భారతీయ సినిమా ఇండస్ట్రీ కొత్త పుంతలు తొక్కుతోంది. ఒకప్పుడు సినిమాలు విడుదలై.. హిట్ అయిన తర్వాతే.. వాటికి సీక్వెల్ తీసేవారు. సర్కార్, హౌస్ఫుల్, క్రిష్ లాంటి కొన్ని మూవీలు ఇలా వచ్చినవే. అయితే ఇప్పుడు ట్రెండ్ మారింది. సౌత్, నార్త్ మధ్య గీతలు చెరిగిపోయి.. ప్రాంతీయ సినిమా.. పాన్ ఇండియా సినిమాగా ఎదిగింది. ఆ అవకాశాన్ని సద్వినియోగం చేసుకునేందుకు స్టార్స్ పోటీ పడుతున్నారు. ఈ నేపథ్యంలో సినిమా విడుదలైన తర్వాత సీక్వెల్ కాకుండా.. కథను ముందుగానే భాగాలుగా విడదీస్తున్నారు. పార్ట్-1, పార్ట్-2 లాగా సినిమాను విడుదల చేస్తున్నారు. పార్ట్-1 పాత్రలు పరిచయం చేసి.. చివర్లో ఓ ట్విస్ట్ పెట్టి.. అసలు కథ పార్ట్-2లో చెబుతున్నారు. ఫలితంగా ప్రేక్షకులను ఆకర్షించి.. వీలైనంత వరకు సొమ్ము చేసుకునే ప్రయత్నాలు చేస్తున్నారు.
మొదటి భాగం విడుదలైన తర్వాత.. దానికి వచ్చే ఆదరణను చూసి.. రెండో భాగాన్ని మరింత పవర్ఫుల్గా తీర్చి దిద్దే ప్రయత్నం చేస్తున్నారు. బాహుబలి నుంచి ఈ ట్రెండ్ మరింత ప్రాచుర్యంలోకి వచ్చింది. ఆ సినిమా ఇచ్చిన ఉత్సాహంతో మరిన్ని సినిమాలు రెండు, మూడు భాగాలుగా వచ్చేందుకు సిద్ధమవుతున్నాయి. ఇప్పటికే కేజీయఫ్ పార్ట్-1 విడుదులై సంచలన విజయం సాధించగా.. చాప్టర్-2 ఈ నెల 14న విడుదల కానుంది. అల్లు అర్జున్ 'పుష్ప', జాన్ అబ్రహం 'అటాక్' సినిమాల రెండో భాగం సిద్ధమవుతుండగా.. రణ్బీర్ కపూర్ నటించిన 'బ్రహ్మాస్త్ర' మూడు భాగాలుగా రూపుదిద్దుకుంటోంది.
బ్రహ్మాస్త్ర: రణ్బీర్ కపూర్, ఆలియాభట్‌ ప్రధానపాత్రల్లో భారతీయ సినీపరిశ్రమ చరిత్రలో భారీ బడ్జెట్తో తెరకెక్కుతున్న చిత్రాల్లో 'బ్రహ్మాస్త్ర' ఒకటి. మూడు భాగాలుగా రూపొందుతున్న ఈ సినిమాలోని తొలి భాగం చిత్రీకరణ మార్చి 29న పూర్తిచేసుకుంది. దాదాపు 5 ఏళ్లకు పైగా ఈ షూటింగ్ జరిగింది. ఈ చిత్రంలో అమితాబ్‌తో పాటు.. టాలీవుడ్ ప్రముఖ కథానాయకుడు నాగార్జున, మౌనీ రాయ్లు కీలక పాత్రలు పోషిస్తున్నారు. రణ్బీర్ శివుడిగా, మానవాతీత శక్తులు కలిగిన వ్యక్తిగా కనిపించనున్నారు.
'బ్రహ్మాస్త్ర' సినిమాపై ఇటీవలే స్పందించారు దర్శకుడు అయాన్ ముఖర్జీ. మూడు భాగాలు వచ్చే ఈ సినిమా భవష్యత్తు.. మొదటి భాగంపైనే ఆధారపడి ఉంటుందని చెప్పారు. మొదటి భాగం ఫలితాన్ని బట్టి.. పార్ట్-2పై మరింత లోతుగా ఆలోచిస్తామని చెప్పుకొచ్చారు.
"బ్రహ్మాస్త్ర.. భారతీయ సంస్కృతి నుంచి ప్రేరణ పొంది తీసుకున్న చిత్రం. యువతకు హత్తుకుపోయే సినిమా అవుతుంది."
-అయాన్ ముఖర్జీ, దర్శకుడు
అల్లు అర్జున్ 'పుష్ప' మొదటి భాగం ఇప్పటికే విడుదలై హిట్ టాక్ సాధించింది. దీంతో పార్ట్-2పై భారీ అంచనాలే ఉన్నాయి. ఈ సినిమాతో అల్లు అర్జున్.. హిందీలో గ్రాండ్ ఎంట్రీ ఇచ్చారు. మొదటి భాగానికి మించి.. పార్ట్-2 విజయం సాధిస్తుందనే అంచనాతో ఉంది చిత్ర యూనిట్.
నిపుణులు ఏం అంటున్నారంటే..
దర్శకధీరుడు రాజమౌళి వల్లే భారతీయ సినిమాలో ఈ మార్పు వచ్చినట్లు చెబుతున్నారు ట్రేడ్ నిపుణులు. పార్ట్-1 ఆరంభం, పార్ట్-2 ముగింపు అనే ప్రాథమిక సూత్రాలతో.. బాహుబలిని తీసి.. రాజమౌళి ఆల్టైమ్ హిట్ కొట్టారు. ఈ విజయం మిగతా దర్శకులను కూడా ఆలోచింపజేసినట్లు ట్రేడ్ నిపుణులు అభిప్రాయపడుతున్నారు. మొదటి భాగం హిట్ అయితే.. ఆ తర్వాత విడుదల చేసే భాగాలకు ఇబ్బంది ఉండదు. ఒకవేళ పార్ట్ -1 విషయంలో అంచనాలు తలకిందులైతే.. ఆ తర్వాత వచ్చే.. భాగాలపై ప్రభావం ఉంటుందని చెబుతున్నారు నిపుణులు. వాటిని తెరకెక్కించేందుకు సాహించరని అభిప్రాయపడుతున్నారు. ఆ తర్వాత మిగిలిన భాగం ఎప్పుడనే ప్రశ్నలు ఎదురైతే దర్శక, నిర్మాతలు సమాధానాలు వెతుక్కుంటారని అంటున్నారు. కథ సిద్ధం కాలేదనో.. నటీనటులు బిజీగా ఉన్నారనో చెప్పే అవకాశమూ లేకపోలేదని నిపుణులు చెబుతున్నారు.
ఇది చదవండి: మెగాస్టార్ ఆచార్య ట్రైలర్.. బాలీవుడ్లోకి తేజ.. 'సలార్' సర్ప్రైజ్
