అమెరికా ఎన్నికల్లో అవకతవకలపై అధ్యక్షుడు డొనాల్డ్ ట్రంప్ ఆరోపణలు చేస్తూనే ఉన్నారు. చాలా మంది అధికారులు, నిపుణులు ఎలాంటి అక్రమాలు జరగలేదని అంగీకరించినా ట్రంప్ పట్టువీడటం లేదు. అయితే, ట్రంప్ ఎన్ని ప్రయత్నాలు చేసినా ఫలితాల్లో మార్పులు అసాధ్యమని విశ్లేషకులు చెబుతున్నారు.
కానీ, ఇలాంటి నిరాధారమైన ఆరోపణలు పదేపదే చేయటం వల్ల ఎన్నికల వ్యవస్థపై ప్రజల్లో నమ్మకం సన్నగిల్లుతుందన్నారు. ట్రంప్ మద్దతుదారుల దృష్టిలో బైడెన్ అక్రమంగా ఎన్నికయ్యారనే భావన పెరుగుతుందన్నారు.
అయినప్పటికీ, జో బైడెన్ గెలుపునకు కారణమైన కీలక రాష్ట్రాల్లో ఫలితాల ధ్రువీకరణను అడ్డుకోవటం లేదా ఆలస్యం చేసేందుకు ట్రంప్తో పాటు ఆయన మద్దతుదారులు ప్రయత్నిస్తున్నారు. బ్యాలెట్ల నిర్వహణ, తమ పరిశీలకులను అనుమతించలేదని ఫిర్యాదు చేస్తున్నారు. ఇందుకు సంబంధించి ఎలాంటి ఆధారాలు లేకపోవడం వల్ల కోర్టుల్లో వీటిని రుజువు చేయటంలో విఫలమవుతున్నారు.
ప్రస్తుతం ఆరు రాష్ట్రాల్లో ఎన్నికలపై రిపబ్లికన్లు ఫిర్యాదులు చేశారు. ఆయా రాష్ట్రాల్లో కేసుల స్థితిగతులు ఇలా..
1.అరిజోనా..
రాష్ట్రంలో అత్యంత జనాభా కలిగిన మరికోపా కౌంటీలో ఫలితాలను నిలిపేయాలని రిపబ్లికన్లు కోర్టును ఆశ్రయించారు. దీనిపై విచారణ కొనసాగుతోంది. అయితే, ఆడిట్లో ఎలాంటి తేడాలు లేవని అధికారులు చెబుతున్నారు.
ఫలితాల ధ్రువీకరణను ఆలస్యం చేయాలని వేసిన మరో పిటిషన్ను కోర్టు కొట్టేసింది.
2.జార్జియా..
రాష్ట్రంలో పోస్టల్ బ్యాలెట్ల నిర్వహణ ప్రక్రియను అక్రమంగా మార్చారని కన్జర్వేటివ్ అటార్నీ లిన్ ఉడ్ ఆరోపించారు. పోస్టల్ బ్యాలెట్లపై సంతకాలకు సంబంధించి ఎలాంటి ప్రమాణాలు లేవన్నారు. ఫలితాల ధ్రువీకరణ నిలిపేయాలని డిమాండ్ చేశారు. ఉడ్ ఆరోపణలు మూర్ఖమైనవని జార్జియా ఉన్నతాధికారి ఒకరు విమర్శించారు.
ఉడ్ వ్యాజ్యంపై గురువారం విచారణ జరగనుంది. ఈ రాష్ట్రంలో చేపట్టిన రీకౌంటింగ్ ఫలితాలు కూడా గురువారమే విడుదల కానున్నాయి.
3.మిషిగన్..
ఈ రాష్ట్రంలో ఎన్నికల అధికారులు అక్రమాలను ప్రోత్సహించారని ట్రంప్ బృందం ఆరోపించింది. లెక్కింపులో రిపబ్లికన్ పరిశీలకులను అనుమతించలేదన్నారు. అర్హత లేని బ్యాలెట్లను లెక్కించారన్నారు. వాటిని లెక్కింపు నుంచి తొలగించాలన్నారు.
కోర్టులు వీటిపై ఎలాంటి నిర్ణయం తీసుకోలేదు. కానీ, డెట్రాయిట్, వెయిన్ ప్రాంతాలపై వేసిన పిటిషన్లను కొట్టివేశాయి. కాగా, మిగిలిన పిటిషన్లనూ ట్రంప్ బృందం ఉపసంహరించుకోనుందని సమాచారం.
4.నెవాడా..
ఈ రాష్ట్రంలో ఫలితాలు చెల్లుబాటు కావని లేదా ట్రంప్ను విజేతగా ప్రకటించాలని ఆయన బృందం పిటిషన్లు దాఖలు చేసింది. అక్రమ ఓట్లను లెక్కించారని ఆరోపణలు చేశారు. ఓటర్లను ప్రలోభపెట్టారని ఫిర్యాదు చేశారు. ఈ ఫిర్యాదులపై నెవాడా కోర్టులు ఎలాంటి నిర్ణయం తీసుకోలేదు.
5.పెన్సిల్వేనియా..
ఫిలడెల్ఫియాతో పాటు మరో ఆరు కౌంటీల్లో పొరపాట్లు దొర్లిన బ్యాలెట్లను సరిచేసేందుకు అనుమతి ఇచ్చారని ఆరోపించారు. వాస్తవానికి వీటిని సాంకేతికంగా అనర్హమైనవిగా ప్రకటించాలన్నారు. వీటిపై గురువారం విచారణ జరగనుంది.
6.విస్కాన్సిన్..
రాష్ట్రంలో డెమొక్రాట్ల కంచుకోటలైన మిల్వౌకీ, మాడిసన్ కౌంటీల్లో రీకౌంటింగ్కు డిమాండ్ చేశారు. పోస్టల్ బ్యాలెట్లను మార్చారని ఎలాంటి ఆధారాలు లేకుండానే ఫిర్యాదు చేశారు.
ఈ రాష్ట్రంలో మొత్తం కలిపి ట్రంప్పై బైడెన్ 20 వేల ఓట్ల ఆధిక్యంలో ఉన్నారు. ఇక్కడ రీకౌంటింగ్ శుక్రవారం ప్రారంభమై.. డిసెంబర్ 1న ముగుస్తుంది. రాష్ట్ర స్థాయిలో ఫలితాలు ధ్రువీకరించేందుకు ఇదే చివరి తేదీ.
ఇదీ చూడండి: కొత్త ప్రభుత్వంపై ట్రంప్ ఆసక్తికర వ్యాఖ్యలు
