గురు పిల్లల కంటే బ్యారన్కే అధిక ప్రాధాన్యం ఉండేలా మెలానియా పట్టుబట్టారని జోర్డన్ తెలిపారు. కుటుంబ వ్యాపారాలు, ట్రంప్ సంస్థలలో అవకాశాలు, ఆస్తులలో తన కుమారిడికి వాటా ఉండేలా మెలానియా కోరినట్లు చెప్పారు. అలా అయితే స్లొవేనియా పౌరసత్వం ఉన్న తన కుమారడు బ్యారన్కు భవిష్యత్తులో ఐరోపాలో ట్రంప్ వ్యాపారాలను నిర్వహించే మంచి అవకాశాలు వస్తాయని మెలానియా వ్యూహరచన చేశారు.
తప్పులు..
ఈ పుస్తకంలో ఉంది కచ్చితమైన సమాచారం కాదని, మోలానియాకు సంబంధించి తప్పుడు వివరాలతో మరో పుస్తకం బయటకొచ్చిందని ఆమె అధికార ప్రతినిధి స్టిఫెనీ గ్రీషమ్ అన్నారు.
