Suriya Rolex Movie : లోకేశ్ కనగరాజ్ తెరకెక్కించిన 'విక్రమ్'లో రోలెక్స్ పాత్ర ఎంతటి సెన్సేషనల్ సృష్టించిందో తెలిసిన విషయమే. డ్రగ్‌ మాఫియాను శాసించే ఈ పాత్ర సినిమాకే హైలైట్గా నిలిచింది. ఇందులో కోలీవుడ్ స్టార్ హీరో సూర్య తన విలనిజంతో ప్రేక్షకుల్ని భయపెట్టేశారు. క్లైమాక్స్‌లో ఆయన కనిపించింది కాసేపే అయినా, థియేటర్‌ అంతా దద్దరిల్లిపోయింది. నెగెటివ్‌ షేడ్స్‌ ఉన్న ఈ పాత్రలో సూర్య.. కనిపించిన తీరు ఇండియావైడ్ మూవీలవర్స్కు గూస్బంప్స్ తెప్పించింది. అయితే ఈ రోలెక్స్ పాత్రతో ఓ పూర్తి సినిమా వస్తే బాగుంటుందని చాలా మంది అభిమానులు కోరుకున్నారు.
అయితే దీనిపై ఓ క్లారిటీ ఇచ్చారు సూర్య. ఆదివారం ఫ్యాన్స్ మీట్‌లో పాల్గొన్న ఆయన.. తన కొత్త సినిమాలకు సంబంధించిన విశేషాలను పంచుకున్నారు. "ప్రస్తుతం నేను 'కంగువా' సినిమాతో బిజీగా ఉన్నాను. మేము ఊహించిన దానికన్నా వందరెట్లు ఎక్కువ అద్భుతంగా ఔట్పుట్ వచ్చింది. ఈ ఏడాది అక్టోబర్‌ నుంచి నా 43వ సినిమాను ప్రారంభించాలనుకుంటున్నాను. ఆ సినిమా వివరాలను త్వరలో తెలియజేస్తాను. ప్రస్తుతం డైరెక్టర్ వెట్రిమారన్‌ 'విడుదలై 2' సినిమా చిత్రీకరణలో బిజీగా ఉన్నారు. ఆయన అది పూర్తి చేయగానే తర్వాత నాతో 'వాడి వసల్‌' మొదలుపెడతారు. అలాగే లోకేశ్ కనగరాజ్ కూడా రోలెక్స్ పాత్రకు సంబంధించి ఓ స్టోరీ వినిపించారు. అది నాకు ఎంతో బాగా నచ్చింది. దాన్ని కూడా త్వరలోనే ప్రారంభిస్తాం. రోలెక్స్ అయిపోగానే 'ఇరుంభుకై మాయావి' చేస్తాం" అని పేర్కొన్నారు. దీంతో ఆయన ఫ్యాన్స్ సంతోషం వ్యక్తం చేస్తూ సంబరాలు చేసుకుంటున్నారు. ముఖ్యంగా రోలెక్ట్ గురించి సోషల్మీడియాలో ఫుల్ ట్రెండ్ చేస్తున్నారు.
Lokesh Kanagaraj Leo Movie : కాగా, లోకేశ్ కనగరాజ్ ప్రస్తుతం దళపతి విజయ్తో 'లియో' సినిమా చేస్తున్న సంగతి తెలిసిందే. త్వరలోనే ఇది రిలీజ్ కానుంది. ఇందులో బాలీవుడ్ స్టార్ యాక్టర్ సంజయ్ దత్ ప్రతినాయకుడిగా కనిపించనున్నారు. ఇది కూడా లోకేశ్ సినిమాటిక్ యూనివర్స్లో భాగంగానే రూపొందుతోంది.
