హెచ్-1బీ వీసా పొందే వారికి కనీస వేతన పరిమితి పెంచాలని ట్రంప్ హయాంలో ప్రతిపాదించిన నిబంధన అమలును మరింత ఆలస్యం చేసేందుకు.. అమెరికా అధ్యక్షుడు జో బైడెన్ పాలనా యంత్రంగం శుక్రవారం నోటిఫికేషన్ జారీ చేసింది. ప్రస్తుతం ఈ అంశాన్ని సమీక్షిస్తున్నట్లు తెలిపింది. ఈ నిబంధనలపై ప్రజలు తమ అభిప్రాయం తెలిపేందుకు అవకాశం కల్పించనున్నట్లు కార్మిక శాఖ నోటిఫికేషన్లో పేర్కొంది.
ఈ నిబంధనలు జూన్ 1 నుంచి అమలులోకి రావాల్సి ఉండగా... 60 రోజులు వాయిదా వేయాలని ప్రభుత్వం నిర్ణయించినట్టు సమాచారం.
ట్రంప్ ప్రతిపాదన ఇది..
సాధారణంగా హెచ్1-బీ వీసా పొందాలంటే వార్షికవేతనం కనీసం 65 వేల డాలర్లకుపైగా ఉండాలి. అయితే ట్రంప్ హయాంలో ఈ పరిమితిని 1.10 లక్షల డాలర్లకు (45 శాతం) పెంచాలని ప్రతిపాదించారు. దీని వల్ల అమెరికా పౌరులకు ఉద్యోగ అవకాశాలు పెరుగుతాయని ట్రంప్ అప్పట్లో పేర్కొన్నారు.
హెచ్-1బీ వీసా అనేది నాన్ ఇమిగ్రెంట్ వీసా. ఈ వీసా ఉన్న వారు అమెరికా కంపెనీల్లో ఉపాధి పొందొచ్చు. అయితే ఆయా కంపెనీలు విదేశీ సిబ్బందిని నియమించుకోవాలంటే.. వారిలో ప్రత్యేక నైపుణ్యాలు తప్పనిసరి. ఇదే పద్ధతిలో అమెరికా టెక్ కంపెనీలు ఏటా వేల సంఖ్యలో భారత్, చైనా వంటి దేశాల నుంచి నిపుణులైన సిబ్బందిని నియమించుకుంటున్నాయి.
ఇదీ చదవండి:'హెచ్-1బీ' జారీ నిర్ణయంపై ఫెయిర్ అభ్యంతరం
