అమెరికా అధ్యక్షుడిగా తన పదవీకాలం దగ్గరపడుతోన్న సమయంలో చైనాపై ట్రంప్ చర్యలను ముమ్మరం చేశారు. ఇప్పటికే అమెరికాలో పెట్టుబడులు పెట్టకుండా దాదాపు 34 సంస్థలను నిషేధిత జాబితాలో చేర్చిన ఆయన తాజాగా షిన్జియాంగ్ ఉత్పత్తులను కూడా నిషేధించారు. చైనాలో అతిపెద్ద పత్తి ఉత్పత్తిదారుల్లో ఒకటైన షిన్జియాంగ్ ప్రొడక్షన్‌ అండ్‌ కన్‌స్ట్రక్షన్‌ కార్పొరేషన్‌(ఎక్స్పీసీసీ) నుంచి పత్తి ఉత్పత్తులను నిషేధిస్తున్నట్లు అమెరికా కస్టమ్స్‌ విభాగం ప్రకటించింది.
షిన్‌జియాంగ్‌లో ఎక్స్పీసీసీ సంస్థ దాదాపు 60 ఏళ్ల క్రితం ప్రారంభమైంది. చైనాలో ఉత్పత్తి అవుతోన్న పత్తిలో దాదాపు 80శాతం షిన్జియాంగ్ ప్రాంతం నుంచే దిగుబడి అవుతుంది. అయితే.. చైనా సైన్యానికి షిన్జియాంగ్ అనుబంధ సంస్థగా ఉండడం, అక్కడ వీగర్‌ ముస్లింలను బానిసలుగా చూస్తున్నారన్న కారణాలతో ట్రంప్ ఈ నిర్ణయం తీసుకున్నట్లు అధికారులు వెల్లడించారు.
వాటిని అమెరికా సహించదు..
ఈ చర్యలను సమర్థించుకున్న అమెరికా... చైనా కమ్యూనిస్ట్‌ ప్రభుత్వం చేతిలో మానవ హక్కుల ఉల్లంఘన ఘటనలను అమెరికా ప్రజలు సహించరని స్పష్టంచేసింది. అలాంటి బానిస కార్మికుల శ్రమ నుంచి వచ్చే లాభాలను అమెరికా అంగీకరించదని అమెరికా డిపార్ట్‌మెంట్‌ ఆఫ్‌ హోమ్‌ల్యాండ్‌ అధికారి కెన్‌ కాసినెల్లీ అభిప్రాయపడ్డారు. అంతేకాకుండా 'మేడ్‌ ఇన్‌ చైనా' అనేది దేశాన్ని సూచించే నినాదం కాదని..అదో 'హెచ్చరిక ముద్ర' అని అభివర్ణించారు.
బైడెన్కు సవాలే..
ఇదిలాఉంటే, షిన్జియాంగ్ ప్రాంతంలో వీగర్‌ వర్గంపై జరుగుతున్న దాడిని నిరసిస్తూ ట్రంప్ తీసుకున్న ఈ నిర్ణయంతో అమెరికాతో పాటు మరికొన్ని ఆసియా దేశాలపై ప్రతికూల ప్రభావం పడనున్నట్లు అంతర్జాతీయ నిపుణులు అంచనా వేస్తున్నారు. అంతేకాకుండా, కొత్తగా అధ్యక్ష బాధ్యతలు చేపట్టే బైడెన్కు ట్రంప్ చర్యలు ఇబ్బంది కలిగించే అంశాలని విశ్లేషకులు భావిస్తున్నారు.
ఇదీ చూడండి:ట్రంప్ 2.0: 'మిషన్ 2024'కు సన్నద్ధం!
