ఏప్రిల్ 28న తన పదవీకాలం ముగిసిన అనంతరం బౌటేఫ్లికా రాజీనామా చేస్తారని ఆయన కార్యాలయం ఆదివారం ప్రకటించినా ప్రజలు వెనక్కి తగ్గలేదు. రాజధాని అల్జీర్స్లో ఆందోళనలు ఉద్ధృతం చేశారు. పరిస్థితి చేయి దాటే ప్రమాదముందని ఆ దేశ సైన్యాధ్యక్షుడు 82 ఏళ్ల బౌటేఫ్లికాను ఫోన్లో హెచ్చరించారు. రాజీనామా చేయడమే మేలని సూచించారు. చేసేది లేక... బౌటేఫ్లికా పదవీ కాలం ముగియక ముందే గద్దె దిగారు.
బౌటేఫ్లికా రాజీనామాతో వందలాది మంది ప్రజలు రాజధాని ఆల్జీర్స్లో సంబరాలు జరుపుకున్నారు. కార్ల హార్న్ మోగిస్తూ, పాటలు పాడుతూ, అల్జీరియా జెండాలను ప్రదర్శిస్తూ ఆనందం వ్యక్తం చేశారు.
ఎలా ముందుకు..?
బౌటేఫ్లికా రాజీనామాను ఆ దేశ రాజ్యాంగ కమిటీ బుధవారం ఆమోదించనుంది. ఎగువసభ అధ్యక్షుడు దేశానికి తాత్కాలిక అధ్యక్షుడిగా బాధ్యతలు నిర్వర్తిస్తారు. అల్జీరియా రాజ్యాంగం ప్రకారం ఆయన 90 రోజులపాటు కొనసాగొచ్చు. ఈలోగా కొత్త అధ్యక్షుడి ఎన్నిక జరగాలి.
ప్రస్తుతం అల్జీరియా ఎగువసభ అధ్యక్షుడిగా ఉన్న అబ్దెల్కాదర్ బెన్సాలా కూడా బౌటేఫ్లికా సహచరుడే. ఈ నేపథ్యంలో అల్జీరియాలో పరిపాలనా వ్యవస్థను పూర్తిగా ప్రక్షాళన చేయాలని డిమాండ్ చేస్తున్న ప్రజలు నిరసనలు కొనసాగిస్తారా, ఆపేస్తారా అనే సందిగ్ధం నెలకొంది.
