'దసరా' సినిమా బాక్సాఫీస్ వద్ద హిట్ టాక్తో దూసుకెళ్తోంది. తెలంగాణలోని సింగరేణి బొగ్గు గనుల నేపథ్యంలో తెరకెక్కిన ఈ సినిమాలో హీరో నాని, కీర్తి సురేశ్తో పాటు దీక్షిత్ శెట్టి కీలక పాత్రలు పోషించారు. సముద్రఖని, సాయి కుమార్, టామ్ చకో కూడా తమ యాక్టింగ్తో అదరగొట్టారు. ఇక సినిమాలోని ప్రతి సీన్ మొదటి నుంచి చివరి వరకు ఉత్కంఠ రేపేలా ఉన్నాయి. ముఖ్యంగా నాని ఎంట్రీ సీన్, ప్రీ క్లైమాక్స్ సీన్తో పాటు క్లైమక్స్ సీన్స్ ప్రేక్షకులను ఎంతగానో ఆకట్టుకున్నాయి. నాని కెరీర్లో ఇప్పటి వరకు తీసిన సినిమాలు ఒక ఎత్తయితే ఈ దసరా సినిమా మరో ఎత్తు. అయితే నానితో పాటు టాలీవుడ్ ఇండస్ట్రీకి ఇటువంటి బ్లాక్ బస్టర్ను ఇచ్చారు దర్శకుడు శ్రీకాంత్ ఓదెల.
సినీ ఇండస్ట్రీలో దర్శకుడిగా మొదటి సినిమాతోనే హిట్ టాక్ సాధించడం అంటే అది మామూలు విషయం కాదు. ఆ విజయం వెనుక ఆ డైరెక్టర్ శ్రమ ఎంతో ఉంటుంది. హీరో ఎంపిక నుంచి సినిమాలోని ప్రతి విషయంపై గురించి తగినన్ని జాగ్రత్తలు తీసుకోవాలి! కథను చిత్రీకరించే విధానంలో అసలు కాంప్రమైజ్ అవ్వకుండా ప్రేక్షకుడికి నచ్చినట్టు తీయాలంటే అది రిస్క్తో కూడిన పని. అటువంటిది కొత్త దర్శకుడు శ్రీకాంత్ ఓదెల తన మొదటి సినిమాతోనే బాక్సాఫీస్ను షేక్ చేసి తన సత్తా ఏంటో చాటుకున్నారు. తొలి సినిమానే పాన్ ఇండియా లెవెల్లో తెరకెక్కించి ఆ సినిమాతో మాసివ్ సక్సెస్ను అందుకున్నారు. ఆయన జర్నీని ఒకసారి చూస్తే..
ఆ సినిమా ఇన్స్పిరేషన్తో సుక్కు శిష్యుడిగా..
పదో తరగతిలో 'జగడం' సినిమా చూసి ప్రేరణ చెందిన శ్రీకాంత్ సినీ ఇండస్ట్రీ వైపు అడుగులేసేందుకు తన తొలి ప్రయత్నం చేశారు. సినిమాల పైనున్న ఆసక్తితో దర్శకుడు సుకుమార్ దగ్గర శిష్యరికాన్ని తీసుకుందామని నిర్ణయించుకుని ఆయన కంట్లో పడేందుకు శతవిధాలుగా ప్రయత్నించారట. ఆయన ఇంటి ముందు నిల్చున్నప్పటికీ ఆయన్ను కలిసే ఛాన్స్ రాకపోవడం వల్ల నిరాశతో వెనుతిరుగుతున్న శ్రీకాంత్ను నాలుగేళ్ల తర్వాత సుకుమార్ ఓ సారి పిలిచారట. తన ఆసక్తిని గమనించిన సుకుమార్.. శ్రీకాంత్ను ఓ షార్ట్ ఫిల్మ్ తీయమని చెప్పారట. అలా శ్రీకాంత్ వర్క్ నచ్చి నాన్నకు ప్రేమతో సినిమాలో అసిస్టెంట్ డైరెక్టర్ ఛాన్స్ ఇచ్చారట. అలా సుకుమార్ శిష్యుడిగా ఇండస్ట్రీకి పరిచయమైన శ్రీకాంత్.. ఆ తర్వాత వచ్చిన 'రంగస్థలం' సినిమాకు కూడా పనిచేశారు.
టెస్ట్ షూట్ చూశాకే..
'రంగస్థలం' చిత్రీకరణ సమయంలోనే తనకు ఓ సినిమా తీయాలన్న ఆలోచన కలిగింది. ఈ సినిమా అయిపోయాక 'దసరా' సినిమా రెడీ చేసుకుని నిర్మాత సుధాకర్‌ చెరుకూరిని అప్రోచ్ అయ్యారట. ఇక స్టోరీ విన్న నిర్మాత.. సినిమాకు ఓకే చెప్పి ఈ కథను నానికి వినిపించమన్నారట. అయితే నాని.. కొన్ని సన్నివేశాల్ని టెస్ట్ షూట్‌గా చేసుకొని వచ్చి చూపించమన్నారట. అవి నచ్చాక సినిమా చేయడానికి ఓకే చెప్పారట. అలా దర్శకుడిగా తన తొలి సినిమా జర్నీ ప్రారంభమయ్యింది. ఇక ఏడాది పాటు శ్రమించి ఈ బ్లాక్ బస్టర్ సినిమాను ప్రేక్షకులను అందించారు.
నిజ జీవితంలో జరిగిన ఓ సంఘటన స్ఫూర్తితో ఈ కథ రాసుకున్నారు దర్శకుడు శ్రీకాంత్ ఓదెల. తన బాల్యాన్ని గడిపిన వీర్లపల్లి అనే గ్రామం గురించే ఈ సినిమాను తీశారు. స్నేహం, ప్రేమ, త్యాగం లాంటి భావోద్వేగాలను తనదైన శైలిలో చిత్రీకరించి ప్రేక్షకుల కళ్లకు కట్టినట్టు చూపించారు దర్శకుడు.
