టునీసియాలో ఘోర రోడ్డు ప్రమాదం జరిగింది. పర్యటకులతో వెళ్తోన్న బస్సు లోయలో పడిపోయింది. ఈ ప్రమాదంలో 22 మంది ప్రాణాలు కోల్పోయారు. 21 మంది తీవ్రంగా గాయపడ్డారు. ఘటనాస్థలానికి చేరుకున్న అధికారులు క్షతగాత్రులను సమీప ఆస్పత్రులకు తరలించారు. ఘటనపై దర్యాప్తు చేపట్టారు.
దేశ రాజధాని టునీస్ నుంచి ఐన్ద్రాహం వైపు బస్సు వెళుతున్న క్రమంలో ఐన్స్నౌసీ ప్రాంతంలో కొండపైనుంచి లోయలోకి దూసుకెళ్లింది బస్సు. ఈ ఘటనలో బస్సు నుజ్జునుజ్జయింది. బస్సులో ఉన్న వారంతా టునీసియన్లేనని గుర్తించారు అధికారులు.
ప్రపంచంలోనే రోడ్డు ప్రమాదాల రేటు అధికంగా ఉన్న దేశం టునీసియా అని 2015లోనే ప్రపంచ ఆరోగ్య సంస్థ (డబ్ల్యూహెచ్ఓ) హెచ్చరించింది. తుపాకీ మోతలతో దద్దరిల్లే లిబియా కన్నా ముందు టునీసియా ఉన్నట్లు పేర్కొంది. అస్తవ్యస్త రోడ్లు, నిర్లక్ష్యపు డ్రైవింగ్, పాడైపోయిన వాహనాలతోనే అధికంగా ప్రమాదాలు జరుగుతున్నాయని నిపుణులు వెల్లడించారు.
ఇదీ చూడండి: సిరియా ఘర్షణల్లో 2 రోజుల్లోనే 70 మంది మృతి
