BRO Movie Director : 'బ్రో' సినిమా కోసం పవర్ స్టార్ పవన్ కల్యాణ్ చాలా కష్టపడ్డారని.. చిత్రీకరణ జరిగినన్ని రోజులు ఉపవాసం ఉన్నారని డైరెక్టర్ సముద్రఖని తెలిపారు. అయితే పవన్ కల్యాణ్ బ్రో కథ విన్న మూడు రోజుల్లోనే షూటింగ్ ప్రారంభించినట్లు ఆయన తెలిపారు. ఒక డైరెక్టర్గా తాను ఎంత క్లారిటీతో ఉన్నానో.. పవన్కు తొలిరోజు షూటింగ్లోనే అర్థమయ్యిందని అన్నారు. అయితే ఉన్న సమయాన్ని కాలక్షేపం చేస్తూ వృథా చేయకుండా.. సెట్లోనే పవన్ కాస్ట్యూమ్స్ మార్చుకునేవారని ఆయన పేర్కొన్నారు. షూటింగ్లో పాల్గొన్నన్ని రోజులు ఉపవాసంతో, నిష్ఠతో పనిచేశారని సముద్రఖని చెప్పుకొచ్చారు. ఈ సినిమాలో హీరో సాయిధరమ్ తేజ్ సైతం కీలక పాత్రలో నటించారు.
ప్రాజెక్ట్లోకి పవన్ - త్రివిక్రమ్ ఎంట్రీ..
'మనం ఏ పని చేయాలన్నా.. కాలం నిర్ణయిస్తుంది. నేను చేసిన 'వినోదయ సిత్తం' రిలీజైన దాదాపు వారం రోజులకు ఓ వృద్ధుడు నాకు ఫోన్ చేశాడు. సినిమా చూసిన ఆ పెద్దాయన ఎంతో ఎమోషనల్ అయ్యి నాతో మాట్లాడారు. అలా మనుషులకు దగ్గరయ్యే ఈ సినిమా తెలుగులో త్రివిక్రమ్ గారి సహకారంతోనే సాధ్యమైంది. అయితే ఎక్కువ మంది ప్రేక్షకులను ఆకట్టుకోవాలంటే పవన్ కల్యాణ్తో చేస్తే బాగుంటుందని త్రివిక్రమ్ అన్నారు. ఆయన మాటతో చెప్పలేనంత సంతోషం కలిగింది. అలా ఈ సినిమాలోకి త్రివిక్రమ్, పవన్ కల్యాణ్ వచ్చారు' అని సముద్రఖని అన్నారు.
కాగా ఈ సినిమాను కేవలం 53 రోజుల్లోనే పూర్తి చేసినట్లు దర్శకుడు తెలిపారు. ఆయన సినిమాల్లో ఇదే అత్యుత్తమ సినిమా అని చెప్పుకొచ్చారు. అయితే బ్రో అంత పర్ఫెక్ట్గా రావడానికి డైరెక్టర్ త్రివిక్రమ్ కూడా ఒక కారణమని గుర్తుచేశారు. త్రివిక్రమ్ తనకు ఒక కుటుంబ సభ్యుడిగా తోడున్నాడని సముద్రఖని తెలిపారు.
'బ్రో' కు స్ఫూర్తి..
డైరెక్టర్ సముద్రఖని, ఆయన గురువు బాలచందర్తో కలిసి 2004లో ఓ డ్రామా చూశారట. అప్పటి నుంచి ఆ కథ ఆయనతోనే ట్రావెల్ చేస్తుందని అన్నారు. ఆ డ్రామా కథ ఆధారంగానే 'వినోదయ సిత్తం' సినిమా తీసినట్లు తెలిపారు. తాజాగా తెలుగులో చేసిన ప్రయత్నమే ఈ బ్రో సినిమా అని పేర్కొన్నారు. కాగా ప్రపంచ వ్యాప్తంగా ఈ సినిమా జులై 28న గ్రాండ్గా విడుదల కానుంది.
