స్టార్ హీరోల సినిమాలంటేనే బోలెడన్ని లెక్కలతో కూడుకున్న పని. ఇమేజ్‌... మార్కెటింగ్ స్ట్రాటజీ... అభిమానులు... నిర్మాతలతో ఉన్న ఒప్పందాలు... ఇలా ఒకటా రెండా.. ఎన్నో అంశాలను దృష్టిలో ఉంచుకుని దర్శకుడు అడుగులేయాల్సి ఉంటుంది. అన్నీ కుదిరితేనే సినిమా పట్టాలెక్కుతుంది. లేకుంటే ఒక్క విషయం దగ్గర తేడా వచ్చినా కూడా అనుకున్న కలయికలో సినిమా సెట్స్ పైకి రావడానికి చాలా సమయం పడుతుంది. అందుకేనేమో మొదట కొన్ని కొన్ని కలయికలు ప్రచారంలోకి వచ్చినా... వాళ్లు ఆ సినిమా కోసం కొంత దూరం ప్రయాణం చేసినా సరే... అనూహ్యంగా ఆ కలయికలు మారిపోతుంటాయి. అదే ప్రాజెక్ట్ కోసం ఎవరూ ఊహించని మరో కొత్త కలయికతో కుదురుతూ ఉంటుంది. గడిచిన రెండు మూడేళ్లలో ఇలాంటి అనూహ్యమైన కలయికలే ఎక్కువగా కనిపిస్తున్నాయి.
చిరు తార్ మార్..
టాలీవుడ్లోకి మెగాస్టార్ చిరంజీవి రీ ఎంట్రీతో ఇండస్ట్రీలోని సీనియర్ డైరెక్టర్స్ నుంచి జూనియర్స్ వరకూ అందరూ ఆయన కోసం కథలు సిద్ధం చేస్తున్న వారే. అయితే ఇప్పటి వరకు ఆయన తీసిన సినిమాలకు దర్శకత్వం వహించింది మాత్రం యువ దర్శకులే. అయితే ఆయన రీ ఎంట్రీ సమయంలో.. చిరు - పూరి జగన్నాథ్‌ కలయికలో ఓ సినిమా ప్రచారంలోకి వచ్చింది. 'ఆటోజానీ' అనే టైటిల్తో ఓ కథ కూడా సిద్ధమైంది. కానీ కొన్ని అనివార్య కారణాల రీత్యా ఆ ప్రాజెక్ట్ ఇప్పటివరకు పట్టాలెక్కలేదు. దీంతో ఆ స్క్రిప్ట్‌ పక్కన పెట్టి దర్శకుడు పూరి జగన్నాథ్‌ వేరే హీరోలతో సినిమాలు తీయడం మొదలెట్టారు.
- 'గాడ్‌ఫాదర్‌' సినిమా స్క్రిప్ట్‌పై సీనియర్ దర్శకుడు వి.వి.వినాయక్‌ కొన్నాళ్లు పనిచేశారు. అయితే అనూహ్యంగా ఆయన స్థానంలోకి మోహన్‌రాజా వచ్చి సినిమాని ఈ సినిమాను పట్టాలెక్కించారు.
- చిరంజీవి - సుజీత్‌ కలయికలోనూ ఓ సినిమా కోసం కొంత కాలం పనులు సాగాయి. అయితే ఆ ప్రాజెక్ట్ కూడా పట్టాలెక్కలేదు. కానీ ఇప్పుడు సుజీత్‌... పవన్‌కల్యాణ్‌తో 'ఓజీ' చేస్తున్నారు.
- కొన్నాళ్ల కిందట చిరు- వెంకీ కుడుముల కాంబోలో ఓ సినిమా కుదిరినా.. ఆ తర్వాత అది కార్యరూపం దాల్చలేదు. ఇప్పుడు వెంకీ కుడుముల... నితిన్‌తో కలిసి ఓ సినిమా చేస్తున్నారు. అయితే ఈ సినిమాలన్నీ స్క్రిప్టింగ్ దశలోనూ... పూర్వ నిర్మాణ పనుల దశలోనూ.. ఇలా ఒకొక్క సినిమా ఒక్కో కారణంతో ఆగిపోతుంటుంది. మళ్లీ కొత్త బృందాలు ఈ సినిమాల కోసం రంగంలోకి దిగి వాటి కోసం కసరత్తులు మొదలుపెడుతుంటాయి.
'ఆర్‌ఆర్‌ఆర్‌' స్టార్స్కు కూడా..
మెగా పవర్ స్టార్ రామ్‌చరణ్‌, జూనియర్ ఎన్టీఆర్‌ల విషయంలోనూ ఇదే జరిగింది. కొన్నేళ్ల కిందట రామ్‌చరణ్‌ - కొరటాల శివ కలయికలో ఓ సినిమా కుదిరింది. కానీ అప్పట్లో ఆ సినిమా కార్యరూపం దాల్చలేదు. అయితే 'ఆచార్య'తో ఈ కాంబో కుదిరింది.
- మరోవైపు రామ్‌చరణ్‌ - బుచ్చిబాబు సానా కాంబో అయితే మాత్రం ఎవ్వరూ ఊహించనిది. మొదట ఎన్టీఆర్ - బుచ్చిబాబు కలయికలో ఓ సినిమా పక్కా అయ్యింది. కానీ ఎన్టీఆర్ చేయాల్సిన ప్రాజెక్టుల సంఖ్య ఎక్కువగా ఉండటం వల్ల... బుచ్చిబాబు తన కథని రామ్‌చరణ్‌కి ఆ కథ వినిపించడంతో ఆయన పచ్చజెండా ఊపారు. దీంతో ఇప్పుడు ఈ కలయికలో ఓ సినిమా త్వరలోనే పట్టాలెక్కనుంది.
- ఇదిలా ఉండగా..'ఆర్‌ఆర్‌ఆర్‌' తర్వాత ఎన్టీఆర్ - త్రివిక్రమ్‌ కలయికలో ఓ సినిమా అనుకున్నారట. అయితే ఆ స్థానంలో ఇప్పుడు ఎన్టీఆర్ - కొరటాల శివ కాంబోలో 'ఎన్టీఆర్ 30' మొదలైంది. మరోవైపు త్రివిక్రమ్‌... మహేశ్‌బాబుతో 'SSMB 28' చేస్తున్నారు.
- ఐకాన్ స్టార్ అల్లు అర్జున్‌ కూడా ఇదివరకు కొరటాల శివ డైరెక్షన్లో ఓ సినిమా చేయాలనుకున్నారు. అంతే కాకుండా ఆ ప్రాజెక్ట్‌ని అప్పట్లో ప్రకటించారు కూడా. కానీ అల్లు అర్జున్‌ మాత్రం 'పుష్ప' కొనసాగింపుపైనే దృష్టి పెట్టారు.
ఇలా మారే చిత్రాలు చాలానే!
స్టార్ హీరో విక్టరీ వెంకటేశ్ విషయంలోనూ ఇలానే జరిగింది. తన 75వ సినిమాకి సంబంధించి పూరి జగన్నాథ్‌ మొదలుకొని... తరుణ్‌ భాస్కర్‌ వరకూ ఇలా ఎంతో మంది దర్శకుల పేర్లు వినిపించాయి. కానీ ఆయనతో సినిమా చేసే ఛాన్స్ను మాత్రం యువ దర్శకుడు శైలేష్‌ కొలను సొంతం చేసుకున్నారు. ఇక ఈ కలయికలోనే ఇప్పుడు 'సైంధవ్‌' సినిమా రూపొందుతోంది.ఇలా తార్‌మార్‌ తక్కెడమార్‌ అనిపించిన ప్రాజెక్టులు చిత్రసీమలో చాలానే ఉన్నాయి.
- మరోవైపు 'లైగర్‌' తర్వాత రౌడీ హీరో విజయ్‌ దేవరకొండ - పూరి జగన్నాథ్‌ కాంబోలో 'జనగణమన' చేయాలనుకున్నారు. అంతే కాకుండా ఈ సినిమా చిత్రీకరణ కూడా కొంత మేర జరిగింది. అయితే 'లైగర్‌' పరాజయంతో ఆ ప్రభావం 'జనగణమన'పై పడింది. ఆదిలోనే ఆ ప్రాజెక్ట్ ఆగిపోయింది.
- విజయ్‌తో ఇప్పుడు యంగ్ డైరెక్టర్ గౌతమ్‌ తిన్ననూరి ఓ సినిమా చేయడానికి సన్నాహాలు చేసుకుంటున్నారు. అంతకుముందు గౌతమ్‌ తిన్ననూరి... రామ్‌చరణ్‌కి ఓ కథ వినిపించారు. కానీ ఆ కలయికలో సినిమా కుదరలేదు.
- నితిన్‌ కథానాయకుడిగా కృష్ణచైతన్య దర్శకత్వంలో అనుకున్న సినిమా కూడా కార్యరూపం దాల్చలేదు. ఆ స్థానంలో కృష్ణచైతన్య ఇప్పుడు విశ్వక్‌సేన్‌తో ఓ సినిమా చేస్తున్నారు.
- శర్వానంద్‌ - కృష్ణచైతన్య కలయిక కూడా ప్రచారంలోకి వచ్చినప్పటికీ.. ఇప్పుడు శర్వానంద్‌ - శ్రీరామ్‌ ఆదిత్య కలయికలో ఓ సినిమా పట్టాలెక్కింది.
- వరుణ్‌తేజ్‌ కథానాయకుడిగా సాగర్‌ కె.చంద్ర ఓ సినిమా కోసం పని చేయాలనుకున్నారు. అయితే కానీ ఆ స్థానంలో బెల్లంకొండ శ్రీనివాస్‌ కథానాయకుడిగా సాగర్‌ కె.చంద్ర సినిమా ఇప్పుడు పట్టాలెక్కుతోంది. దీంతో ఓ సినిమా సెట్స్‌పైకి వెళ్లే వరకూ దర్శకుడు ఎవరో, హీరో ఎవరో చెప్పలేని పరిస్థితులు నెలకొన్నాయి.
