అఫ్గాన్లో మారుతున్న పరిణామాలపై వివిధ దేశాలతో భారత్ వరుస చర్చలు జరపుతోంది. ఇందులో భాగంగా.. రష్యా సెక్రటరీ ఆఫ్‌ సెక్యూరిటీ కౌన్సిల్‌ జనరల్ నికోలాయ్ పాట్రూషెవ్‌తో జాతీయ భద్రతా సలహాదారు అజిత్ డోభాల్ దిల్లీలో సమావేశమయ్యారు. అమెరికా సెంట్రల్ ఇంటెలిజెన్స్ ఏజెన్సీ(సీఐఏ) చీఫ్ విలియమ్ బర్న్స్ భేటీ అయిన ఒక్కరోజు తర్వాత ఈ భేటీ జరగడం గమనార్హం.
అఫ్గాన్ను తాలిబన్లు హస్తగతం చేసుకోవడం సహా దక్షిణాసియాలో జైష్-ఏ -మహమ్మద్, లష్కరే తోయిబా వంటి ఉగ్రసంస్థలు తమ ప్రాబల్యాన్ని పెంచుకోవడంపై నికోలాయ్, అజిత్ డోభాల్ చర్చించారని సంబంధింత వర్గాలు తెలిపాయి. అయితే.. అఫ్గాన్ విషయంలో.. సమన్వయంతో ముందుకు సాగాలని ఈ సమావేశంలో నిర్ణయించినట్లు రష్యా రాయబార కార్యాలయం తెలిపింది. ఉగ్రవాదం, మానవ అక్రమ రవాణా, మాదక ద్రవ్యాల అక్రమ రవాణాపై వ్యతిరేక పోరాటంలో కలిసి పని చేయాలని నిర్ణయం తీసుకున్నట్లు పేర్కొంది.
"అఫ్గాన్లో మానవతా పరిస్థితులపై, పౌరుల తరలింపుపై రష్యా, భారత్ ప్రతినిధులు చర్చించారు. శాంతియుత మార్గంలో అఫ్గాన్లోని సమస్యలను పరిష్కరించడానికి రష్యా, భారత్ కలిసి ఉమ్మడి ప్రయత్నాలు చేయాలని నిర్ణయించారు. అఫ్గాన్ విషయంలో ఆచితూచి నిర్ణయం తీసుకోవాలని తీర్మానించారు."
-రష్యా రాయబార కార్యాలయం.
మరోవైపు.. జనరల్ నికోలాయ్ పాట్రూషెవ్‌ అజిత్ డోభాల్తో కలిసి.. ప్రధాని నరేంద్ర మోదీ, విదేశాంగ శాఖ మంత్రి ఎస్.జయశంకర్‌తోనూ భేటీ కానున్నారు. అఫ్గాన్లో రాజకీయ, భద్రతా పరమైన, మానవతా పరిస్థితులను వారు సమీక్షించనున్నారు.
ఆగస్టు 24వ తేదీన ప్రధాని నరేంద్ర మోదీ, రష్యా అధ్యక్షుడు పుతిన్‌ మధ్య జరిగిన ఫోన్‌ కాల్‌ సంభాషణ తర్వాత రష్యా ప్రతినిధి నికోలాయ్ ఎన్ఎస్ఏ అజిత్ డోభాల్ మధ్య ఈ భేటీ జరగడం గమనార్హం. అయితే.. మంగళవారం డోభాల్, అమెరికా సీఐఏ చీఫ్ మధ్య జరిగిన చర్చపై భారత విదేశాంగ శాఖ, అమెరికా దౌత్య కార్యాలయం స్పందించలేదు.
మరోవైపు.. అఫ్గాన్లో తాలిబన్లు తాత్కాలిక ప్రభుత్వాన్ని ఏర్పాటు చేసిన నేపథ్యంలో అమెరికా కీలక వ్యాఖ్యలు చేసింది. వారి చర్యల ఆధారంగా.. అఫ్గాన్లో వారి ప్రభుత్వాన్ని గుర్తించడంపై నిర్ణయం తీసుకుంటామని తెలిపింది.
