అమెరికాలో కొద్ది రోజులుగా విజృంభిస్తున్న కొవిడ్ మహమ్మారి నియంత్రణకు దేశవ్యాప్తంగా లాక్డౌన్ విధించాలన్న ప్రతిపాదనను తోసిపుచ్చారు అధ్యక్ష ఎన్నికల విజేత జో బైడెన్. కానీ, వైరస్ను కట్టడి చేసేందుకు దేశవ్యాప్తంగా మాస్క్ తప్పనిసరి చేయాలని నొక్కి చెప్పారు.
" దేశంలోని వివిధ ప్రాంతాలు, వాటి విస్తీర్ణం, సమాజాలు భిన్నంగా ఉన్నాయి. అందువల్ల దేశవ్యాప్తంగా లాక్డౌన్ విధించాల్సిన అవసరం ఉందని అనుకోవట్లేదు. అది దేశ ఉత్పాదకశక్తిపై ప్రతికూల ప్రభావాన్ని చూపుతుంది. నేను ఆర్థిక కాలాన్ని పూర్తిగా మూసివేయాలనుకోవట్లేదు, కానీ వైరస్ను షట్డౌన్ చేయబోతున్నా. "
- జో బైడెన్, అధ్యక్ష ఎన్నికల విజేత
వైరస్ ఉద్ధృతి తక్కువగా ఉన్న రాష్ట్రాల్లో వ్యాయామశాలలు వంటివి 4 గంటల పాటు తెరుస్తున్నారని, అలాగే.. కొన్ని ప్రాంతాల్లో చర్చుల్లో 40 మందికి మినహా అనుమతించటం లేదని గుర్తుచేశారు బైడెన్. అక్కడి వైరస్ పరిస్థితుల ఆధారంగా నిర్ణయాలు తీసుకున్నారని.. పూర్తిగా మూసివేయలేదన్నారు.
దేశవ్యాప్తంగా మాస్క్ తప్పనిసరి..
కరోనా కట్టడికి దేశవ్యాప్తంగా మాస్క్ తప్పనిసరి అమలు చేయాల్సిన అంశంపై గవర్నర్లతో చర్చించినట్లు చెప్పారు బైడెన్. ఇప్పటికే 10 మంది డెమొక్రటిక్, రిపబ్లికన్ గవర్నర్లు మాస్క్ తప్పనిసరి చేసినట్లు గుర్తు చేశారు. ఇది రాజకీయ ప్రకటన కాదని, దేశం కోసం చేయాల్సిన విధిగా పేర్కొన్నారు. అలాగే కొవిడ్ వ్యాక్సిన్ నిర్వహణ, పంపిణీలో ఎదురయ్యే సవాళ్లపై చర్చించినట్లు చెప్పారు బైడెన్. ఇందు కోసం ఫెడరల్ ప్రభుత్వం, రాష్ట్ర ప్రభుత్వాలు కలిసికట్టుగా పనిచేయాలని సూచించారు. టీకా పంపిణీ బాధ్యత 33 కోట్ల మంది అమెరికన్ల భుజాలపై ఉందన్నారు.
ఇదీ చూడండి: అమెరికాలో ప్రతి నిమిషానికి ఒక కరోనా మరణం!
