చిత్రసీమలో కమర్షియల్ హీరోల చిత్రాల్లో హీరోయిన్ల పాత్రకు ప్రాధాన్యత దక్కడం అరుదుగా జరుగుతుంటుంది. చాలా వరకు వారిని గ్లామర్ ఒలకబోయడానికి, పాటలు, డ్యాన్స్కే పరిమితం చేస్తుంటారు. వారికి ఛాలెంజ్ విసిరే పాత్రలు దొరకడం కష్టమనే చెప్పాలి. కానీ కొన్ని సందర్భాల్లో వారికి అదృష్టం కలిసొచ్చో, టాలెంట్ వల్లో సవాల్ విసిరే రోల్స్ దొరుకుతుంటాయి. అలా వచ్చిన అవకాశాన్ని సద్వినియోగం చేసుకుని వాళ్లు.. ఆ పాత్రల్లో ప్రేక్షకుల, అభిమానుల మనసుల్లో చిరస్థాయిగా చోటు దక్కించుకుంటుంటారు. ఇంకా చెప్పాలంటే ఆ పాత్రల పేరుతోనే వారిని ఇక ముందు పిలుచుకునేలా సదరు హీరోయిన్లు గుర్తుండిపోతారు.
రీసెంట్గా నేచురల్ స్టార్ నాని నటించిన పక్కా యాక్షన్ థ్రిల్లర్ సినిమా 'దసరా' రిలీజైన సంగతి తెలిసిందే. బాక్సాఫీస్ వద్ద మంచి వసూళ్లతో దూసుకెళ్తోంది. ముఖ్యంగా కథతో పాటు ధరణిగా నాని, వెన్నెలగా కీర్తి సురేశ్ నటన, లుక్స్ అటు ఆడియెన్స్తో పాటు ఇటు అభిమానులను గట్టిగా కట్టిపడేశాయి. సామాన్యుల నుంచి సెలబ్రిటీల వరకు.. సినిమాతో పాటు వారిద్దరి గురించే ప్రస్తావిస్తూ ప్రశంసలు కురిపిస్తున్నారు. ఇక హీరోయిన్ కీర్తిసురేశ్ వెన్నెల పాత్ర విషయానికొస్తే.. ఈ సినిమా కథ మొత్తం ఆమె చుట్టే తిరుగుతుంటుంది! ముఖ్యంగా లవ్ అండ్ ఎమోషనల్ సీన్స్లో ఆమె నటించిన తీరు, అలాగే సంప్రాదయ తెలంగాణ బీట్కు ఆమె డ్యాన్స్ వేసిన జోరు.. అందర్నీ ఫిదా చేస్తున్నాయి. తెలంగాణ యాస కూడా నేర్చుకుని మరీ సొంతంగా డబ్బింగ్ చెప్పుకుంది.
సావిత్రి 'మహానటి' వంటి బిగ్గెస్ట్ హిట్ తర్వాత పెర్ఫార్మన్స్ పరంగా ఆమెకు దక్కిన స్కోప్ ఉన్న పాత్రలో ఇది రెండోది అని చెప్పాలి. ఎందుకంటే మిస్ ఇండియా, పెంగ్విన్, సాని కాయిదమ్, గుడ్ లక్ సఖి లాంటి ఫిమేల్ ఓరియెంటెడ్ చిత్రాలు ఆమె చేసినప్పటికీ.. అంతగా ఆమెకు భారీ స్థాయిలో ప్రశంసలు దక్కలేదు. కానీ వెన్నెల పాత్ర ఆమెకు స్పెషల్గా నిలిచిపోతుందనే చెప్పాలి. అయితే మిగితా హీరోయిన్ల విషయానికొస్తే.. ఇలాంటి తరహా పాత్రలో ఇప్పటికే సమంత గతంలో నటించింది. గతంలో రామ్చరణ్ 'రంగస్థలం'లో రామలక్ష్మిగా ఆడియెన్స్ను కట్టిపడేసింది. అప్పటికే వరకు గ్లామర్ రోల్స్కు పరిమితమైన ఆమె.. ఈ చిత్రంతో తనలోని మరో కోణాన్ని చూపించింది. పొగరు దూకుడు కలగలిసిన పల్లెటూరి అమ్మాయిగా బాగా పెర్ఫార్మెన్స్ కూడా చేసింది. అయితే సొంతంగా మాత్రం డబ్బింగ్ చెప్పలేదు. కానీ చూడటానికి ఈ వెన్నెల, రామలక్ష్మి క్యారెక్టర్ల లుక్స్, పాత్రలు కాస్త దగ్గరగా ఉంటూ.. ఆడియెన్స్కు ఫ్రెష్నెస్ను ఇచ్చాయి. . అలా రెండు పాత్రలు బాగా కనెక్ట్ అయ్యాయి. ఒకవేళ ఈ రెండు పాత్రలను పోలుస్తూ ఎవరు బాగా చేశారంటే మాత్రం.. ఇద్దరూ అద్భుతంగా నటించారని చెప్పొచ్చు. కాబట్టి దీన్ని జడ్జ్ చేయడం అంత సులభం కాదు.
ఇంకో విషయమేమిటంటే.. 'రంగస్థలాన్ని' దర్శకుడు సుకుమార్ తెరకెక్కించగా.. ఆయన శిష్యుడు శ్రీకాంత్ ఓదెల తన తొలి సినిమాగా ఈ 'దసరా'ను డెరెక్ట్ చేశారు. అలా ఈ గురుశిష్యులు.. ప్రేక్షకుల్లో.. సమంత, కీర్తిసురేశ్ను ఎప్పటికీ ఆయా పాత్రలతో గుర్తిండిపోయేలా చేశారు.
ఇదీ చూడండి: మరో కొత్త సినిమాకు రష్మిక గ్రీన్ సిగ్నల్.. ఈ సారి అలా..
