Prabhas Kriti Sanon Love: ఎలా మొదలైందో ఎక్కడ మొదలైందో తెలీదు కానీ కృతి సనన్, ప్రభాస్ ప్రేమించుకుంటున్నారని త్వరలో పెళ్లి కూడా చేసుకోబోతున్నారనే వార్త ఇప్పుడు అటు బాలీవుడ్, టాలీవుడ్ వర్గాల్లో హాట్ టాపిక్గా మారింది. ఒకరకంగా చెప్పాలంటే కరణ్ జోహార్ షో ద్వారా ఇది ప్రారంభమైందని చెప్పొచ్చు. ఆదిపురుష్ సినిమాలో ప్రభాస్ కృతి సనన్ జంటగా నటించారు. ప్రభాస్ రాఘవ అనే పాత్రలో నటించగా ఆయన సరసన సీత పాత్రలో కృతి సనన్ నటించింది.
తర్వాత కరణ్ జోహార్ షో లో కృతి సనన్ పాల్గొన్నప్పుడు ఏ సమయంలో అయినా నీ ఫోన్ లిఫ్ట్ చేసే ఒక సెలబ్రిటీకి ఫోన్ చేయమని ఆయన కోరడంతో కృతి ప్రభాస్కు ఫోన్ చేసింది. కొన్ని రింగ్స్కే ప్రభాస్ ఆమె ఫోన్ లిఫ్ట్ చేయడంతో వీళ్లిద్దరి మధ్య ఏదో ఉందనే వార్త బలంగా మొదలైంది. ఇక ఇటీవల భేడియా సినిమాతో కృతి సనన్ ప్రేక్షకుల ముందుకు వచ్చింది. ఆ సినిమాను మరింత ప్రమోట్ చేసుకునే పనిలో భాగంగా ఒక షోలో పాల్గొంటే ఆ షోలో కూడా కరణ్ జోహార్.. వరుణ్ ధావన్తో కొన్ని ఆసక్తికరమైన కామెంట్స్ చేయించారు.
ఓ సందర్భంలో కృతి సనన్ పేరు మరొకరి గుండెల్లో ఉందని వరుణ్ అన్నారు. ఆయన ప్రస్తుతానికి ఇక్కడ లేరని దీపికతో కలిసి షూటింగ్లో ఉన్నారని కామెంట్ చేశారు. అప్పుడు దీపికతో ప్రాజెక్ట్ కే షూటింగ్లో ఉన్నది ప్రభాస్ కావడంతో ప్రభాస్ కృతి మధ్య ఏదో ఉందనే వార్త మరోసారి తెరమీదకు వచ్చింది.
ఇక కొందరైతే ప్రభాస్ ఆదిపురుష్ షూటింగ్లో ఆమెకు ప్రపోజ్ చేశారని కూడా ప్రచారం చేస్తూ రావడంతో వీటికి పుల్ స్టాప్ పెట్టాలని కృతి సనన్ భావించింది. "ఇది ప్రేమ కాదు అలాగని పీఆర్ స్టంట్ కూడా కాదు, మా భేడియా అంటే వరుణ్ ధావన్ ఆ రియాలిటీ షోలో కాస్త కావాలని ఇలా మాట్లాడారు. ఆయన వ్యంగ్యం ఎక్కడికో దారితీసి అనేక రకాల ఊహాగానాలకు ఇప్పుడు తావిస్తోంది. ఏదో ఒక వెబ్సైట్ మా పెళ్లి తేదీ కూడా ప్రకటించక ముందే నేను ఈ విషయం మీద క్లారిటీ ఇవ్వాలని అనుకుంటున్నాను. ఇవన్నీ ఎలాంటి ఆధారాలు లేని వార్తలు మాత్రమే" అంటూ చెప్పుకొచ్చారు. ఇకనైనా ఈ వ్యవహారానికి ఫుల్ స్టాప్ పడుతుందేమో చూడాలి మరి.
