మహేశ్ బాబు నటించిన 'సర్కారు వారి పాట' చిత్రానికి బాక్సాఫీసు వద్ద విశేష స్పందన లభించడం పట్ల ఆ చిత్ర దర్శక నిర్మాతలు హర్షం వ్యక్తం చేశారు. తెలుగు రాష్ట్రాలతోపాటు విదేశాల్లోనూ తమ చిత్రాన్ని తొలిరోజు మంచి ఓపెనింగ్స్ సాధించిందని ఆనందం వ్యక్తం చేసిన మైత్రీ మూవీ మేకర్స్.... ఇతర భాషల్లోనూ ఈ చిత్రాన్ని రిమేక్ చేసే అవకాశాలు ఉన్నట్లు తెలిపారు. అలాగే మహేశ్ అభిమానులు ఆశించిన స్థాయిలో సర్కారు వారి పాట ఉండటం తనకు ఎంతో ఆనందాన్ని ఇచ్చిందన్న దర్శకుడు పరుశురాం... మధ్య తరగతి కుటుంబాల జీవితాలకు అద్దంపట్టే కథ ప్రేక్షకులకు బాగా నచ్చిందన్నారు. ఈ సందర్భంగా నిర్మాతలతో కలిసి జూబ్లీహిల్స్ లోని నిర్మాణ సంస్థ కార్యాలయంలో కేక్ కట్ చేసి బాణాసంచా కాల్చి సంబురాలు జరుపుకున్నారు.
తారకరత్న '9 అవర్స్‌'..
ప్రముఖ దర్శకుడు క్రిష్‌ అందించిన కథతో తెరకెక్కుతున్న ఆసక్తికర వెబ్‌ సిరీస్‌ ‘9 అవర్స్‌’. అజయ్‌, మధుశాలిని, తారక రత్న తదితరులు కీలక పాత్రల్లో నటిస్తున్న ఈ సిరీస్‌ జూన్‌2 నుంచి డిస్నీ+హాట్‌స్టార్‌ వేదికగా స్ట్రీమింగ్‌ కానుంది. ఈ సందర్భంగా ఆసక్తికర పోస్టర్‌ను చిత్ర బృందం విడుదల చేసింది. ‘డెక్కన్‌ ఇంపీరియల్‌ బ్యాంకు’లో 9గంటల పాటు ఏం జరిగిందన్న ఆసక్తికర కథతో ఈ సిరీస్‌ను తెరకెక్కిస్తున్నారు. వై.రాజీవ్‌రెడ్డి, సాయిబాబు జాగర్లమూడి నిర్మిస్తున్న ఈ సిరీస్‌కు నిరంజన్‌ కౌశిక్‌, జాకబ్‌ వర్గీస్‌లు దర్శకత్వం వహిస్తున్నారు.
ఇదీ చదవండి: ఎన్టీఆర్ లగ్జరీ లైఫ్.. రూ.4కోట్ల వాచ్.. రూ.25కోట్ల ఇల్లు.. ఇంకా ఏమున్నాయంటే?
