బాగ్దాద్లోని అమెరికా దౌత్యకార్యాలయంపై జరిగిన దాడిని అగ్రరాజ్య అధ్యక్షుడు డొనాల్డ్ ట్రంప్ ఖండించారు. దీని వెనుక ఇరాన్ హస్తం ఉందని ఆరోపించారు. ఇస్లామిక్ దేశాల దాడిలో తమ పౌరులు మరణించినా.. అమెరికా ఆస్తులకు నష్టం వాటిల్లినా ఇరాన్ తీవ్ర పరిణామాలు ఎదుర్కోవాల్సి వస్తుందని హెచ్చరించారు. అయితే దీనిని హెచ్చరికగా కాకుండా ముప్పుగా పరిగణించాలని ట్వీట్ చేశారు.
అమెరికా వైమానిక దాడుల్లో మరణించిన ఇరాన్ ఉద్యమకారులకు సంఘీభావం తెలుపుతూ మంగళవారం ఇరాక్ రాజధాని బాగ్దాద్లో జరిగిన ఆందోళనలపై ట్రంప్ ఈ వ్యాఖ్యలు చేశారు. ఈ నిరసనల్లోనే బాగ్దాద్లోని అమెరికా దౌత్యకార్యాలయంపై దాడి జరిగింది. ఈ ఘటనలో కార్యాలయంలోని అమెరికా సిబ్బందికి ఎలాంటి హాని జరగలేదు.
బలగాల తరలింపు...
దాడితో అమెరికా అప్రమత్తమైంది. 730కుపైగా బలగాలను పశ్చిమాసియా దేశాలకు తరలిస్తోంది. అగ్రరాజ్య సిబ్బందికి ఉన్న ముప్పును దృష్టిలో పెట్టుకుని ముందస్తు జాగ్రత్తగా ఈ చర్యలు చేపట్టినట్టు రక్షణశాఖ పెంటగాన్ వెల్లడించింది.
ఇరాక్ ప్రధానితో ట్రంప్...
దౌత్య కార్యాలయంపై దాడి నేపథ్యంలో ఇరాక్ ప్రధాని అదిల్ అబ్దెల్ మహ్దితో సంభాషించారు అగ్రరాజ్య అధ్యక్షుడు. ఇరు నేతల సంభాషణలో అమెరికా పౌరుల రక్షణకు ట్రంప్ విజ్ఞప్తి చేసినట్టు శ్వేతసౌధం వెల్లడించింది.
"ఇరు దేశాధినేతలు ప్రాంతీయ భద్రతా అంశాలపై చర్చించారు. అధ్యక్షుడు ట్రంప్.. ఇరాక్‌లోని అమెరికా సిబ్బందిని రక్షించాల్సిన అవసరాన్ని స్పష్టంగా చెప్పారు."
--- శ్వేతసౌధం.
తమ భూభాగంలోని అమెరికన్ల రక్షణకు ఇరాక్ కట్టుబడి ఉన్నట్లు, వారి భద్రత తమ బాధ్యతగా ప్రధాని మహ్ది హామీనిచ్చారని శ్వేతసౌధం పేర్కొంది.
