ప్రముఖ టాలీవుడ్ నటుడు రామ్చరణ్ ప్రస్తుతం అమెరికా పర్యటనకు వెళ్లారు. వచ్చే నెల 12న జరగబోయే 95వ ఆస్కార్ అవార్డుల ప్రదానోత్సవానికి ఆయన హాజరుకానున్నారు. ఇందుకోసం ఆయన ఇప్పటికే అమెరికాకు చేరుకున్నారు. ఆస్కార్ పండగకి ఇంకా చాలా సమయం ఉన్నా అప్పుడే చరణ్ ఎందుకు వెళ్లారనే గుసగుసలు వినపడుతున్నాయి. అయితే ఈ వేడుకకు ముందు మరో అవార్డుల ప్రదానోత్సవంలో కూడా చరణ్ పాల్గొనబోతున్నారని తెలిసింది. అది కూడా ఆడియన్గా కాకుండా ప్రెజెంటర్గా వెళ్లనున్నారు. కాగా, హెచ్సీఏ పిలుపు అందుకున్న తొలి భారతీయ హీరోగా రామ్ చరణ్ నిలిచారు.
ప్రముఖ ఇంగ్లీష్ మూవీస్ అకాడమీ అయిన హెచ్సీఏ(హాలీవుడ్ క్రిటిక్స్ అసోసియేషన్) రామ్చరణ్కు అరుదైన గౌరవాన్ని ఇచ్చింది. ఈ సంస్థ ప్రపంచవ్యాప్తంగా ప్రతి ఏడాది విడుదలైన ఉత్తమ సినిమాలను పలు విభాగాల్లో ఎంపిక చేసి అవార్డులను ప్రదానం చేస్తుంది. అయితే విజేతలకు ఈ అవార్డులను అందించడానికి ప్రజెంటర్గా రామ్చరణ్ను అహ్వానించారు నిర్వాహకులు. ఈ నెల 24న ఈ 6వ హెచ్సీఏ అవార్డుల ప్రదానోత్స కార్యక్రమం జరగనుంది. ఈ ఈవెంట్లో ఒక విజేతకు రామ్చరణ్ అవార్డును అందించనున్నారు.
ఇకపోతే ఇప్పటికే 'ఆర్ఆర్ఆర్' సినిమాలోని నాటు నాటు పాట ఆస్కార్ బెస్ట్ ఒరిజినల్ సాంగ్ విభాగంలో నామినేట్ అయిన సంగతి తెలిసిందే. అలాగే ఈ చిత్రం గోల్డెన్ గ్లోబ్తో పాటు క్రిటిక్స్ ఛాయిస్ అవార్డులను కూడా అందుకుంది. ఈ క్రమంలోనే తాజాగా హెచ్సీఏ ప్రదానం చేయనున్న అవార్డులకు ఆర్ఆర్ఆర్ చిత్రం నామినేట్ అయింది. ఉత్తమ దర్శకుడు, ఉత్తమ అంతర్జాతీయ చిత్రం, బెస్ట్ ఒరిజినల్ సాంగ్తో సహా మొత్తం 8 విభాగాల్లో నామినేట్ అయింది. మరి, నామినేట్ అయిన ఈ విభాగాల్లో జక్కన్న సినిమా ఎన్ని అవార్డులను సొంతం చేసుకుంటుందో తెలియాలంటే ఫిబ్రవరి 24 వరకు వేచి చూడాల్సిందే.
కాగా, మంగళవారం తెల్లవారుజామున హైదరాబాద్ ఎయిర్పోర్టులో రామ్చరణ్ కనిపించారు. అయితే ఆయన అయ్యప్ప స్వామి దీక్షలో ఉన్న సంగతి తెలిసిందే. ఈ దీక్షలోనే ఆయన నల్లటి దుస్తుల్లో కాళ్లకి చెప్పులు లేకుండా అమెరికాకు పయనమయ్యారు. దీనికి సంబంధించిన వీడియో, ఫొటోలు ప్రస్తుతం సోషల్ మీడియాలో చక్కర్లు కొడుతున్నాయి. ఈ వీడియోను చూసిన కొందరు ఫ్యాన్స్ చరణ్ను సోషల్ మీడియా వేదికగా పొగడ్తలతో ముంచెత్తున్నారు. రామ్ చరణ్ ప్రజల హృదయాలను గెలుచుకోవడంలో ఎప్పుడూ ముందుంటారని, ఆర్ఆర్ఆర్ మూవీ టీమ్కు ఆల్ ది బెస్ట్, ఆస్కార్ ట్రోఫీని గెలుచుకొని రండి, ప్రౌడ్ ఆఫ్ రామ్చరణ్.. ఇలా ఎవరికి నచ్చిన తీరులో వారు రాసి కామెంట్స్ పెడుతున్నారు అభిమానులు.
ఇకపోతే.. చివరిసారిగా 2009లో భారత చిత్రం ఆస్కార్ అవార్డును దక్కించుకుంది. 2008లో విడుదలైన స్లమ్డాగ్ మిలియనీర్ సినిమాలోని 'జై హో' పాటను కంపోజ్ చేసిన ఏఆర్ రెహమాన్ సంగీతానికి బెస్ట్ ఒరిజినల్ సాంగ్ విభాగంలో దీనిని అందజేశారు. ఈ సినిమాను డానీ బాయిల్ తెరకెక్కించారు. అలా చాలా కాలం తర్వాత మరో భారత సినిమా ఆస్కార్ రేసులో నిలవడంతో ఆర్ఆర్ఆర్పై ప్రేక్షకులు భారీ అంచనాలే పెట్టుకున్నారు. ఆర్ఆర్ఆర్తో పాటు ఇండియన్ ఫిల్మ్ మేకర్స్.. షౌనక్ సేన్ డైరెక్ట్ చేసిన 'ఆల్ దట్ బ్రీత్స్', గునీత్ మోంగా డైరెక్ట్ చేసిన 'ది ఎలిఫెంట్ విస్పర్స్'లు ఉత్తమ డాక్యూమెంటరీ ఫీచర్ ఫిల్మ్ కేటగిరీలో ఆస్కార్ రేసులో ఉన్నాయి.
