ఇళ్లపై కూలిన విమానం.... ఇద్దరి మృతి

దక్షిణ కాలిఫోర్నియాలో ఓ విమానం గాల్లోకి ఎగిరిన కాసేపటికే సమీప ఇళ్లపై కూలిపోయింది. ఘటనలో ఇద్దరు మృతి చెందగా మరో ఇద్దరికి తీవ్ర గాయాలయ్యాయి.

అమెరికా దక్షిణ కాలిఫోర్నియాలో ఓ ప్రైవేటు విమానం విధ్వంసం సృష్టించింది. యోర్బా లిండా నగరంలోని ఫుల్లెర్టాన్​ విమానాశ్రయం నుంచి గాల్లోకి ఎగిరిన విమానం సమీపంలోని ఇళ్లపైకి దూసుకెళ్లి అక్కడే కూలిపోయింది. పెద్ద ఎత్తున మంటలు చెలరేగాయి. ఈ ఘటనలో ఇద్దరు మృతిచెందారు. మరో ఇద్దరికి తీవ్ర గాయాలయ్యాయి.

భయాందోళనలకు గురైన ప్రజలు అధికారులకు సమాచారమిచ్చారు. ప్రమాద స్థలికి చేరుకున్న అగ్నిమాపక దళాలు పరిస్థితిని అదుపులోకి తెచ్చాయి. మృతి చెందిన వారు విమానంలోని సిబ్బందా... బయటి వారా అనేది తెలియాల్సి ఉంది.