అక్కినేని వారి అబ్బాయి నాగచైతన్య మరో సినిమాతో ప్రేక్షకుల ముందుకు రాబోతున్నారు. వెంకట్ ప్రభు దర్శకత్వంలో వస్తున్న ఈ సినిమాను చైతన్య భారీగానే ప్లాన్ చేశారు. ఇందులో నాగచైతన్యతో కృతి శెట్టి రొమాన్స్ చేయనుంది. ఈ సినిమా షూటింగ్ సెప్టెంబర్లో ప్రారంభమైంది. కానీ ఇంకా పేరు ఖరారు చేయలేదు. #ఎన్సీ22 పేరుతో చిత్రీకరణ జరుపుకుంటోంది. ఇటీవల 'లాల్ సింగ్ చద్దా', 'థ్యాంక్యూ' సినిమాలతో ప్రేక్షకుల ముందుకు వచ్చాడు. అయితే ఈ సినిమాలు బాక్సాఫీస్ వద్ద అంతగా రాణించలేకపోయాయి. అయితే నాగచైతన్య మరో మూవీలో నటించే నటీనటుల గురించి అప్డేట్ ఇచ్చింది చిత్ర యూనిట్.
భారీ తారాగణంతో తెరకెక్కుతున్న ఈ సినిమా బడ్జెట్ కూడా అదే స్థాయిలో ఉంటుందని సినీ వర్గాల సమాచారం. అయితే తాజా అప్డేట్లో నటీనటుల పేర్లు వెల్లడించింది చిత్ర యూనిట్. జాతీయ అవార్డు పొందిన ప్రముఖ నటి ప్రియమణి ఈ సినిమాలో కీలక పాత్ర పోషించనుంది. ఆమెతో పాటు శరత్ కుమార్, అరవింద్ స్వామి, వెన్నెల కిషోర్, తమిళ నటుడు ప్రేమ్జీ అమరేన్, సంపత్ రాజ్, జీవా ప్రధాన పాత్రలు పోషిస్తున్నారు.
వీళ్లే కాకుండా మరో ప్రముఖ సీరియల్ తార కూడా ఇందులో నటించనుంది. మొదటి సారి వెండితెర అరంగేట్రం చేస్తోంది ఈ బుల్లితెర బామ. ఆమెనే తెలుగు బుల్లితెరపై మెరిసి మంచి గుర్తింపు తెచ్చుకున్న ప్రేమీ విశ్వనాథ్. ఇంతకీ ఈ ప్రేమీ విశ్వనాథ్ అంటే ఎవరంటారా? అదేనండీ మన 'కార్తీక దీపం' సీరియల్లో వచ్చే వంటలక్క. శ్రీనివాస సిల్వర్ స్క్రీన్ బ్యానర్పై తెరకెక్కుతున్న ఈ సినిమాకు మాస్ట్రో ఇళయరాజా, అతడి కుమారుడు యువన్ శంకర్ రాజా సంగీతం సమకూర్చుతున్నారు.
ఇవీ చదవండి: డేటింగ్లో సారా.. శుభ్మన్ జంట! మరోసారి కెమెరాకు.. నెట్టింట వీడియో వైరల్
కర్వాచౌత్ వేడుకల్లో సినీ తారల సందడి.. కత్రిన, మౌనీరాయ్ లుక్స్ సూపర్
