ఇతర దేశాల నుంచి 2019లో తమ దేశస్థులు దత్తత తీసుకున్న చిన్నారుల వివరాలను వెల్లడించింది అమెరికా విదేశాంగ శాఖ. 12వ వార్షిక నివేదికలో వీటిని పొందుపర్చింది. వివరాల ప్రకారం భారత్లోని 241 మంది చిన్నారులను అమెరికన్ పౌరులు దత్తత తీసుకున్నారు. ఇందుకు సంబంధించి 2019లో మొత్తం 2,971 ఇమ్మిగ్రేషన్ వీసాలు జారీ చేసినట్లు అధికారులు తెలిపారు.
గతంతో పోల్చితే అమెరికన్ కుటుంబాలు ఇతర దేశాల నుంచి దత్తత తీసుకోవడం తగ్గినట్లు చిన్నారుల సమస్యలకు సంబంధించిన ప్రత్యేక సలహాదారు మిచేలీ బెర్నిర్ టోత్ చెప్పారు. ముఖ్యంగా చైనా నుంచి దత్తతలు 656 తగ్గగా, ఇథియోపియాలో ఆ సంఖ్య 166గా ఉంది. ఆ దేశాలు న్యాయపరమైన మార్పులు చేయడం వల్లే సంఖ్య తగ్గినట్లు వివరించారు.
ఇతర దేశాల నుంచి దత్తతలు తగ్గడానికి ఆయా దేశాలు స్వదేశంలోని వారికే ప్రాధన్యమివ్వడం మరో కారణమని మిచేలీ పేర్కొన్నారు. కొన్ని దేశాల్లో మాత్రం దత్తతలు పెరిగినట్లు చెప్పారు. ఉక్రెయిన్లో 50, లిబేరియాలో 21, హంగేరీలో 17, కొలంబియాలో 15 మందిని గతంతో పోల్చితే ఎక్కువగా అమెరికన్లు దత్తత తీసుకున్నారు.
చైనీయులే అధికం..
అయితే అమెరికన్లు దత్తత తీసుకునే వారిలో అత్యధికంగా చైనీయులే ఉన్నారు. 2019లో ఆ దేశం నుంచి 819మంది చిన్నారులను దత్తత తీసుకున్నారు. ఆ తర్వాతి స్థానాల్లో ఉక్రెయిన్ 298, కొలంబియా 244, భారత్ 241 ఉన్నాయి. ప్రస్తుతం ప్రపంచవ్యాప్తంగా కరోనా ప్రభావం ఉన్నప్పటికీ దత్తతలు మాత్రం ఆగడం లేదని మిచేలీ వెల్లడించారు.
2019 నివేదిక ప్రకారం అమెరికా నుంచి 56 మంది చిన్నారులను ఇతర ఏడు దేశాల వారు దత్తత తీసుకున్నారు. కెనడా 24, నెదర్లాండ్స్ 17, మెక్సికో 6, ఐర్లాండ్ 5, బెల్జియం, స్విట్జర్లాండ్ ఒక్కొక్కరిని, బ్రిటన్ ఇద్దరిని దత్తత తీసుకున్నాయి.
విదేశాల నుంచి దత్తత ప్రక్రియ ముగిసేందుకు అత్యధికంగా పెరూలో 899 రోజులు పడుతుంది. భారత్లో ఈ ప్రక్రియ 457 రోజుల్లోనే పూర్తవుతుందని నివేదిక పేర్కొంది.
