సినీ ఇండస్ట్రీలో హిట్ పెయిర్స్ తెరపై కనిపిస్తుంటే ఆడియెన్స్ ఎంతలా ఇష్టపడతారో.. అలాగే క్రేజీ పెయిర్స్ను కూడా అంతే ఆసక్తిగా చూసేందుకు ఇష్టపడతారు. ముఖ్యంగా స్టార్ హీరోయిన్స్.. యంగ్ హీరోల కాంబినేషన్స్ ఎప్పుడు ఇంట్రెస్టింగ్గానే ఉంటుంది. ఇప్పటికే తెలుగు చిత్రసీమలో అనుష్క శెట్టి.. నవీన్ పొలిశెట్టి కాంబోలే ఓ సినిమా రూపొందుతున్న సంగతి తెలిసిందే. ఇప్పుడు మరో క్రేజీ కాంబో తెరపై సందడి చేయడానికి రెడీ అవ్వనుందని సమాచారం అందుతోంది.
అసలు విషయానికొస్తే.. హీరోయిన్ సమంత-డైరెక్ట‌ర్ నందినిరెడ్డి మ‌ధ్య చ‌క్క‌టి స్నేహబంధం ఉన్న సంగతి తెలిసిందే. క‌ష్ట‌స‌మ‌యాల్లో త‌న‌కు అండ‌గా నిలిచిన స‌న్నిహితుల్లో నందినిరెడ్డి ఒక‌రని సమంత ప‌లు సంద‌ర్భాల్లో కూడా చెప్పుకొచ్చింది. గ‌తంలో వీరిద్ద‌రి కాంబినేష‌న్‌లో 'జబర్దస్త్'తో పాటు 'ఓ బేబీ' సినిమాలొచ్చాయి. అయితే ఈ రెండింటిలో బాక్సాఫీస్ వద్ద 'జబర్దస్త్' ఆశించిన స్థాయిలో ఆడలేదు. అయితే 'ఓ బేబీ' మాత్రం కమర్షియల్గా హిట్ను అందుకుంది. సామ్ నటనకు మంచి మార్కులు కూడా వచ్చాయి. విమర్శల నుంచి ప్రశంసలు దక్కాయి.
అయితే ఇప్పుడు మళ్లీ సమంత-నందినిరెడ్డి కాంబినేష‌న్‌లో మరో చిత్రం రాబోయే అవకాశాలున్నాయని సమాచారం అందింది. ఈ సినిమాలో టాలీవుడ్ యంగ్ హీరో 'డీజే టిల్లు' ఫేమ్ సిద్ధు జొన్న‌ల‌గ‌డ్డ కీలక పాత్ర‌లో న‌టించ‌నున్న‌ట్లు ప్ర‌చారం సాగుతోంది. నందిని రెడ్డి గత సినిమాల తరహాలోనే.. ఈ చిత్రం కూడా ఫ్యామిలీ ఎంటర్టైనర్గా తెర‌కెక్కనున్నట్లు అని టాక్ వినిపిస్తోంది. త్వరలోనే దీనికి సంబంధించి అఫీషియ‌ల్ అనౌన్స్‌మెంట్ రానుందట. ప్రస్తుతం స్క్రిప్ట్ పనులు జరుగుతున్నాయట. ఇకపోతే నందినిరెడ్డి దర్శకత్వం వ‌హించిన 'అన్నీ మంచిశ‌కున‌ములే' చిత్రం ఈ శుక్ర‌వారం ఆడియెన్స్ ముందుకు రానుంది. ఈ సినిమాలో సంతోష్‌శోభ‌న్‌, మాళ‌వికానాయ‌ర్ హీరోహీరోయిన్లుగా నటించారు.
మ‌రోవైపు రీసెంట్గా గుణశేఖర్ దర్శకత్వంలో 'శాకుంత‌లం' సినిమాతో ఆడియెన్స్ను అలరించింది సమంత. కానీ ఇది బాక్సాఫీస్ వద్ద డిజాస్టర్గా నిలిచింది. ప్రస్తుతం తెలుగులో సెన్సేషనల్ స్టార్ విజయ్ దేవరకొండ 'ఖుషి' సినిమా చేస్తోంది. ఇది లవ్ అండ్ రొమాంటిక్ ఎంటర్టైనర్గా రూపొందుతోంది. ప్రస్తుతం శరవేగంగా షూటింగ్ జరుపుకుంటున్న ఈ చిత్రం సెప్టెంబరులో రిలీజ్ కానుంది. ఇక ఖుషి సినిమాతో పాటు 'సిటాడెల్' హిందీ వెబ్‌సిరీస్‌లోనూ యాక్షన్ రోల్లో నటిస్తోంది సమంత. దీనికి రాజ్ అండ్ డీకే దర్శకత్వం వహించగా.. ఇందులో బాలీవుడ్ హీరో వరుణ్ ధావన్ కీలక పాత్ర పోషిస్తున్నారు. ఇకపోతే 'డీజే టిల్లు' హిట్ను అందుకున్న హీరో సిద్ధు జొన్న‌ల‌గ‌డ్డ.. 'డీజే టిల్లు స్కేర్'లో న‌టిస్తున్నారు. ఇందులో అనుప‌మ ప‌ర‌మేశ్వ‌ర‌న్ హీరోయిన్‌గా కనిపించనుంది. అలాగే సిద్ధు.. మెగాస్టార్ చిరంజీవి నటించబోయే కొత్త సినిమాలోనూ నటించే ఛాన్స్ అందుకున్నారని తెలిసింది.
ఇదీ చూడండి : sharwanand marriage : శర్వానంద్ పెళ్లి డేట్ ఫిక్స్.. వేదిక ఎక్కడంటే?
