అమెరికా అధ్యక్ష ఎన్నికల అభ్యర్థిని ఖరారు చేసేందుకు నిర్వహించే ప్రాథమిక ఎన్నికల్లో డెమొక్రటిక్ పార్టీ తరఫున జో బిడెన్ ముందంజలో దూసుకెళ్తున్నారు. మొత్తం 15 రాష్ట్రాల్లో నిర్వహించిన 'సూపర్ ట్యూస్ డే' ఎన్నికల్లో బిడెన్ ఆధిక్యం కనబర్చారు. ఆయన తర్వాతి స్థానంలో బెర్నీ సాండర్స్ ఉన్నారు. అధ్యక్ష పదవి కోసం రేసులో ఉన్న మరో డెమొక్రటిక్ అభ్యర్థి మైకేల్ బ్లూమ్బర్గ్కు మాత్రం నిరాశే ఎదురైంది. ఆయన అభ్యర్థిగా నిలిచే అవకాశాలు దాదాపు సన్నగిల్లాయి.
సూపర్ ట్యూస్ డే రోజున అలబామా, అర్కన్సాస్, కాలిఫోర్నియా, కొలరాడో, మైనీ, మస్సాచుసెట్స్, ఒక్లహామా సహా 15 రాష్ట్రాల్లో ప్రాథమిక ఎన్నికలు జరిగాయి.
డెమొక్రాట్ల తరఫున అధ్యక్ష పదవి రేసులో ఉన్న జో బిడెన్.. వర్జీనియా, ఉత్తర కాలిఫోర్నియా, అలబామా, ఒక్లామా, టెన్నిస్సీ, మిన్నెసోటా, మస్సాచుసెట్స్, అర్కాన్సాస్ రాష్ట్రాల్లో ఘన విజయం సాధించారు.
415 ప్రతినిధులను పంపే అతిపెద్ద రాష్ట్రమైన కాలిఫోర్నియాలో ఆధిక్యం ప్రదర్శించారు బిడెన్. ట్రంప్తో పోటీ పడేందుకు తాను ముందున్నానని నిరూపించుకున్నారు. సొంత రాష్ట్రమైన వెర్మోంట్తో పాటు ఉటా, కొలొరాడోలో గెలిచారు.
మెయినీ, టెక్సాస్ రాష్ట్రాల్లో బిడెన్, సాండర్స్ పోటాపోటీగా తలపడ్డారు.
వ్యాపార దిగ్గజానికి ఎదురుదెబ్బ
న్యూయార్క్ మాజీ మేయర్, అధ్యక్ష అభ్యర్థిత్వం రేసులో ఉన్న మరో డెమొక్రాట్ మైకేల్ బ్లూమ్బర్గ్ ఏ మాత్రం ప్రభావం చూపలేకపోయారు. సమోవా కాకస్లో మాత్రమే విజయం సాధించారు.
ఇప్పటి వరకు 500 మిలియన్ డాలర్లను ప్రచారం కోసం వెచ్చించారు బ్లూమ్బర్గ్. ప్రాథమిక ఎన్నికల్లో నిరాశాజనక ఫలితాలతో అధ్యక్ష పదవి రేసు నుంచి దాదాపు తప్పుకునే పరిస్థితి ఏర్పడింది.
ట్రంప్ స్పందన..
ఈ ఫలితాలపై అమెరికా అధ్యక్షుడు, రిపబ్లికన్ల అభ్యర్థి డొనాల్డ్ ట్రంప్ ట్విట్టర్ వేదికగా స్పందించారు. ప్రాథమిక ఎన్నికల్లో మైకేల్ బ్లూమ్బర్గ్ దారుణ పరాజయం చవిచూశారని ట్వీట్ చేశారు. 700మిలియన్ డాలర్లు గంగలో కలిసిపోయాయని వ్యంగ్యాస్త్రాలు సంధించారు. డెమొక్రాట్ల తరఫున బరిలో ఉన్న మరో ఇద్దరు అభ్యర్థులు ఎలిజబెత్ వారెన్, పొకాహోంటాస్ తమ సొంత రాష్ట్రాల్లో కూడా ప్రభావం చూపలేకపోయారని ఎద్దేవా చేశారు ట్రంప్.
బుష్ వారసుడి పరాభవం..
హ్యూస్టన్లో సొంత పార్టీ రిపబ్లికన్ల అభ్యర్థులతో పోటీపడిన అమెరికా మాజీ అధ్యక్షుడు జార్జ్ బుష్ వారసుడు పీర్స్బుష్ ఓటమిపాలయ్యారు. ఫలితంగా టెక్సాస్లో గత 40 ఏళ్లలో తన కుటుంబానికి ఎన్నడూ లేని పరభవాన్ని మూటగట్టుకున్నారు.
ఇదీ చూడండి: తాలిబన్ల దుశ్చర్య- ట్రంప్తో మాట్లాడిన కాసేపటికే 20 మంది హత్య
