భారీ వర్షాలు ఆసియా దేశాలను అతలాకుతలం చేస్తున్నాయి. భారత్, బంగ్లాదేశ్, నేపాల్, మయన్మార్లలో ఇప్పటివరకు 600 మంది మరణించినట్లు ఐక్యరాజ్యసమితి వెల్లడించింది. ఈ దేశాల్లో దాదాపు 2.5 కోట్ల మంది వరదల బారిన పడ్డారని ఐరాస అధికార ప్రతినిధి ఫర్హాన్ హక్‌ పేర్కొన్నారు. ఈ సంఖ్య మరింత పెరిగే అవకాశముందని అన్నారు.
వరదల ప్రభావం ఉన్న భారత్లో ఇప్పటికే యూనిసెఫ్ సహకారం అందిస్తోందని తెలిపారు ఫర్హాన్. అసోం, బిహార్, ఉత్తరప్రదేశ్‌ రాష్ట్రాల ప్రభుత్వాలతో కలిసి పనిచేస్తోందని వెల్లడించారు. వరదల వల్ల వ్యాధులు వ్యాప్తి చెందకుండా మారుమూల ప్రాంతాల్లోనూ తాగునీరు, ఆహారం, మందులు పంపిణీ చేస్తున్నట్లు చెప్పారు.
భారత్లో కోటి మందికిపైగా...
భారత్లోని అసోం, బిహార్, ఉత్తర్ప్రదేశ్ రాష్ట్రాల్లోనే సుమారు కోటి మందికిపైగా వరదల ప్రభావానికి గురయ్యారని చెప్పారు ఫర్హాన్. ఒక్క అసోంలోనే దాదాపు 2 వేల పాఠశాలలు దెబ్బతిన్నాయన్నారు. భారత్లో ఓ వైపు వరదలు ముంచెత్తుతుండగా, మరోవైపు ఎండలు మండుతున్న పరిస్థితులు కనిపిస్తున్నాయని అన్నారు.
93 మంది చిన్నారులు...
వరదల కారణంగా భారత్, నేపాల్, బంగ్లాదేశ్లలో సుమారు 93 మంది చిన్నారులు మృతి చెందినట్లు ఐరాస చిన్నారుల విభాగం యూనిసెఫ్ (యూఎన్ఐసీఈఎఫ్) వెల్లడించింది. లక్షల మంది చిన్నారులు ప్రమాదంలో ఉన్నారని తెలిపింది. అంటువ్యాధులు సోకకుండా వైద్య సదుపాయాలు అందిస్తున్నట్లు పేర్కొంది.
ఇదీ చూడండి: ఉత్తర ఫిలిప్పీన్స్లో వరుస భూకంపాలు
