'వాల్తేరు వీరయ్య' చిత్రానికి పలు వెబ్సైట్లు ఇచ్చిన రేటింగ్పై మెగాస్టార్ చిరంజీవి ఫన్నీ కామెంట్లు చేశారు. అయితే ఆయన ఎవర్నీ విమర్శించే ఉద్దేశంతో ఆ జోకులు వేయటం లేదని తెలిపారు. కేవలం వినోదం కోసం మాత్రమే చెబుతున్నానని అన్నారు. 'వాల్తేరు వీరయ్య' యూఎస్ ప్రీమియర్స్ చూసిన పలు వెబ్సైట్లు రివ్యూలు రాశారు. కొంతమంది ఈ మూవీకి 2.5 రేటింగ్ ఇచ్చారు.
అయితే ఆ రేటింగ్ గురించి చిరు మాట్లాడుతూ.. "వాటిని చూసి బాధపడకూడదని అనుకున్నాను. ఎందుకంటే నా సినిమాపై నాకు పూర్తి నమ్మకం ఉంది. 'ఘరానా మొగుడు', 'గ్యాంగ్ లీడర్', 'రౌడీ అల్లుడు', 'అన్నయ్య' సినిమా తర్వాత ఈ చిత్రం అంతటి పూర్తిస్థాయి ఎంటర్టైన్మెంట్ ఇచ్చింది. కాబట్టి వాళ్లు ఇచ్చిన రేటింగ్ను పట్టించుకోకూడదని అనుకున్నాను. అయితే 2.5 అంటే 2.5 మిలియన్ల డాలర్లని నాకు తర్వాత తెలిసింది. యూఎస్లో అంత రెవెన్యూ వస్తుందని వాళ్లు ముందే చెప్పారు. కాని మేమే పొరపాటు పడ్డామని తెలిసింది" అని ఆయన అంటూ నవ్వులు పూయించారు.
'వాల్తేరు వీరయ్య' చిత్రానికి బాబీ దర్శకత్వం వహించారు. ఈ చిత్రంలో చిరంజీవి, రవితేజ అన్నదమ్ములుగా నటించారు. కేథరిన్, శ్రుతిహాసన్, ప్రకాశ్రాజ్, బాబీ సింహా, రాజేంద్రప్రసాద్ తదితరులు ముఖ్యపాత్రలు పోషించారు. జనవరి 13న రిలీజైన ఈ చిత్రం బాక్సాఫీసు వద్ద భారీ వసూళ్లను రాబడుతోంది. యూఎస్ఏలోనూ ఈ సినిమా మంచి క్రేజ్ సంపాదించుకుంది. ఇప్పటికే అమెరికాలో ఈ మూవీ 2 మిలియన్ డాలర్ల క్లబ్లో ప్రవేశించింది. ఈ విషయంపై చిరు ఆనందం వ్యక్తం చేస్తూ.. అమెరికాలో నివసిస్తున్న పలువులు అభిమానులతో జూమ్ కాల్లో మాట్లాడారు. ఈ చిత్రానికి భారీ విజయాన్ని అందించిన అభిమానులకు ఆయన కృజ్ఞతలు తెలిపారు.
