అమెరికా నూతన అధ్యక్షుడిగా పగ్గాలు చేపట్టనున్న జోబైడెన్ ప్రమాణ స్వీకార రిహార్సల్ కార్యక్రమం వాయిదా పడింది. సోమవారం ఈ కార్యక్రమం నిర్వహించాలని తొలుత భావించగా.. భద్రతా సమస్యల దృష్ట్యా దీన్ని వాయిదా వేసినట్లు తెలుస్తోంది.
జనవరి 20న అమెరికా అధ్యక్షుడిగా డెమొక్రాట్ నేత జో బైడెన్ ప్రమాణ స్వీకారం చేయనున్న నేపథ్యంలో అగ్రరాజ్యంలో ఉద్రిక్త పరిస్థితి నెలకొనే అవకాశం ఉందని అమెరికా అత్యున్నత దర్యాప్తు సంస్థ(ఎఫ్బీఐ) హెచ్చరించింది. అమెరికాలోని 50 రాష్ట్రాల రాజధానుల్లో, వాషింగ్టన్ డీసీలో నిరసనకారులు ఆయుధాలతో అల్లర్లకు పాల్పడే అవకాశముందని పేర్కొంది. ఈ నేపథ్యంలోనే రిహార్సల్ కార్యక్రమాన్ని వాయిదా వేసినట్లు అమెరికాలోని మీడియా సంస్థలు చెబుతున్నాయి.
భద్రతా సమస్యలు కారణంగా.. విల్లింగ్టన్ నుంచి వాషింగ్టన్ వరకు బైడెన్ బృందం నిర్వహించ తలపెట్టిన ఆమ్త్రాక్ యాత్ర కూడా రద్దు అయినట్లు తెలుస్తోంది. అయితే ఈ విషయమై అధికారులెవరూ ఇంతవరకు స్పందించలేదు.
పటిష్ఠ బందోబస్తు..
ప్రమాణస్వీకార మహోత్సవంలో ఎలాంటి ఇబ్బందులు ఎదురుకాకుండా చూసుకునేందుకు 20వేల మంది నేషనల్ గార్డ్స్ను ఆయుధాలతో క్యాపిటల్ చుట్టూ మోహరిస్తోంది అగ్రరాజ్య రక్షణ విభాగం పెంటగాన్. ఇప్పటికే 15 వేల మంది క్యాపిటల్ వద్దకు చేరుకున్నారు. ఈ నెల 20లోపు మరో 5వేల మంది వేదిక ప్రాంగణం వద్దకు చేరుకుంటారు.
100కు పైగా మంది అరెస్టు..
జనవరి 6న జరిగిన అమెరికా క్యాపిటల్ భవనంపై దాడి ఘటనలో పాల్గొన్న 100కు పైగా వ్యక్తుల్నిఅరెస్టు చేసినట్లు ఎఫ్బీఐ డైరెక్టర్ క్రిస్టోఫరక్ రే చెప్పారు. ఉపాధ్యక్షుడు మైక్ పెన్స్తో రే సమావేశమయ్యారు. ఇలాంటి చర్యలకు పాల్పడాలనుకునే వారికి ఈ అరెస్టులు ఓ హెచ్చరికలా ఉంటుందని ఆయన పేర్కొన్నారు.
సభ్యులను కిడ్నాప్ చేసేందుకు కుట్రలు..
క్యాపిటల్ దాడిలో పాల్గొన్న నావికా దళ మాజీ అధికారి ఒకరిని పోలీసులు ఆదివారం అరెస్టు చేశారు. అతడిని టెక్సాస్ న్యాయస్థానం ముందు తాజాగా.. పోలీసులు హాజరుపరిచారు. ప్రజా ప్రతినిధులను అపహరించే ఉద్దేశంతోనే సదరు వ్యక్తి కుట్ర పన్నారని ఓ న్యాయవాది ఆరోపించారు. ఈ కేసులో వాదనలు విన్న న్యాయమూర్తి.. అతడికి గృహ నిర్బంధం విధిస్తూ తీర్పు చెప్పారు.
అల్లర్లలో పాల్గొన్న భద్రతా బలగాలు..
క్యాపిటల్ భవనంపై జరిగిన దాడి ఘటనలో అమెరికాలోని భద్రతా అధికారులు పాల్గొన్నట్లుగా సామాజిక మాధ్యమాల్లో చిత్రాలు బహిర్గతమయ్యాయి. క్యాపిటల్ భవనం అల్లర్ల సమయంలో 21 మంది అమెరికా భద్రతా అధికారులను గుర్తించినట్లు అసోసియేటెడ్ ప్రెస్ వార్త సంస్థ తెలిపింది. తమ అధికారులు ఎవరైనా అల్లర్లలో పాల్గొని, చట్టాలను ఉల్లంఘించారా అనే దానిపై దర్యాప్తు జరుపుతున్నట్లు న్యూయార్క్, లాస్వెగాస్, హ్యూస్టన్, ఫిలడెల్ఫియా నగరాల్లోని పోలీసు శాఖలు ప్రకటించాయి.
సామాజిక మాధ్యమాల్లో హీరోగా.. యుగెన్ గుడ్మ్యాన్..
క్యాపిటల్ దాడి సమయంలో నిరసనకారులు.. భవనంలోకి చొరబడ్డప్పుడు వారిని దీటుగా ఎదుర్కొని, బయటకు వెళ్లాలని సూచించిన క్యాపిటల్ భద్రతాదళ అధికారి యుగెన్ గుడ్మ్యాన్ను సామాజిక మాధ్యమాల్లో అందరూ ప్రశంసిస్తున్నారు. దాడికి పాల్పడుతున్న సమయంలో నిరసనకారులను వెనక్కు వెళ్లాలని విజ్ఞప్తి చేస్తూ వారికి ఎదురెళ్లాడు. ఆ సమయంలో ప్రజాప్రతినిధులు సురక్షిత ప్రాంతాలకు వెళ్లేందుకు మార్గం సుగమం చేశాడు. దాంతో అతడిని అందరూ హీరోగా కొనియాడుతున్నారు.
ఇదీ చూడండి:ట్రంప్ 'అభిశంసన'పై విచారణ ఆ రోజే!
