తమ పాలన నుంచి చైనా గట్టి పోటీని ఆశిస్తోందని అగ్రరాజ్య అధ్యక్షుడు జో బైడెన్ వ్యాఖ్యానించారు. అయితే.. చైనాతో ఏర్పరచుకోనున్న ఆ బంధం.. సంఘర్షణతో కూడుకున్నది కాదని ఓ ఇంటర్వ్యూలో చెప్పారు బైడెన్. ఇప్పటివరకు చైనా అధ్యక్షుడు షీ జిన్పింగ్తో తానింకా మాట్లాడలేదని ఆయన అన్నారు. అయితే.. గతంలో తాము ఉపాధ్యక్షులుగా ఉన్న కాలంలో తమ మధ్య సత్సంబంధాలున్నాయని బైడెన్ గుర్తుచేశారు. జిన్పింగ్ తనకు సన్నిహితుడని ఈ సందర్భంగా పేర్కొన్నారు.
మాజీ అధ్యక్షుడు డొనాల్డ్ ట్రంప్లాగా.. తాను అమెరికా-చైనా సంబంధాలను కొనసాగించబోనని బెడెన్ స్పష్టం చేశారు. కేవలం అంతర్జాతీయ అంశాలపైనే దృష్టి సారిస్తానని వెల్లడించారు. ఇరు దేశాల మధ్య ఎలాంటి వివాదం కోరుకోవట్లేదన్న బైడెన్.. చైనాయే తీవ్ర పోటీని ఆశిస్తోందని పేర్కొన్నారు. ఈ మేరకు సంకేతాలు కూడా పంపుతోందన్నారు.
మరోవైపు.. బైడెన్ తన తొలి టెలిఫోన్ దౌత్యాన్ని యూఎస్ మిత్ర దేశాలపై కేంద్రీకరించినట్టు తెలుస్తోంది. ఆయన ఇప్పటివరకు కెనడా, మెక్సికో, యూకే, ఫ్రాన్స్, జర్మనీ, జపాన్, దక్షిణ కొరియా, ఆస్ట్రేలియా నాయకులు సహా.. నాటో ప్రధాన కార్యదర్శులతో సంభాషించారు. అంతేకాకుండా రష్యా అధ్యక్షుడు వ్లాదిమర్ పుతిన్తోనూ మాట్లాడారు బైడెన్.
ఇదీ చదవండి: తిరిగి ఐరాస మానవహక్కుల సంఘంలోకి అమెరికా!
