కొన్ని కాంబినేషన్లు చూడటానికి ప్రేక్షకులు ఎంతో ఆసక్తిగా ఎదురుచూస్తుంటారు. అలాంటి వాటిలో మహేశ్‌బాబు - రాజమౌళి ప్రాజెక్టు ఒకటి. ఈ కాంబోలో ఎప్పుడో సినిమా రావాల్సి ఉన్నా... రాజమౌళి 'బాహుబలి', 'ఆర్‌ఆర్‌ఆర్‌' వంటి భారీ ప్రాజెక్టుల వల్ల ఆలస్యమవుతూ వచ్చింది. ఇక ఇప్పుడు ఆ సినిమాకు రూట్‌ క్లియర్‌ అయింది. ఇప్పటికే ఇందుకు సంబంధించిన పనులను జక్కన్న మొదలుపెట్టారు. మరోవైపు మహేశ్‌బాబు కూడా త్రివిక్రమ్‌ సినిమాను పట్టాలెక్కించారు. ఆ సినిమా పూర్తవ్వగానే... రాజమౌళి ప్రపంచంలోకి అడుగుపెడతారు మహేశ్.
అయితే ఈ సినిమా గురించి రోజుకో ఇంట్రెస్టింగ్ వార్తలు వస్తున్నాయి. ఈ సినిమాలో విలన్ కోసం ఓ కోలీవుడ్ స్టార్ హీరోను లైన్లో పెట్టాలని రాజమౌళి ఆలోచిస్తున్నారంటూ గతంలో వార్తలు వచ్చాయి. అయితే తాజాగా ఆయన కథానాయకుడు కార్తిని సంప్రదించారని ఆయన పాత్ర గురించి చెప్పారని తెలిసింది. పాత్ర నచ్చడంలో కార్తి కూడా ఒకే చెప్పడానికి సుముఖంగా ఉన్నట్లు తెలుస్తోంది. త్వరోలనే దీనిపై క్లారిటీ రానుంది. ఈ విషయం బయటకు రావడం వల్ల రాజమౌళి, మహేశ్ ఫ్యాన్స్ చాలా ఎక్సైట్ అవుతున్నారు.
కాగా, ఇటీవలే రాజమౌళి మహేశ్ సినిమా ఎలా ఉండబోతుందో తెలిపారు. 'ప్రపంచాన్ని చుట్టి వచ్చే సాహసికుడి కథ' అంటూ యాక్షన్‌ అడ్వెంచర్‌ మూవీగా ఇది ఉంటుందని పేర్కొన్నారు. ఈ చిత్రాన్ని పాన్‌ ఇండియా స్థాయిలో కె.ఎల్‌.నారాయణ నిర్మించనున్నారు. ప్రస్తుతం ఈ చిత్రానికి సంబంధించిన పూర్వ నిర్మాణ పనులు సాగుతున్నాయి.
ఇదీ చూడండి: ఆ సినిమా ఫ్లాప్.. రెమ్యునరేషన్ తిరిగిచ్చేసిన చిరంజీవి
