ఆ సినిమా కోసం మరింత నాజూగ్గా ఎన్టీఆర్​... చైతూ కొత్త సినిమా షురూ!

'ఆర్‌ఆర్‌ఆర్‌' సినిమాలో కండలు పెంచి, బలంగా కనిపించిన ఎన్టీఆర్‌... కొత్త సినిమా కోసం కొన్ని కిలోల బరువు తగ్గే పనిలో ఉన్నారు. మరోవైపు నాగచైతన్య కోసం ఓ కథని సిద్ధం చేశానంటున్నారు దర్శకుడు వేణు ఊడుగుల.

Hero NTR New Look: ప్రతి సినిమాకీ ఎన్టీఆర్‌ స్టైల్‌ మారుతోంది. పాత్రకి తగ్గట్టుగా తన లుక్‌ మారుస్తుంటారు. అందుకోసం ఎంతైనా శ్రమిస్తుంటారు. కొన్నిసార్లు కండలు కరిగిస్తుంటారు, పెంచుతుంటారు. ఆ ప్రభావం తెరపై స్పష్టంగా కనిపిస్తుంటుంది. అభిమానుల్ని మరింతగా అలరిస్తోంది. త్వరలోనే పట్టాలెక్కనున్న కొత్త సినిమా కోసం కూడా ఆయన కసరత్తులు మొదలుపెట్టారు. ఇప్పటికే కొంత బరువు తగ్గిన ఆయన... మరింత నాజూగ్గా మారే పనిలో ఉన్నారు. 'ఆర్‌ఆర్‌ఆర్‌' సినిమాలో కండలు పెంచి, బలంగా కనిపించిన ఎన్టీఆర్‌... కొత్త సినిమా కోసం కొన్ని కిలోల బరువు తగ్గే పనిలో ఉన్నారు. కొరటాల శివ దర్శకత్వంలో తెరకెక్కనున్న ఆ సినిమా ప్రస్తుతం స్క్రిప్ట్‌ దశలో ఉంది. వచ్చే నెలలో పట్టాలెక్కే అవకాశాలు ఉన్నాయి. 'ఆర్‌ఆర్‌ఆర్‌' తర్వాత ఎన్టీఆర్‌ చేస్తున్న సినిమా కావడంతో అందుకు తగ్గ కథ, కథనాల్ని దర్శకుడు సిద్ధం చేస్తున్నారని సినీ వర్గాలు చెబుతున్నాయి. ఎన్టీఆర్‌ శక్తిమంతమైన పాత్రలో కనిపించనున్నారు.

జూనియర్​ ఎన్టీఆర్​

చైతూ కొత్త సినిమా షురూ!
'విరాటపర్వం' సినిమాతో హృదయాల్ని కదిలించారు దర్శకుడు వేణు ఊడుగుల. తొలి సినిమా నుంచే కథ, కథనాలపై తనదైన ముద్ర వేస్తున్న దర్శకుడాయన. తదుపరి సినిమా కోసం సన్నాహాలు జోరుగా సాగుతున్నాయి. నాగచైతన్య కోసం ఓ కథని సిద్ధం చేసి వినిపించినట్టు తెలిసింది. ఇద్దరి మధ్య కథా చర్చలు జరుగుతున్నట్టు ఫిలిం నగర్‌ వర్గాలు చెబుతున్నాయి. నాగచైతన్య ప్రస్తుతం వెంకట్‌ ప్రభు దర్శకత్వంలో ఓ సినిమా చేస్తున్నారు. పలువురు యువ దర్శకులు ఆయన కోసం కథలు సిద్ధం చేస్తున్నారు. అందులో వేణు ఊడుగుల కథ ఒకటి. అన్నీ కుదిరితే ఈ కలయికలో సినిమా పట్టాలెక్కే అవకాశాలున్నాయి.

నాగచైతన్య

అజయ్‌ కతుర్వార్‌ కథానాయకుడిగా నటిస్తూ... స్వీయ దర్శకత్వంమలో తెరకెక్కించిన చిత్రం 'అజయ్​గాడు'. భానుశ్రీ, శ్వేత మెహతా కథానాయికలు. చందన కొప్పిశెట్టితో కలిసి అజయ్‌ కుమార్‌ ప్రొడక్షన్స్‌ నిర్మించింది. ఈ సినిమా లుక్‌ని కథానాయకుడు సత్యదేవ్‌ హైదరాబాద్‌లో ఆవిష్కరించారు. "అజయ్‌ కతుర్వార్‌ 'విశ్వక్‌' సినిమాతో మంచి గుర్తింపుని తెచ్చుకున్నాడు. ఆయన విభిన్నమైన కథ, కథనాలతో ఈ సినిమాని తెరకెక్కించాడు. త్వరలోనే టీజర్‌ని కూడా విడుదల చేస్తాం. ఈ కథలో అజయ్‌ ఎవరు? తన లక్ష్యం కోసం ఏం చేశాడనేది కీలకం. త్వరలోనే ఈ సినిమా గురించి మరిన్ని వివరాల్ని వెల్లడిస్తామ"ని తెలిపాయి సినీ వర్గాలు. ఈ చిత్రానికి సంగీతం: కార్తీక్‌ కొడకండ్ల, మనీజేన, సుమంత్‌బాబు, ప్రతీక్, నేపథ్య సంగీతం: సిద్ధార్థ్‌ శివుని.

'అజయ్​గాడు' పోస్టర్​

ఇదీ చదవండి: 'మర్యాద రామన్న' టు 'ఆర్​ఆర్​ఆర్'​.. హాలీవుడ్​ ఫెస్ట్​లో జక్కన్న చిత్రాల సందడి