కరోనా కాలనాగు ప్రపంచంపై విషం చిమ్ముతోంది. ఈ మహమ్మారి బారిన పడిన బాధితుల సంఖ్య తాజాగా కోటి 60 లక్షలకు చేరింది. 6.44 లక్షల మంది మరణించారు.
కొవిడ్ ధాటికి అగ్రరాజ్యం అతలాకుతలమవుతోంది. అమెరికాలో వైరస్ కేసుల సంఖ్య 42.52 లక్షలకు చేరింది. మృతుల సంఖ్య 1,48,541కి ఎగబాకింది. 20.28 లక్షల మంది వైరస్ నుంచి కోలుకోగా.. మరో 20.75 లక్షల యాక్టివ్ కేసులున్నాయి.
మళ్లీ పెరుగుదల..
దక్షిణ కొరియాలో కొత్తగా 113 కరోనా కేసులు నమోదయ్యాయి. ఇరాక్ నుంచి తిరిగొచ్చిన 36 మంది కార్మికులు సహా 32 మంది రష్యా సరకు విమాన సిబ్బందికి పాజిటివ్గా తేలినట్లు ప్రభుత్వ వర్గాలు వెల్లడించాయి.
చైనాలో మరో 34 పాజిటివ్ కేసులను గుర్తించారు అధికారులు. ఇందులో 29 మందికి దేశంలోనే సోకినట్లు వెల్లడించారు.
ఎదురుదెబ్బ..
యెమెన్లో 97 మంది వైద్య సిబ్బంది వైరస్ కారణంగా మరణించారు. ఐదు సంవత్సరాలుగా దేశంలో యుద్ధం జరుగుతుండటం వల్ల ఇప్పటికే యెమెన్లో వైద్యుల కొరత తీవ్రంగా ఉంది. ఈ పరిస్థితుల్లో ఇలాంటి ఘటన జరగడం ఆ దేశానికి తీరని లోటని మెడ్గ్లోబల్ సంస్థ పేర్కొంది.
50 వేలకు చేరువలో..
సింగపూర్లో మరో 513 కరోనా కేసులు బయటపడ్డాయి. వీరంతా విదేశాలకు చెందినవారేనని సింగపూర్ వైద్య శాఖ ప్రకటించింది. దీంతో దేశంలో కేసుల సంఖ్య 49,888కి చేరింది. ఇప్పటివరకు 45,172 మంది వైరస్ నుంచి కోలుకోగా.. 27 మంది ప్రాణాలు కోల్పోయారు. రానున్న రెండు వారాల్లో కరోనా కేసుల సంఖ్య మరింత పెరిగే అవకాశం ఉందని మంత్రిత్వ శాఖ పేర్కొంది.
నేపాల్లో..
నేపాల్లో మరో 133 కొవిడ్ పాజిటివ్ కేసులను గుర్తించారు అధికారులు. మొత్తం కేసుల సంఖ్య 18,374కి చేరినట్లు తెలిపారు. ఓ మహిళ కరోనా బారిన పడి మరణించగా.. ఇప్పటివరకు నేపాల్లో 44 మంది వైరస్ ధాటికి ప్రాణాలు త్యజించారు.
ఆందోళనకరంగా ఆఫ్రికా
ఆఫ్రికా ఖండంలో కరోనా కేసుల సంఖ్య ఎనిమిది లక్షలు దాటింది. మొత్తం 8,10,008 పాజిటివ్ కేసులు రాగా.. ఇందులో సగానికిపైగా దక్షిణాఫ్రికా నుంచే ఉన్నాయి. తాజాగా దక్షిణాఫ్రికాలో 13వేలకు పైగా కేసులు నమోదయ్యాయి. దీంతో మొత్తం కేసుల సంఖ్య 4 లక్షల ఎనిమిది వేలకు ఎగబాకింది. మొత్తం 6,093 మంది వైరస్ ధాటికి బలైనట్లు ప్రభుత్వ గణాంకాలు స్పష్టం చేస్తున్నాయి. మరోవైపు.. కెన్యా సహా తూర్పు ఆఫ్రికా ప్రాంతాల్లో వైరస్ కేసులు క్రమంగా పెరుగుతున్నాయి. ఆఫ్రికాలో వైద్య సేవల పరిమితుల దృష్ట్యా ప్రపంచ ఆరోగ్య సంస్థ సైతం ఇక్కడి పరిస్థితులపై ఆందోళన వ్యక్తం చేస్తోంది.
వివిధ దేశాల్లో కరోనా కేసుల వివరాలు ఇలా...
| దేశం | కేసులు | మరణాలు |
| అమెరికా | 42,52,490 | 1,48,541 |
| బ్రెజిల్ | 23,48,200 | 85,385 |
| రష్యా | 8,06,720 | 13,192 |
| దక్షిణాఫ్రికా | 4,21,996 | 6,343 |
| మెక్సికో | 3,78,285 | 42,645 |
| పెరూ | 3,75,961 | 17,843 |
| చిలీ | 3,41,304 | 8,914 |
| స్పెయిన్ | 3,19,501 | 28,432 |
| యూకే | 2,97,914 | 45,677 |
