61 ఏళ్ల వయస్సులో పాపకు జన్మనివ్వడం ద్వారా వార్తల్లో నిలిచారు సిసిలీ బామ్మ. స్వలింగ సంపర్కుడైన తన కుమారుడి కోసం బిడ్డను కనాలని ముదిమి వయస్సులో తన మనవరాలికే జన్మనిచ్చి తల్లయ్యారు. కన్న ప్రేమకు సాటి ఏదీ లేదని నిరూపించారు.
అమెరికా నెబ్రాస్కాలోని ఒమాహ పట్టణవాసి 'సిసిలీ'. ఈ 61 ఏళ్ల బామ్మ సరోగసీ పద్ధతిలో తన మనవరాలికి జన్మనిచ్చారు. ఆ పాపకు ముద్దుగా 'ఉమా లూయీస్ డౌగర్తీ ఎలెడ్జ్' గా నామకరణం చేశారు.
కొడుకు మాథ్యూ ఎలెడ్జ్, అల్లుడు ఇలియట్ డౌగర్తీ దంపతుల అభిలాషను అర్థం చేసుకున్న సిసిలీ వారికి ఓ బంగారు పాపను కని కానుకగా ఇచ్చారు.
"నేను చేయవలసిందల్లా నా జీవితంలో ఒకటిన్నర సంవత్సరాలు త్యాగం చేయడం. అన్యోన్య దంపతులైన నా కొడుకు-అల్లుడి కోసం ఈ పని చేయాలని నిర్ణయించుకున్నాను."- సిసిలీ, మనవరాలికి జన్మనిచ్చిన బామ్మ
సోదరుని కోసం సిసిలీ కుమార్తె లియా యెరిబే అండం దానం చేశారు. మాథ్యూ నుంచి శుక్రకణాలు స్వీకరించి వైద్యులు పిండాన్ని అభివృద్ధి చేశారు.
"నేనేం చేయగలను. నేను సహాయం చేయాలని కోరుకుంటాను. సహాయం చేయడానికి నా వల్ల అయిందేదైనా చేస్తాను."- లియా యెరిబే, సిసిలీ కుమార్తె ,అండం దాత
తమకు అమ్మ ఇచ్చిన కానుకను చూసి భార్యా, భర్తలు మాథ్యూ ఎలెడ్జ్ ,ఇలియట్ డౌగర్తీ ఉప్పొంగిపోతున్నారు.
"మా అమ్మ కొన్ని సంవత్సరాల క్రితం మరణించారు. ఇప్పుడు ఈ పాప ద్వారా ఎంతో ప్రేమించే మా అమ్మగారితో గడిపిన అనుభూతి కలుగుతోంది."
- ఇలియట్ డౌగర్తీ, మాథ్యూ ఎలెడ్జ్ భర్త (స్వలింగ సంపర్కులు)
"మేము పాపను 'ఉమ' అని పిలుచుకుంటున్నాం. బామ్మతో ఆమె అనుబంధం కొనసాగాలని కోరుకుంటున్నాం."- మాథ్యూ ఎలెడ్జ్, సిసిలీ కుమారుడు
ఇదీ చూడండి:క్యాన్సర్పై పోరాడే నీలి బంగాళదుంప!
